9
PANUNPA SA PANIMALUS
——
Naga-ulán, unús, linti ug lipak...
Gabi-i.
Daw punó sa kasilag, ang Kina-iyá ingóg nangitag pakig-away. Sa Kanunay ang dalógdog nagapabati sa iyang makalilísang tingog, dungán sa paggisi sa kalangitan sa masigang kilat. Ang unós nagasamot hadyong, ug ingon man ang ulán walá magahunong sa iyang pagbundak...
Gabi-ing mamingaw, makahahadlok uyamot.
Sa lungsud sa Sahagon, ang tanang baláy pulos na gipanákpan. Walay maskig usá ka tawong nagatimík. Tungud sa kadaután sa panahon, ang tagsatagsa nasig-iyaháy hipus sa iyang panimaláy bisan dili pa halaum ang kagabhi-on.
Apan sa usá ka libon nga dili halayó sa lungsud—libong ginalikayan, tungud kay didto ipanglubong ang mga gipamaril sa mga katsila ug mga amerikanhon,—may usá ka lalake nga, sama sa nakig-asdang sa kasilag sa Kina-iyá, nagatindog, palpag ang buhók ug mapintas ang dagway, sa atubangan sa duha ka lubóng, nga walay laing dayandayan kung dili ang duhá da ka nangapilay nang kurus... Usahay, siyá magakiúgpos ug usahay magawandaswandas sa kamút; modukó ug mohilom, ug usahay mohangád sa kahitas-an ug mo-
