17. Le Casa Belle

.1 Durante que Christiano assi lamentava su infelice error, ille levava su oculos e ecce, ille videva ante se un pompose palatio, cuje nomine es Le Belle e illo stava justo al latere del strata.

.2 Assi io videva in mi sonio que ille se hastava e progredeva in le spero de trovar ibi hospitalitate.

.3 In progreder, tamen, ille entrava in un passage multo stricte, le qual esseva a un certe distantia del habitation del portero e, in reguardar attentivemente ante se, ille notava duo leones que barrava le passo. Ora, ille pensava, ecce le periculo que repulsava Diffidentia e Timorose (le leones esseva incatenate, ma, ille non videva le catenas).

.4 Alora ille comenciava haber pavor, e ille jam pensava retroceder e unir se a iste ultimes, nam ille pensava de haber solmente le morte ante se. Le portero al casa, tamen, cuje nomine es Vigilante, in perciper que Christiano se habeva haltate in le attitude de retroceder, ille le critava: ``Esque tu fortia es si parve? [Mc 4:40]. Non time le leones, nam illos es incatenate, e illos es ponite ibi qua proba al fin de discoperir illes qui non ha fortia. Tene te in le medio del via, e nulle mal te essera facite.

.5 Alora io videva que Christiano progredeva, certo tremulante pro pavor del leones, ma prestante attention al direction suggerite per le portero. Ille los audiva rugir, ma illos non le noceva. Alora ille batteva le manos e progredeva usque al porta ubi le portero stava.

.6 Tunc Christiano diceva al portero: ``A qui pertine iste casa? Pote io esser hospitate hic durante iste nocte?. Le portero respondeva: ``Iste Casa esseva edificate per le Senior del Colle, e Ille lo edificava pro le assistentia e securitate del pelegrinos. Le portero le demandava in ultra de ubi ille veniva e a ubi ille vadeva.

.7 Christiano: ``Io veni del Citate de Destruction e io va al Monte Sion; proque, tamen, le sol jam se poneva, io desira, si possibile, albergar hic iste nocte.

Portero: ``Qual es tu nomine?.

Christiano: ``Nunc mi nomine es Christiano; ma un vice mi nomine esseva Sin Gratia; io es del familia de Japhet, que Deo persuadeva habitar in le tentas de Shem [Gen 9:27].

.9 Portero: ``Proque, alora, tu veniva si tarde? Le sol jam se poneva. Christiano: ``Io haberea potite pervenir hic plus tosto, ma, oh me, homine miserabile! Io dormiva in le Refugio que sta sur le latere del colle. Mesmo nonobstante illo, io haberea potite esser hic plus tosto si, durante mi somno, io non perdeva mi testimonio, e io arrivava sin illo al culmine del colle. Ora proque io non lo trovava plus, io esseva fortiate, con grande dolor de mi corde retornar a ille loco ubi io habeva mi somno. Ibi io lo trovava e nunc io sta hic.

.10 Portero: ``Ben, io appellara una ab le virgines de iste placia, le qual, si illa approba tu situation, te portara con le resto del familia, secundo le regulas del casa. Assi Vigilante, le portero, sonava un campana, al sono del qual, un belle e dignitose juvene femina, cuje nomine es Discretion aperiva le porta, demandante le ration de iste appello. Le portero respondeva: ``Iste homine es in viage ab le Citate de Destruction al Monte Sion, ma, proque ille es hic a iste hora e mesmo fatigate, ille me demandava si ille pote remaner hic iste nocte. Assi io le diceva que io te appellarea pro conferer con te e facer con ille lo que te pare bon, secundo le regulas de iste casa.

.11 Alora illa le demandava qui ille esseva e a ubi ille vadeva, e ille la respondeva. Pois illa le demandava in re lo que ille habeva vidite e incontrate durante le cammino, e ille la respondeva, e al fin, illa le demandava su nomine, e ille respondeva: ``Illo es Christiano, e io multo desira esser hospitate hic iste nocte, proque, de lo que io comprende, iste placia esseva edificate per le Senior del Colle pro assister e proteger le pelegrinos.

.12 Alora illa surrideva, ma lacrimas baniava su oculos. Post un breve pausa illa diceva: ``Io appellara duo o tres de plus de mi familia. Assi, illa curreva al porta, e appellava Prudentia, Pietate e Caritate le quales, post un breve ulterior discurso con ille, le dava le benvenita in le familia e diceva: ``Entra, oh benedicte del Senior; iste Casa esseva edificate per le Senior del Colle al fin de intertener tal pelegrinos.