Ah i donnett
Me piasen cont el faccin
De madonnina bianca, dolorosa;
I verginej che gh'han quel tal farin
De cara moneghell vergognosa:
I bei matronn che paren monument,
E quj freguj che paren faa de nient.
Ma fann gira la boggia cert sperlusc
Coi œucc de stria che faan tucc i color;
Certi gognitt, soo mi, certi patusc
Che gh'han a savè fà mila savor.
Gh'è pœu certi bruttonn che, andà a cercà!....
L'è on piaseron a faj innamorà!
Me piasen i donnett piènn de talent,
Cont quel tal spirit fin de bona lega;
Ma s'anca hin minga tant intelligent....
Se ona quai vœuna pœu la fuss intrega.
Refigni minga el nas.... sti car donnett
Me piasen semper, anca s'hin occhett
E certi aristocratich? Cert daminn
Tucc piènn de poesia, de sentiment,
Che faan l'amor tegnendegh i dandinn,
Per fa che nol scapuscia, l'innocent!....
O quisti sì, hin tutt la mia passion:
Mi ghe stariss denanz in genoggion.
Ma el tipo pussee bell, pussee perfet
Che ghe pò vess al mond, le anmò la tosa
Che marca in scossarin, coi zoccorett,
L'è l'ideal per mi de la morosa;
Senza sospir nè smorfi se po' dì:
«Voremes on poo ben per on quai dì?»
Me piasen i donnett quand hin sincer,
Quand gh'hann el cœur sui laver che ghe scotta;
Ma se me faan vedè per bianch el ner,
Sont minga quell sicur de fa ona fotta;
Sari sù i œucc: l'è mej bevel de vott
Che ne smangiass el fidegh per nagott!
Me piasen quand hin zerb, anmò in botton,
E pœu quand hin madur, pusee ancamò.
I bottonitt faan gola.... ma i s'cioppon
A che delizia!.... Chi diriss de no?
Nissun perdinci, chi refuda on fior
Ghe fa on tort tropp frand al Creator.
E grand e piscininn, negher e biond,
Magher e grass, sien angioij o demoni,
Granitt de pever, come i bocc rotond,
Ingenov, smaliziaa dal matrimoni,
Hin la mia mort i donn!.... Ah che piesè
Se fussen tucc per mì tant quant ghe n'è!....