madanagan: kas la agpadpada dagitoy nga adda ken kuana. Daydi
bumaro intuluyna ti nagsao, a timmured:
—Ti gakat ko, appo, iso toy sumaganad: mangiparuar datao iti baro a buyaen a saan a dagitay kadkadawyan ken masansansan a makitkita iti tunggal aldaw, ket ikalikagom met a ti pirak a naurnong saan a rumuar ditoy ili tayo, wenno maibos nga awan pagpaayanna iti bin-ig a polbora, ngem ipaay ket di iti maysa a banag nga adda pagpaayan kadatay amin.
—!Dayta, dayta! —kinuna dagiti dadduma nga agtutubo;—iso dayta ti kayat mi.
—!Nasayaat unay!—innayon dagiti lallakay.
—Ania ti maal-ala tayo iti maysa a lawasna a komkomedia. kas dawaten ti teniente mayor? ?Ania ti maadal tayo kadagiti ar-ari sadi Bohemia ken Granada, a mangpaputol kadagiti ul-ulo dagiti annak da a babbai, wenno inda ida iselsel iti ngiwat ti maysa a kanyon, santo ket agbalin ti kanyon a maysa a tugaw ti ari? Datayo saan tay nga ari, ket saan tay met a naranggas, awan met kanyon tayo, ket no agaramidtay iti sinanpaltog, indatay bitayen sadi Bagumbayan. Ania dagita pi-prinsesa a makilaok kadagiti paggugubatan, tumagbatda nga uray da la demmangen, makikabilda kadagiti pi-prinsipe ket inda agtawtawataw nga agmaymaysa kadagiti banbantay ken tantanap, a kas da la itay kinayawan ti Kaibaan? Kadagiti kadkadawyan tayo ayatentay ti kinasam-it ken kinatarnaw ti maysa a babai, ket kabutengtay a iggaman ti ima ti maysa a balasang, a namulitan iti dara, uray no moro wenno jigante ti akindara; datayo, laaden ket ibilangtay a dakes ti lalaki a manglayat iti maysa a babai, uray no prinsipe, alperes wenno nagubal a taga talon. Saan ngata a nagpenribo a nasaysayaat no intay ipabuya dagiti bukod tay a kad kadawyan, tapno inda madillaw dagiti dakes a kabkababalin ken galgalad tayo ket maidayaw dagiti nasayaat?
—!Dayta, dayta! —inulit dagiti kakaduana.
—!Pudno ti saona!—indayamudom a sipapanunot dagiti dadduma a lallakay.
—!Saanko a napanunutan dayta! —indayamudom ni Kapitan Basilio.
?Ngem, kasano ti pamayanyo? —insupiat daydi saan a mabalusingsing a lakay.
