lipu kule/sowejoki

by kala pona Tonyu

sina sona ala sona e toki musi ‘Jabberwocky’ tan jan Luwikalo (Lewis Carroll)? ona li toki musi pi wawa mute. jan mute li sona e ona, taso ona li sama ala pi toki musi ante.

lon ona la, nimi nasa mute li lon. nimi li nasa tan ni: jan ala li sona e kon ona. ona li nimi pi kon ala - jan Lewikalo li pali e nimi sin lon pali pi toki ona!

tan kama suli pi toki musi ni la, jan mute li alasa ante e ona tawa toki ante, tawa toki Sonko anu toki Losi anu toki ante mute. tenpo ni la, mi wile ante e ona tawa toki pona. pilin mi la, ni li ken musi mute.

suli nanpa wan li ni: nimi ‘Jabberwocky’. mi o pali e seme tawa nimi ni?

a! ken la mi ken pana e kalama ona tawa toki pona. ni la ona li kama nimi ‘Sapojoki’ - mi wile toki e nimi ‘Sapowoki’, taso kalama ‘wo’ li ken ala lon tan nasin pi toki pona. (pu la, kalama ‘wu’, ‘wo’, ‘ji’, ‘ti’ li ken ala lon nimi pi toki pona.). ni la ‘Sapojoki’ li nimi ona.

taso wile mi la, jan sin tawa toki musi ni li ken sona e kon nimi. nimi ‘Jabberwocky’ lon toki Inli li soweli tawa kute - jan li lukin e nimi ni la, ona li pilin e ni: ‘a, ni li soweli!’ ni la, mi o ante e nimi ‘Sapojoki’ tawa nimi ‘Sowejoki’. ken la jan li ken pilin e ni tawa nimi mi kin: ‘a, ni li soweli!’

(kin la, ona li sama lili ‘sowejaki’. ni li pona tan ni: jan mute li toki e ‘toki musi pi nimi jaki’ tawa toki musi ‘Jabberwocky’. ni la kon ona li sama, li pona a.)

lon toki linja nanpa wan li ni: ‘’twas brillig’. taso nimi ‘brillig’ li nimi pi toki Inli ala… ona li seme a?

jan Lewikalo li toki e ni: ‘’twas brillig’ li sama ‘tenpo li suno pini’. ni la mi ken ante e ona tawa ‘tenpo sun’. nimi ‘sun’ li musi, li nimi ala, sama nimi ‘brillig’. kin la, ona li ken kama tan nimi ‘suno’ pi kon sama. ni li pona a!

ijo pi suli nanpa wan li ni: jan li lukin e ante toki mi la, jan li ken sona e kon ona, li pilin musi. ni la mi alasa pana e nimi pi musi mute tawa ona.

sina lukin ala lukin e toki ‘li misu li musu lon ma wapon’ lon sitelen? toki Inli pi toki ni li toki ‘gyre and gimble’. pilin mi la, ni li musi mute tawa toki uta; o alasa toki uta e ‘li misu li musu’! kin la, ona li kama tan nimi ‘musi’. mi ante lili e kalama pi nimi ‘musi’, li pana e ona tawa toki. ken la ni li pona a.

lon awen lukin la, sina ken lukin e nimi ‘Jubjub bird’ lon toki. pilin mi la, kalama ‘Jubjub’ li sama mu waso - waso li mu mute lon tenpo ale. ni la, mi ante e nimi ni tawa ‘waso Mumu’, la jan ante li ken pilin e ni kin.

kin la, lon kulupu nimi sama la, soweli ‘Bandersnatch’ li lon. jan li lukin e ni lon toki Inli la jan li pilin e ni: soweli ni li lanpan, li kama jo kepeken wawa e ijo sina. nimi ‘lanpan’ li pona mute tawa ni. ni la, mi ante toki e ona tawa nimi ‘Palapan’; kalama ona li sama. kon ona li sama lili. ni li pona mute!

pini la, mi wile toki e nimi ‘whiffling’, lon kulupu toki nanpa tu tu. mi kama lukin e nimi ‘whiffling’ lon open ante mi, li pilin e ni: mi ken ante e ni tawa seme? pilin mi la, nimi ‘whiffling’ li sama lili pi toki ‘tawa wawa’, li sama lili ‘pakala pi ijo mute’. ni la, ken la mi ken toki e nimi ‘tawapa’ tawa ona… taso pilin pi nimi ‘tawapa’ en pilin pi nimi ‘whiffling’ li sama ala…

mi lukin tawa nasin sin: nimi ‘kipisi’. mi kama pilin e ni: pilin pi nimi ‘kipisi’ en pilin pi nimi ‘whiffling’ li sama lili, li pona mute! ni la, mi pana e nimi ‘kipisi wawa’ tawa nimi ‘whiffling’, la toki li kama nimi ‘wapisi’.

o sona e ni: nimi ante pi pona mute li lon. taso mi pilin e ni: mi toki e nimi ale tawa sina la, sina kama lape. ni la, mi o pana e toki pini tawa sina! o lukin pona, o pilin pona tan lukin!

pini pi ante toki

tenpo sun, la kipi tela
li misu li musu lon ma wapon.
iken ale li kilenwa,
waselo mimi li mon.

“o lukin e Sowejo, lili mi o!
ona li utala, ona li pakala!
o lukin e waso Mumu, o weka tan
pikesi Palapan!”

ona li luka e ilo utawa;
ike monsume li alasa ona–
ona li lape lon kasi Tutun
li alasa sona pona.

ona li awen lon pakeja
la Sowejo pi oko seli
li kama wapisi tan ma kasi teko
li tokaki lon kama!

wan, tu! wan, tu! o awen tawa!
ilo utawa li mu e si-win!
jan li luka e lawa ona
li tawa waselu sin.

“sina moli ala moli e Sowejo?
o kama lon poka, jan wawa mi o!
ni li wana mute! a wa! a je!”
ona li kintu suli.

tenpo sun, la kipi tela
li misu li musu lon ma wapon.
iken ale li kilenwa,
waselo mimi li mon.

sina ken ala ken lukin e pali musi nimi mi - sama nimi ‘kintu’ tan ‘kuntu’? sina lukin la, o toki tawa mi! ni li pona mute a. kin la, sina wile la, sina ken alasa ante e ona kin. ken la ante sina li sama ala pi ante mi. ni li ken musi mute a!

tan lipu

“Jabberwocky” alice-in-wonderland.net, https://www.alice-in-wonderland.net/resources/analysis/poem-origins/jabberwocky/. lon tenpo suno 30 pi tenpo mun wan pi tenpo sike 2021.