May tuló ka tuig nga si León atua ná sa Kaulohan sa Pilipinas. May tuló na ka tuig nga siyá nagato-ón sa “Liceo de Manila”, nianang “Colégio” di-ín ang kina-adman ginatudlo sa kabata-an, dungán sa pagsilsil sa kasingkasing sa gugma alang sa Inahang Yuta.
Ang pagbati niya kang Siding, maó gihapon: dakú, walay kinutuban, putli; gugma nga alang kaniya kawang lamang ang gahúm sa lináy-anay ug ang lakat sa panahon, kay dili gayud malangkat ni makapabugnaw sa kasingkasing. Sa mga takna nga walay buhat ug, labí na gayúd, nianang mga takna nga ang lawas, sa humán ang daghang kahago, mangita na sa pahulay, siyá, inay matulog, magapalandong hinoon, magapalandong kang Siding, niadtong nahilayong kalipay sa iyang kinabuhi. Ang mga masalub-ong kahayag sa kahaponon, ang kamingaw sa gabi-i, ang mga langgam nga managbatóg sa kahoyng silingan sa iyang tambu-anan, ang hoyohoy, ang Bulan, ang mga Bitoon, kaná sila, kanunayng mangahimong saksi sa iyang gina-antus, sa mga pagpanghupáw niya, sa iyang paghilák..
