Oh disingann
Ah che moster de vun! Che brutt infamm!....
E mi, bambanna, ghe morivi adree!....
Ma com'hoo faa, a cred, a lusingamm
Ch'el me sposass de bon, senza danee?
Capissi adess perchè el vorea menamm
Per i strad pers e giò per i sentee....
El credeva, quel porco, de imbroiamm
Per piantamm al dì dopo suj duu pee.
Questa l'è l'ala, voj!.... Grazie al Signor
Mi gh'hoo ancamò do dida de cervell....
Creppà de famm, ma cont el me onor!
L'è vera, sì, te set on bel pivell,
Mi sont ona strascionna e ti on scior,
Ma va all'inferno.... ch'el to post l'è quell!