132
mutangan yana, pangangaruon ko, tungod kay kinukulang na kita hin panahon, ngan an panahon sugad hin bulawan, siring han pulong ni Salomon, nga dida hini nga himurulsan nga gayod nga pagkakasarabutan an tagsa ha aton magpahayag han iya nahuhunahunaan hin sayod, halipot la ug waray likaw. Pinamulong ko.
Ngan kay tinmunga ha iya ngahaw ngan han pamati han bug-os nga ruwang an nagyakan linmingkod, bisan kun sinmiplat anay hin kanan pakalabaw kan Ibarra nga nakadto nalingkod didto ha piliw, ngan hin usa nga siplat nga may dako nga kahulugan ngadto han iya mga kasangkayan sugad hiton karuyag niya sidngon: “Ano, maupay an akon kayakan, ano?”
An iya kasangkayan nagpakita man liwat hin sugad nga paniplat ngadto han mga karukabataan pa kay basi magkatutunaw hin kaawa.
—Yana makakahimo pagyakan an karuyag magyakan nga, ehem! —nagsiring an gobernadorsilyo nga waray pakatapos han iya pinamumulong ... an ubo ngan han panharoy binmalik ha iya pagdangop.
Dida han kamamingaw hadto nga dalikyat daw sugad hin waray may naruyag nga pagngaranan nga patre conscripti kay waray naruruyag pagbuhat; dida hini hi D. Filipo nagpahimulos pagbuhat ngan mangaro nga katugutan pagyakan.
An mga konserbadores naggipakirukiro ngan naggipakirukinhat hin may kahulugan.
—Igpapahayag ko an akon hunahuna nga gasto, mga ginoo, nga sadang ta igsaurog han patron!—ngani D. Filipo.
—Diri kami nauyon,—nagsiring an iba nga mga kaaway.
—Mga ginoo! —nagsiring hi D. Filipo, diri na haros makailob hin usa nga taraw’on; —waray ko pa igpahayag an nahuhunahunaan namon han mga batan’on nga aadi amon na inandam. Ini nga amon dako nga panalinguha natapod kami nga asya gud an pipilion hini nga katirok dida han iba nga mga panhunahuna, panhuhunahunaon pa, nga sadang mahimo han amon mga kasibang.
Ini nga kagaon nga katikang nakaurit gud kaupay han mga katigurangan nga namagsumpa in corde hin pagtipa gud ngatanan. Hi D. Filipo nagpadayon:
— May ada naton igin-andam nga 3,500 kapisos. Kun asya ini makakatukod kita hin usa nga pyesta nga malupig
