51. Temporario

.1 Christiano: "Alora, esque tu cognosceva dece annos retro, un homine appellate Temporario in tu pais, qui alora esseva un homine multo avantiate in materia de religion?. Sperante: "Si, certo, ille habitava in Singratia, un citate duo millias distante de Honestate, e ille habitava in le casa vicin a Tornaretro.

Christiano: "Justo, ille viveva sub le mesme tecto con ille. Ben, ille homine un vice esseva multo eveliate. Io crede que alora ille habeva un forte conviction de su peccatos, e del consequentias que illos comporta.

.2 Sperante: "Anque io lo crede, proque mi casa esseva solmente a duo millias del sue, e sovente ille veniva a visitar me, e con multe lacrimas. Sincermente io habeva pietate de celle homine, e io non esseva completemente sin sperantia a su reguardo, ma como tu sape, non omnes qui crita Senior, Senior, entrara in le regno del Celos. Christiano: "Ille me diceva un vice que ille esseva resolute a vader in pelegrinage como nos; tosto tamen ille veniva al cognoscentia de un certe Salvasemesme, e alora ille deveniva como un estraniero pro me.

.3 Sperante: "Ora nam nos parla super ille, vamos inquirer un poco in le rationes del preste reversion de ille e del personas qui simila a ille. Christiano: "Isto pote esser profitabile, ma per favor, comencia.

Sperante: "Ben, secundo me il ha tres rationes pro illo.

(a) Benque le conscientia de tal personas habeva essite eveliate, nonobstante isto lor mentes non cambiava: ergo quando le poter del culpa deveni plus debile, cessa alsi lo que les habeva provocate al religion. Assi illes retorna al vias precedente, como nos vide quando un can malade pro haber mangiate un cosa nocive, durante que le maladia lo tormenta, illo vomita le nutrimento indigestibile. Illo non face isto per su libere voluntate (si on pote dicer que le can ha voluntate), ma proque ille nutrimento molesta le stomacho. Quando tamen su maladia cessa, su desiros non es plus frenate per le nausea, proque su stomacho ha essite alleviate, e illo torna lamber lo que antea illo vomitava, e assi se compli lo que es scribite: le can retorna a su proprie vomito [2 Pe 2:25]. Assi, io dice, qui deveni ardente pro le Celo, solmente a causa del sentimento e del timor del Inferno, quando le senso del Inferno e del timor del damnation se calma e se refrigida, se refrigida alsi su desiros pro le Celo e pro le salvation. Il eveni assi que quando le senso de culpa e le timores de iste ha cessate, le desiros que ille habeva del Celo e del felicitate, va alsi morir, e ille retorna al vetule conducta.

(b) Un altere ration es que illes ha timores como de sclavos, le quales domina super illes. Io parla nunc del timores que illes ha pro le homines: Proque le timor del homines es un trappa. Assi, benque illes pare esser ardente pro le Celo, durante que le flammas del Inferno es circa lor aures, quando iste pavor cessava un poco, illes face super isto un secunde pensamento, illo es, que il es bon esser sage e non currer riscos (illes non sape de que), o al minus de non portar se mesme in enoios inevitabile e non necessari; e assi illes recade in le mundo.

(c) Le vergonia que comporta le religion deveni un obstaculo sur lor vias. Illes es orgoliose e arrogante, e le religion in lor oculos es basse e contemnibile; ergo quando illes perde le senso del Inferno e del ira a venir, illes retorna a lor vias precedente.

(d) Le senso del culpa e le meditation del terror es pro illes cosas grave, illes non ama vider lor proprie miseria ante a que illes perveni a illo, ben que le vista de illo, si illes amava celle vista, poterea forsan facer les refugiar a ubi le justes se refugia pro trovar salvation. Proque tamen illes face como io diceva antea, mesmo illes evita le pensamento del culpa e del terror. Ergo, quando illes se disembarassa de lor evelia circa le terror e circa le ira de Deo, illes indura con placer lor cordes, e selige tal vias que les facera indurar ancora plus.

.4 Christiano: "Tu gira solmente circa le subjecto, proque de facto le ration principal es non voler cambiar proprie mente e voluntate. Ergo illes es simile al criminal qui sta ante al judice; ille treme e tremula, e ille pare esser de corde repentite; ma le ration de isto es le timor del condemnation, non le detestation del offensa, como il es evidente, proque illo va dar a iste homine le libertate, e ille continuara esser un fur, e un picaro, ma si su mente esseva vermente cambiate, ille esserea alteremente.

.5 Sperante: "Nunc io te ha monstrate le ration de lor reversion, per favor, monstra me su manieras. Christiano: "De bon corde.

(a) Illes retira lor pensamentos de toto lo que poterea rememorar les de Deo, le morte, e le judicamento a venir.

(b) Pois illes neglige lor deberes private, como le prece, le repression de lor concupiscentias, le vigilantia, pena pro le peccato, e le similes.

(c) Pois illes evita le compania de christianos calorose e vivente.

(d) Post isto, illes deveni frigide verso le deberes public, como audir, leger, le companias pie, e le similes.

(e) Pois illes comencia a criticar illes qui ha le timor de Deo, e diabolicamente illes les maltracta, sub le apparentia de zelo religiose, pro poner in evidentia le debilitates de iste ultimes.

(f) Pois illes comencia adherer e associar se con homines impudic, carnal, e laxe.

(g) Pois illes admitte secretemente discursos carnal e impudic; e illes es felice si illes pote vider tal cosas in personas qui es reputate honeste, a fin que, pro lor exemplo, illes pote devenir plus audaciose in lor mal conducta.

(h) Post isto, illes comencia jocar publicamente con parve peccatos.

(k) Alora, nam illes es indurate, illes se monstra quales illes es vermente. Assi, essente se jectate de novo in le golfo del miseria, excepte un miraculo del gratia les preveni, illes peri pro semper in lor proprie deceptiones.