XXIII
TI PANAGKALAP
Dagiti bitbituen addada pay lacng a rumanraniag iti sapaw a balbag ket dagiti tumaytayab addada pay laeng nga agsusugel kadagiti sangsanga dagiti kaykayo, idi ta maysa a naragsak a pangen indan laslasaten dagiti lanlansangan ti ili nga agturong iti danaw, a silawan ida dagiti naragsak a silsilaw a biria.
Lima da a babbalasang a magmagna a sikakarting; nagkikibinda wenno naggiinniggemda iti siket, sinaruno ida dagiti sumagmamano a babbaket ken ado a babaunen a babbai, a nagawit a nakasaysayaat kadagiti laglaga a napunno kadagiti makmakan, pingpinggan, ken dadduma pay. No kitaen dagiti ruprupa a pagkatawaan ti kinabanuag ken pagraniagan ni inanama; no buyaen ti pannakayangin dagiti napuskol ken nangisit a bubuok da ken dagiti akaba a pilpillidis dagiti ar-aruaten da, kuna tay kuma nga isuda dagiti didios ti rabii nga inda itarayan ti aldaw, no ditay kuma ammo nga isuda da Maria Clara ken dagiti uppat a pagayamna; ni naragsak a Sinang, ni kasinsinna, ni naranga a Victoria, ni napintas a Iday ken ni napanunot a Neneng, imnas a napakumbaba ken managbutbuteng.
Agsarsaritada iti nabiag, agkakatawada, agkikinnuddutda, aggi-innarasaasda, sada agpapagaak.
—¡Mariingyo dagiti tattao a matmaturog pay laeng!—yanawa kadakuada ni ikit a Isabel;—idi dakam ti ububbing, saan kam unay a naringgor.
—¡Dikay ngata met managsapsapa nga agririing a kas kadakami, ket dagiti lallakay dida met ngata unay mannurog!— insungbat ni bassit a Sinang.
Agulimekda iti mabiit, inda ikagumaan a inayaden ti timekda, ngem iti mabiit, malipatanda manen, agkakatawada ket punnuenda ti dalan kadagiti naubingan ken nalamiis a timtimekda.
—¡Aginpapauyuka; dimo kasasao — kinuna ni Sinang ken
— 161 —
