61
Pabay’i ta nga an batan’on magpadayon han iya turon ngan magpinanmurubuot, o maghingaturog man; an siday nga masamdong o marayhak han kapatagan diri ha iya nakakaalantad; adto nga adlaw nga nakakapagdingga han mga tarimpungayan han kakahuyan ug nakakaagda pagdalagan han mga umanhon kay diri nailob pagtamak an ira mga lupakon nga rapadapa, adto nga adlaw nga nakakapasirong han kadaragan’an nga taga huron ha tungod han talisay, o kawayan, ngan nakakahatag hin panhunahuna nga mga surupaton ngan diri matukib, adto nga adlaw waray pakawili han aton batan’on. Balik kita ngadto ha Manila hamtang nagdidinalagan an kotse, naghihilighilig sugad hin hubog dida han mga bilungan han dalan, hamtang natabok hin tulay nga kawayan, nagsasagka hin bukid, o naglulugsong hin usa nga bakilid.
IX. MGA KABATASANAN Hi Ibarra waray pagsayop: an sakay han victoria amo hi P. Damaso nga tikadto han balay nga paglulusari pa la niya. —Ngain kamo? — nagpakiana an prayle kanda Maria Clara ngan Dada Isabel nga nag-iisarakay hin kotse nga linikupan hin salapi; hi P. Damaso, dara han damo nga hinngangadtuan han panhunahuna, nagdinapidapi han bayhon ni Maria Clara. —Ngadto ha Beaterio pagkuha han akon mga butang, — binmaton. t—Ahaa! aha! kikitaon ta yana kun hino in malupig ... — nagnginurutob hin waray hinpapatungdan ngan bayaan an duha nga kababayin’an nga nanhihipahungat. Tamod an ulo ngan hinay an pitad tinultol niya an hagdanan ngan sumaka. —May wali nga gintatanog, — an siring ni Dada Isabel; —hala, sakay na, Maria, kay diri kita haaabot. Kun hi P. Damaso may wali, o waray, diri kita makakatigo, kundi katahapan nga may ada gud mga kasuruk’an nga butang nga naguop han iya panhunahuna kay waray ngani iduhol an kamot kan Kapitan Tiyago, salit ini ginmuko na la pagharok. —Santiyago!— asya an siyahan nga pinamulong, —
