Jv/Kakawin Nītiśāstra/Pupuh 6

Pupuh VI – Aśwalalita

1.

• sira sang aweh sudāna ri sirang dhanādhipa pasungnya niṣphala tika
• ikanang uwus warĕg sungana bhojanātiśaya niṣphalanya marika
• kadi hudan ing samudra papaḍanya niṣphalanya hilang bañunya mapahit
• ikang upakāra katriṇi taman prayoga paḍa niṣphalāywa tuladĕn

2.

• tan ana sudharma manglĕwihane kasatyan usirĕn tĕkap para-jana
• tan ana kawah mahānglĕwihanerikang mrĕṣa tilarkĕnekang alĕñok
• hyang anala sūrya candra yama bāyu satya sira sakṣyaning tri-bhuwana
• mara nimaskara hyang iśanekanang bhuwana matya satyawacana

3.

• mrĕsa kita ring triyak daśani warṣa pāpa linakonta karing aji
• sama-sama mānuṣeka śata warṣa durgati bhinukti yan mrĕṣa kita
• yadi kita mithya ring widhi sahasra warṣa lawasing kapātaka kita
• guru liniñok-liñok tan ana hinangning tahun ananta-pāpa katĕmu

4.

• lima wilanging mrĕṣeka gawayĕn taman pamuhareka pāpa wangunĕn
• ri sĕḍĕng angutsawāthawa wiwāha-kāla ri karakṣaning wita juga
• athawa muwah karakṣani hurip nanarma masiwo-siwo mrĕṣa kita
• lyana saka ring limeka kawaweng kawah kita tĕkapning aśwalalita

]]