makakat-on sa kinatsila, nga maahtigo kamong molitok, aron dili
mabuak ang bildo sa among mga dalunggan sa pagpamati sa
inyong mga sayop, apan una sa tanan ang katungdanan, ipaulahi
ang debosyon; paninguha una kamo sa inyong pagtoon una motoon sa kinatsila, ug unya sulod kamo sa pagkamagsusulat kon
kana maoy inyong tinguha.
Ug nagpadayon sa pagsulti, hangtud nga mibagting ang lingganay ug nahuman ang klasi ug ang duha ka gatus ug katloan ug upat ka mga tinon-an, human mangadye, nanggula nga labi pang walay hibangkaagan kay sa ilang pagsulod, apan maayo ang ilang pagginhawa, sama sa nakapahulay sila sa pagpas-an sa usa ka butang mabug-at. Ang tagsatagsa kanila nakuhaan niadtong higayona usa ka takna sa ilang kinabuhi, nunot ang usa ka bahin sa kaulawan ug pagtamod sa kaugalin^on, apan nagkadugang usab ang kaluya ug walay gugma sa pagtoon ug ang kaligutgut sulod sa kasingkasing. Human niini, kinsa pa kay nakasulti mahitungod sa kinaadman, pagkamasalamaton sa mga utang buot nga nadawat ug uban pa?
De nobis, post hec, tristis sententia fertur!
Ug sa duha ka gatus ug katloan ug upat ka tinon-an, mao usab ang nahitabo sa libo ka mga tinon-an nga nag-una kanila, ug kon kining paagiha dili mausab, mao usab ang mahitabo sa magsunod kanila nga inay makakat-on, mahimo hinoon nga walay alamag, ug unya ang kadasig ug kakugi sa kabataan mahimong kaligutgut ug kataspok, sama sa mga balod sa dagat nga, tungod kay kasaktan ug lapok sa ubang dapit sa baybayon, makadalag daghang hugaw sa ngadtongadto. Apan, kadto nga sukad sa itaas nagtan-aw sa sangputan sa mga dautang buhat, kadto nga nagtimbang sa bili sa usa ka gutlo ug nagsugo sa iyang mga binuhat sa pag-uswag ug paghingpit; kadto, kon siya matarong, mangayo da unyag kahusayan sa angayan niya pangayoan kon ngano nga libo ka libo sa mga salabutan nabuhatan, ngano nga gipakaulawan ang libo ka libo ka mga bata tawo ug unsay hinungdan nga nausik uyamut ang panahon ug kabudlay. Ug kon ang gitudlo sa ebanghelyo matuod, pabayron da kadtong libo ka libo nga wala maantigong magbantay sa kahayag sa ilang salabutan ug sa katul-id sa ilang mga pagbati, sama sa usa ka agalon nga mosudya sa iyang sulogoon ngano nga nagpakita siyag katalaw diha nga siya gikawatan sa salapi nga iyang gitugyan kaniya!
