13. Formalista e Hypocrisia

.1 Durante que ille assi reflecteva, ille videva duo homines qui superpassava le muro del parte leve del strata stricte e illes le flancava durante le cammino. Le nomine del prime esseva Formalista e le nomine del secunde Hypocrisia. Assi, como io diceva, illes se le avicinava e comenciava a colloquer.

.2 Christiano: "Seniores, de ubi veni vos e a ubi vade vos?. Formalista e Hypocrisia: "Nos nasceva in le terra de Vangloria, e va al Monte Sion a reciper laude!.

.3 Christiano: "Proque vos non entrava per le Porta que sta al comenciamento del strata? Esque vos non sape que il es scripte: `Ille qui non entra per le porta ma monta per un altere latere, ille es solmente un fur e un robator'? [Joh 10:1]. Formalista e Hypocrisia: "Illes diceva que transir per le Porta non es commode, proque illo es troppo lontan de nostre pais, e que illes esseva accostumate a prender un via transverse e pois a superpassar le muro, como nos faceva.

.4 Christiano: "Ma esque isto non essera vos considerate qua un transgression contra le Senior del Citate al qual nos es ligate, un violation de Su voluntate revelate? Formalista e Hypocrisia: "In re isto, nostre compatriotas nos diceva que nos non debe inquietar nos, pro que isto ha semper essite nostre costume. Si il essera necessari, nos potera producer testes que pote affirmar que nostre costume es plus vetule que mille annos.

.5 Christiano: "Ma, esque vos potera sustener vostre practica ante le accusationes in le Die del Judicamento?. Formalista e Hypocrisia: "Illes nos diceva que, proque le practica remonta a multe seculos retro, illo essera certemente reputate legal de qualcunque judice impartial. In ultra, illes nos diceva, que importa le maniera per le qual nos entrava? Le cosa le plus importante non es forsan le facto que nos sta sur le juste via? Si nos es intra ... nos es intra. Tu, como nos comprendeva, ha transite per le Porta, nos ha superpassate le muro: esque tu condition es melior que nostre?

.6 Christiano: "Io cammina secundo le regula de mi Senior, vos cammina secundo vostre proprie pensamento e phantasia. Vos es jam considerate fures per le Senior, ergo io dubita que vos essera trovate in le justo al termino de iste strata. Vos ha venite secundo vostre proprie intendimento sin Su direction, e vos exira con vostre proprie gambas sin Su gratia.

.7 Alora io videva que illes continuava sur lor via sin plus multo parlar. Illes addeva que in re leges e commandamentos illes non dubitava de poter los satisfacer tanto quanto Christiano e pois diceva: "Nos non vide qual es le differentia inter te e nos: solmente tu vestimento es differente del nostre. Illo te esseva certemente date per tu vicinos a fin que tu coperiva tu nuditate vergoniose.

.8 Christiano: "Vos non essera salvate per leges e commandamentos [Gal 2:16], nam vos non transiva per le Porta. In ultra, in re le vestimento que io porta, illo me esseva date per le Senior del loco a ubi io vade e certo, como vos diceva, pro coperir mi nuditate vergoniose. Io lo acceptava como un signo de su sollicitude proque io non habeva altero que vetule pannellos. In ultra illo me conforta durante mi viage proque, quando io pervenira al Porta del Citate, le Senior con gaudio me recognoscera, proque io porta le vestimento que Ille me dava, le vestimento que Ille me dava gratis a substituer mi vetule pannellos. Io ha pois un signo sur mi fronte, que probabilemente vos non percipeva, le qual uno inter le plus intime companiones de mi Senior ibi fixava in le die in le qual le fardello cadeva de mi dorso. In fin, io recipeva un rolo sigillate a que in leger lo durante mi viage illo poterea devenir mi consolation. Io esseva anque exhortate a livrar lo al Porta Celeste como signo de mi certe entrata per illo. Io dubita que vos desidera tote iste cosas, e vos non los potera obtener proque vos non entrava per le Porta Stricte.

.9 A iste cosas illes non le dava alcun responsa: illes solmente reguardava le uno al altere e rideva, inde io videva que totes prosequeva le cammino. Christiano, tamen, les precedeva e parlava intra se, suspirante e consolante se in le lectura del rolo que le duo Fulgentes le habeva date.