Jv/Kakawin Nītiśāstra/Pupuh 3

Pupuh III – Padmakeśara (Kalĕngĕngan)

1.

• tĕgal tan ananing dukutnya tinilar tĕkap i paśu taman hanānglawad
• nadi tan ana toya suṣka matilar sarasa hiku dumeh paḍâsĕpi
• ikang puruṣa hina dīna kasihan tinilarakĕnikāng warāngganā
• narendra na-parikṣa nirghrĕṇa dumoh balanira matilar manginggati

2.

• surudnikanang artha ring grĕha hilangnya tan ana winawanya yan pĕjah
• ikang mamiḍara swa-wandhu surud ing pamasaran umulih paḍānangis
• gawe hala hajĕng manuntun angiring manuduhakĕn ulah tĕkeng tĕkan
• kalinganika ring dadi wwang i sĕḍĕng hurip angulaha dharma sādhana

3.

• anitya tikanang hurip nwam i wayah kasugihan atilar nda tan sthiti
• ikāng surata sanggameka kadi langgĕng apuhara wiyoga tan lanā
• adharma kalawan sudharma guṇa mūḍa wĕdi-wĕdi kaśūran uttama
• sadārdha hananing śarīra tumuwuh tĕkani pati manūt nda tan hilang

4.

• ikāng dumadi janma rūpa maka bhūṣaṇanika sumilih tĕkeng sabhā
• surūpa maka bhūṣaṇanya kula śuddha piniliha marĕk ri jöng haji
• suwastra maka bhūṣaṇe kula minukya sira tĕka ri mādhyaning sabhā
• suśāstra maka bhūṣaṇa kṣama mahāngrĕsĕpi manahi sang maharddhika

5.

• caturtha pamarikṣaning puruṣa deśa kula guṇa gawenya kawruhi
• suwarṇa pamarikṣa purwa dinadar pinalu hinalubañ cinedana
• pamiḍanani sang mahājana caturtha dhinik inujaran nda tan hade
• piniḍananing artha tan wawa-rĕngön wĕkasan ika dinaṇḍa ring pati

6.

• caturtha wilanging masung suka ri purwaka mamuhara duhka tan hade
• ikang wwang ahutang lawan śrĕgala-maithuna suka ri sĕḍĕng minangkana
• salah-salahanekanang wwang atitu,sṭa wĕkasanika duhka tan hade
• wineh suka sĕḍĕng sinanggama magarbha wĕkasanika duhka tan hade

7.

• kapetanikang artha duhka linakon tan adagang alayar mapet dhatu
• huwus katĕmuning dhanātiśaya duhka hinayam-ayam ing durātmaka
• hilangnikanang artha tan sipi maweh prih-atin alara duhka kāsyasih
• kalīnganikang artha bhājanani duhka tilarakĕna de mahājana

8.

• prayoganikang artha kañcana tulūngakĕna ng alara duhka kāsyasih
• karakṣanikang artha tan hana waneh dana pinaka pagĕr surakṣaka
• wwayāgĕng atiwega tambakana bĕngkungĕn upamaning artha setuha
• tĕmahnika hilang bĕḍah nirawaśeṣa kahili kadawut lajĕrnika

9.

• warāmrĕta mawor lawan wiṣa tang āmrĕta tika ng alapĕn tĕkapnira
• ikāng kanaka len puriṣya mapulang, kanaka juga kapeta kumbahĕn
• gunottama waropadeśa yadi tucca kahananira yogya yan prihĕn
• adhasstha wĕtuning wadhūttama surūpa halapĕnira sang mahājana

10.

• bhaṭāra haricandanātiśaya tisnira lumĕwihi tejaning wulan
• satisnira kinālihan kalĕwihan tĕkapi wacana sang mahārdhika
• ikāng dahana bahni tikṣṇa mapanas lumĕwihi sira tejaning rawi
• panasnira kinālihan kalĕwihan tĕkapi wacananing durātmaka

11.

• swabhāwanikanang lalĕr maharĕping braṇa purihika darpaning kanin
• ikāng wayasa kāka darpa harĕping kunapa midĕring ambarānglayang
• ikāng kujana dadyaning kalaha kahyunika mulat i duhkaning para
• kṣamā mudita kahyuning sujana dharmanira mulata tuṣṭaning para

]]