27. Nove incontro con Evangelista e su premonition

.1 Assi illes procedeva e parlava in re lo que illes habeva vidite durante lor viage. Assi lor cammino deveniva facile, alteremente, sin dubita, illo haberea essite tediose pro illes. Illes de facto nunc transiva per un deserto.

.2 Ora, quando illes esseva quasi al termino del deserto, il occurreva a Fidel de reguardar un poco a retro, e ille percipeva un homine qui les sequeva, e ille le identificava. ``Oh, diceva Fidel a su fratre, ``qui veni nunc?. Alora Christiano respondeva: ``Ille es mi bon amico Evangelista. ``Si, ille es mi bon amico alsi, diceva Fidel, ``nam ille esseva celle qui me adressava al Porta. Nunc Evangelista habeva se avicinate a illes e ille les salutava.

.3 Evangelista: ``Le pace sia con vos, mi car e amate amicos, e pace sia a illes qui adjuta vos. Christiano: ``Benvenita, benvenita, mi bon Evangelista, in vider tu visage io me faceva rememorar tu passate benevolentia e infatigabile preoccupation pro mi eterne ben. Fidel: ``Si, mille vices benvenita; tu compania, oh dulce Evangelista, es multo desiderabile pro nos, povre pelegrinos.

.4 Evangelista: ``Como vos conduceva vos, amicos mie, desde le tempore de nostre ultime incontro? Qui vos incontrava? e como vos comportava vos?. Alora Christiano e Fidel le contava toto lo que les eveniva durante lor viage usque nunc e como e con qual difficultates illes habeva pervenite a iste placia.

.5 Evangelista: ``Io es multo contente, non proque vos incontrava provas, ma proque vos de illos esseva victores, e alsi proque, nonobstante multe debilitate, vos persisteva super iste camino usque nunc. Vermente contente es io de isto, io diceva, pro vos e pro me ipse. De facto io seminava e vos recoltava e le die venira quando e le seminator e le recoltatores jubilara insimul. Si vos ancora persistera, si vos nunquam collabera, a tempore debite vos recoltara. Le corona sta ante vos, e illo es incorruptibile; alora vole ben currer a obtener lo. Alcunos se proponeva obtener iste corona, ma depost un certe cammino, un altere se interponeva e lo prendeva de illes; ergo tene lo firmemente; non va lassar alcuno prender vostre coronas. Vos ancora non sta extra le campo de action del Diabolo; in luctar contra le peccato vos ancora non resisteva usque al sanguine. Lassa le regno permaner ante a vostre oculos, e crede resolutemente a lo que es invisibile. Non permitte a nihil que sta de iste latere del mundo de attrappar vos e, super toto, vigila ben super vostre cordes e super lor concupiscentias, nam illos es fallace plus que qualcunque altere cosa e desperatemente mal. Rende vostre facie dur como un petra; vos ha de vostre parte omne potentia in celo e in terra [Joh 4:36; Gal 6:9; 1 Cor 9:24-27; Apoc 3:3-11].

.6 Alora Christiano le regratiava pro su exhortation, ma illes le diceva alsi que illes haberea ancora desirate su parolas de adjuta durante le resto del viage. In ultra, illes percipeva que ille esseva anque un propheta, le qual pote predicer lo que les evenirea, e como illes poterea resister e vincer los. A iste requesta Evangelista consentiva, e assi Evangelista comenciava dicer le sequente parolas:

.7 Evangelista: ``Filios mie, vos audiva in le parolas verace del Evangelio que vos, pro entrar in le Regno del Celos, debe passar per multe tribulationes. e vos sape assi que in omne citate, ligamines e afflictiones vos expecta. Ergo vos pote previder que tosto o tarde, super vostre cammino, vos ancora incontrara multes de illos. Vos trovava que iste testimonios esseva ver jam durante le strata usque nunc percurrite, e de plus vos incontrara. Como vos vide, vos es quasi al termino de iste deserto, e tosto vos pervenira a in un citate que vos comenciara tosto vider de longe. In celle citate vos essera durmente attaccate per inimicos que essayara omne medio pro occider vos, e sia certe que uno o ambes de vos debera sigillar le testimonio que vos tene, con le proprie sanguine. Sia tamen fidel usque al morte, e le Rege dara vos le corona del vita. Celle qui ibi morira, ben que su morte non essera natural e su dolores forsan grande, habera un sorte melior que su companion, non solmente proque ille habera pervenite plus tosto al Citate Celeste, ma proque ille habera evitate le multe miserias que le altere incontrara durante le resto de su viage. Quando tamen vos habera pervenite al citate, e se realisara lo que io vos prediceva, alora rememora vostre amico e comporta vos como homines, confide le protection de vostre anima a vostre Deo, proque Ille es un Creator fidel.