Ura beeda.
Fixand ils ögls sün me, la chera dschaiva:
»Al muond ünguotta ais pü cher d'ün frer,
»Pü vasta cu il mer üngüna chosa;
»Üngüna chosa dutscha sco il meil.«
E la strandschand al cour eau respondaiva:
»Ün cher amant pü cher ais co ün frer,
»Il cour pü vast cu'l mer, il bütsch ais chosa
»Pü dutscha, craja'm, cu il pü dutsch meil.
11 Marz 1881.
Nel god.
O god, tü taimpel verd sco spraunza,
Te vzand esult' il cour bain zuond;
In te voless avair ma staunza,
Asil da pêsch, dalöntsch dal muond.
Voless compuoner simpla rima
E la vestir da simpel chaunt;
Voless loder l'Essenza prüma,
Con cour sincer sco ün infaunt.
O god, tü taimpel verd, conceda
A me asil bain cher, prüvo;
Fo'm rechatter la pêsch mangleda,
Cha eau nel muond nun he chatto!
26 Gün 1881.
