14. Le tres stratas

.1 Illes continuava a camminar usque illes perveniva al pede de un Colle ubi il habeva un fonte. In le mesme placia il habeva alsi duo altere stratas, in ultra a illo que perveniva directemente del Porta Stricte. Un strata volveva al leva, le altere al dextera al fundo del Colle. Le via stricte, tamen, curreva justo sur le Colle, cuje nomine es Difficultate.

.2 Ora Christiano vadeva al fonte e bibeva de illo a refrescar se [Is 49:10] e pois ille comenciava ascender le Colle e diceva: "Iste Colle, ben que alte, io anhela ascender. Io non time le difficultate, proque io sape que ibi es le via del vita. Alora corage! Non time de collaber. Melio un via difficile ma juste, que un via facile que conduce al morte!.

.3 Mesmo le altere duo perveniva al pede del Colle, ma quando illes videva que le Colle esseva scarpate e alte e que il habeva altere duo stratas possibile e supponente que illos se reconjungerea con illo per le qual Christiano habeva passate, le prime vadeva a leva e le secunde a dextera. Le nomine del prime strata esseva Periculo, e le nomine del altere Destruction. Assi uno se dirigeva per le strata nominate Periculo que le portava in un grande silva, e le altere se dirigeva directemente verso Destruction, e se trovava in un vaste terra plen de montanias obscur, ubi ille impingeva e cadeva, e ille non se levava plus.