lipu kule/lawa pi ma Setona
jan mute li sona e ma tomo Setona (Sedona). ona li lon ma Jawapa (Yavapai) pi ma Alisona (Arizona). sina sona e ona, la tan pi sona sina li kiwen loje suli lon ona. ma tomo Setona li pona tawa jan mute tan kiwen suli ni. jan mute li tawa ona tan suwi ma, tan lukin pona. jan li ken tawa nena lon nasin, li ken sona e kasi mute, li ken lukin e ijo pi pona suwi. ma Setona li suwi mute tawa lukin. taso, jan tawa li sona ala e ni: jan lawa li pali e ijo mute tawa ma suwi ni.
sewi: sitelen ni li kiwen loje pi ma Setona. jan mute li sona e ma tomo ni tan kiwen loje ni.
sitelen li tan jan CGP Grey.
jan lawa pi ma tomo Setona li wile e ni: jan li tawa ma ni, li ken lukin e suwi ma. taso, ike ni li lon: jan li wile awen lon ma ni. ike suli, la jan li awen lon ma ni, la kulupu esun li wile pali e tomo esun e tomo suli ante lon ma ni. ni li ken pakala e suwi ma, li ken ike! ni li ike tawa wile pi jan lawa. ni la, ona li pake e pali ike pi kulupu esun.
tan ni, la jan lawa li lawa mute e pali tomo. jan li wile pali e tomo, la pali li ken kepeken tenpo mute li ken kepeken pali mute. ma Setona, la kulupu pi jan oko li lon, li lukin wawa e pali tomo. kin, la jan lawa wan li ken lukin e nasin lawa ale pi pali tomo, li ken sona e pona ona. ni li suli tan ni: jan wan sama li lawa e pali tomo, la nasin lawa li pakala ala. jan sama en kulupu sama li lawa e tomo kepeken nasin sama, la jan ale li ken pali pona.
ma tomo Setona li pali e nasin lawa mute. nasin lawa li lon tawa lukin tomo, tawa pali tomo, tawa suli tomo. suli la, nasin lawa li lawa e ken kule. tomo li ken ala kepeken kule ike; kule ona o sama kule pi tomo poka, pi kiwen loje. tan ni, la kule ale pi ma ni li sama. kule li ken ala wawa, li ken ala pakala e oko pi jan tawa. kin, la nasin lawa ni li weka e kule pi kulupu esun suli, la tomo Matono (McDonalds) li ken ala kepeken kule ona. tan ni, la ona li laso, li ante tawa ma ante ale.
sewi: sitelen ni li tomo lon poka nasin pi ilo tawa. sina ken sona e nasin pi tomo ni. sitelen li tan jan Jpatokal.
sewi: sitelen ni li laso pi sitelen pi tomo Matono. ona li ante tawa ma ante ale.
ante, la nasin lawa li lawa e ijo pi tomo ala, li awen kepeken pali lawa mute. ma tomo ni ale, la ilo suno nasin li kepeken len. ona li len ala, la tomo esun li ken ala kepeken suno mute.
kin, la nasin pi ilo tawa pi ma Setona li nasa mute: nasin tu li kipisi, la ona li sike. nasin ale pi ma tomo ni li sama ni, tan ni: nasin leko li ken pakala e ilo li ken ike.
ni ale li ijo nasa pi ma tomo Setona. taso, ona li pona! ona li pona tawa jan lawa, tawa jan awen, tawa jan lukin. awen pi nasin lawa ni li suli tawa awen pi suwi ma. ma tomo ni li ken sama ma tomo ante ale: ona li ken pali e tomo suli, li ken mama e kulupu esun mute, li ken kama jo e mani mute. taso, jan ale pi ma tomo ni li wile ala e ni. ona li wile awen e suwi ma, e lukin pona.
tan lipu
tan jan Seth Muller. “Building in Sedona: Stricter, Faster” Arizona Daily Sun, tan tenpo suno 17 pi tenpo mun tu tu pi tenpo sike 2004, https://azdailysun.com/building-in-sedona-stricter-faster/article_d80e4830-59de-56c4-bada-423115cfcc06.html. lon tenpo suno 2 pi tenpo mun tu pi tenpo sike 2021.
“Outdoor Lighting Code” City of Sedona Community Development Department, https://static1.squarespace.com/static/57af6be3d1758effdeaacefb/t/5ab98283575d1f04211c14d5/1522107012291/Sedona+AZ+Lighting+Ordinance+copy+2.pdf. lon tenpo suno 3 pi tenpo mun tu pi tenpo sike 2021.
|
This work is licensed under the Creative Commons Attribution-ShareAlike 4.0 International (CC BY-SA 4.0) license.
|