11. Le Cruce que salva

.1 Ora io videva in mi sonio que le strata per le qual Christiano vadeva, esseva cincte de ambe lateres per un Muro e le nomine de ille muro es Salvation [Is 26:1]. Per iste via ergo le onerate Christiano curreva, ma con grande difficultate a causa del fardello que ille portava sur su dorso.

.2 Assi ille curreva usque a un placia aliquanto scarpate super le qual il habeva un Cruce, e un poco plus in basso, un sepulchro. Assi io videva in mi sonio que justo quando ille habeva pervenite coram le Cruce, le fardello se distaccava de su dorso e cadeva a terra e comenciava rolar per le scarpa del colle usque al bucca del sepulchro, in le qual illo cadeva e io non lo videva plus.

.3 Pro isto Christiano deveniva legier e gaudiose e, con un corde allegre, diceva: "Ille me dava reposo per Su affliction, per Su vita, per Su morte. Alora ille stava immobile un poco, reguardante meraviliate proque il esseva surprendente que solmente reguardar al Cruce le habeva liberate del fardello. Ergo ille reguardava, e reguardava ancora mesmo al puncto que le fontes del aquas de su oculos comenciava effluer e lacrimas rigava su genas [Zach 12:10].

.4 Ora, durante que ille reguardava e lacrimava, ecce tres Fulgentes arrivava e le salutava dicente: "Pace a te! e le prime addeva: "Tu peccatos sia pardonate! [Mc 2:5]. Le secunde le spoliava de su vetule pannellos e le vestiva con un nove vestimento. Le tertie alsi apponeva un signo sur su fronte e ille le dava un rolo con un sigillo sur illo [Zach 3:4; Eph 1:13] e ille le exhortava a conservar lo durante su viage usque al Porta Celeste ubi illo debeva esser consignate. Post isto le tres Fulgentes partiva per lor proprie via.

.5 Alora Christiano faceva tres saltos de gaudio e, in camminar, assi cantava: "Usque hic io veniva onerate con mi peccato, e io non poteva jammais liberar me del dolor que illo me causava, tanto que io perveniva hic. Qual loco meraviliose isto es! Esserea illo le comenciamento de mi beatitude? Hic le fardello cadeva de mi dorso. Hic le cordas que lo ligava se findeva. Oh Cruce benedicte! Oh benedicte Sepulchro! Benedicte sia le homine qui ibi esseva ponite con vergonia pro me.