21. Multe altere meravilias a vider

.1 Le die sequente illas le duceva in un arsenal, in le qual illas le monstrava omne sorta de provisiones a disposition del pelegrinos per le Senior: spadas, scutos, cascos, cuirasses, precarias de omne sorta, e scarpas que nunquam se rumpe. Il habeva bastante de tote isto a provider tante homines pro le servicio del Senior quante stellas il ha in le celo.

.2 Illas le monstrava alcun del objectos per le quales alcun de su servos habeva facte cosas meraviliose. Illas le monstrava le virga de Moses, le martello e le clavos con le quales Jael occideva Sisera, pois le vasos, le trompas e le lampas, con le quales Gedeon repulsava le armeas de Midian. Inde illas le monstrava le stimulo de boves per le qual Shamger occideva sex cento homines. Illas le monstrava in ultra le funda e le petra per le qual David occideva Golia de Gath; e alsi le spada per le qual le Senior occidera le homine del peccato, in le die in le qual ille surgera pro devenir su preda. In ultra illes le monstrava multe cosas excellente, e Christiano esseva multo delectate in vider los. Facte isto, totes de novo retornava a dormir.

.3 Alora io videva in mi sonio que, le proxime matino, ille se levava pro prosequer su cammino, ma illas le exhortava a remaner ibi ancora un die. Illas le diceva: ``Nos te vole monstrar in ultra le Montes Delectabile, proque illo adjungerea ulterior conforto a su anima, nam illos esseva plus proxime al porta desirate que le placia in le qual nunc ille stava. Alora ille consentiva de remaner.

.4 Quando veniva le matino, illas le conduceva al culmine del Casa, e le exhortava reguardar a Sud. Ille lo faceva e ecce, a un grande distantia [Is 3:16,17]: ille videva un multo agradabile pais montaniose, plen de belle forestes, vinias, fructos de omne sorta. Il habeva alsi flores, fontes e aquas ben delectabile a reguardar. Alora ille demandava le nomine de iste pais, e illas respondeva que illo es le Terra de Immanuel.

.5 Illas diceva: ``Illos es commun, proque iste Colle es pro tote le pelegrinos. Quando tu vadera ibi de ibi tu potera vider le Porta del Citate Celeste: illo te essera monstrate per le pastores qui ibi habita.