44. Aversion, le apostata

.1 Ora, quando illes habeva de longe lassate retro Ignorantia, illes entrava in un strata multo obscur, in le qual illes incontrava un homine, le qual habeva essite ligate per septe diabolos con septe forte cordas, e ille esseva per illes trainate verso le porta que ille habeva vidite apud le colle.

.2 In vider isto le bon Christiano comenciava tremular, e assi faceva Sperante, su companion. Ma, durante que le diabolos conduceva via le homine, Christiano ben reguardava in le spero de recognoscer qui iste homine esseva. Si, ille esseva Aversion, le qual habitava in le citate de Apostasia. On non poteva vider ben su visage, proque ille teneva abassate su capite como un fur captate in su delicto. Quando illes habeva passate, Sperante reguardava su dorso, e ille remarcava que sur illo il habeva un papiro con iste inscription: Perverse false christiano, e damnabile apostata.