20. Le documentos del Casa Belle

.1 Assi, le matino, totes se levava, e post alcun ulterior conversation illas le exhortava a non partir ante haber vidite alcun inter le cosas extraordinari de ille placia. Primo illas le duceva in le studio, ubi illas le monstrava le documentos del plus grande antiquitate.

.2 Si io ben rememora mi sonio, illes le monstrava primo le arbore genealogic del Senior del Colle, a demonstrar que ille esseva le Filio del Ancian del Dies, que ille proveniva de un generation eterne. Hic alsi le actos que ille habeva facte esseva ancora plus plenmente registrate, e alsi il habeva hic le nomines del multe centenas de personas que ille habeva prendite a su servicio, como ille les habeva ponite in tal habitationes que ni le longor del dies, ni le decadimento del natura, poteva destruer.

.3 Inde illas le legeva alcun inter le digne actos que alcun de su servos habeva facte, como illes habeva submittite regnos, operate justitia, obtenite promissas, claudite le ore de leones, suffocate le violentia del foco, fugite del talio de spadas, como illes esseva debile e rendite forte, valente in le luctas e como illes habeva repulsate le armeas del inimico [Hebr. 11:33,34].

.4 In ultra illas le legeva un altere parte del documentos del Casa in ubi io esseva monstrate quante bon voluntate habeva le Senior in reciper apud ille, quicunque, si quicunque, mesmo si, in passato, illes le habeva offendite e dispreciate. Hic il habeva alsi multe altere historias, sia antique, sia moderne, insimul a prophetias e predictiones de cosas que certemente se realisara, sia con multe terror e stupefaction del inimicos, sia con multe conforto e consolation del pelegrinos.