Jv/Kakawin Nītiśāstra/Pupuh 2

Puh II – wangśapatrapatita

1.

• bhūṣaṇa wastra mukya tĕkaping para jana mamilih
• mukyanikāng bhinojana miñak dwijawara mamilih
• strī gĕmuhing payodhara minukya hinamĕr ing akūng
• śāstra wiśeṣa mukyanira sang muniwara pilihĕn.

2.

• uttamaning dhanolihing amet prih-awak aputĕran
• madhyama ng arthaning bapa kaniṣṭa dhana saking ibu
• niṣṭanikang kaniṣṭa dhana yan saka ring anakĕbi
• uttamaning hinuttama dhanolihing anuku musuh

3.

• dhāna wiśeṣa ring catur upāya kĕnakĕna kabeh
• ring sama bheda daṇḍa tayaning dhana tan ana kĕna
• sang maharĕp musuh catur upāya juga kĕnakĕna
• byakta kasoraning ripu, balanta magalak ing ayun.

4.

• haywa kaciryan ing para yadin hana kinatakutan
• dhairya juga prihĕn galakaning balagaṇa malaga
• tan hawamāna ring ripu musuhta mawuwuh agalak
• bahni manahnirānggĕsĕngi tan hana pangucapira

5.

• nora ‘na mitra manglĕwihane wara-guṇa maruhur
• nora ‘na śatru manglĕwihane gĕlĕng ana ri hati
• nora ‘na sih mahānglĕwihane sihikang atanaya
• nora ‘na śakti daiwa juga śakti tan ana manahĕn

6.

• kokila ring swaranya maka-rūpa kinalĕwihakĕn
• strī maka-rūpa diwya kapatibra linĕwihakĕn
• ring śruti dharma-śāstra guruwaktra kinalĕwihakĕn
• ring kṣama rūpa sang parama paṇḍita linĕwihakĕn

7.

• hemani sang mamukti dumadak tika tan ana guṇa
• yowana rūpawān kula wiśāla tika paḍa hana
• denika tanpa śāstra tan ateja wadana makucĕm
• lwir sĕkaring śami murub abāng tan ana wanginika

8.

• śīla pangawruheng kula sirang sujana panĕngĕran
• ring wara-bhoga puṣ,tining awaknya juga panĕngĕran
• sihning amitra sambhramanikātiśaya panĕngĕran
• ring kṣama len upekṣa sira sang wiku panĕngĕrira

9.

• makṣika śirśa taṇḍasika wiṣyanika tan ana len
• mŗccika pucca buntutika wiṣya katinĕngĕtakĕn
• sarpa ri danta rakwa wiṣa huntunika taya waneh
• durjana sarwa sandhnika wiṣya mamĕpĕk ing awak

10.

• śaktinikāng rare rudita mogha tinulung inamĕr
• mina balanya ring bañu magöng maputĕran adalĕm
• śaktinikāng kagānglayang ing ambara lĕyĕp aruhur
• sang ratu śakti yan pĕpĕk ikāng bala-gana catura

11.

• hinganikāng sayojana salakṣa ḍĕpa widhinika
• yojana hinganing bhahiri-śabda lĕpasika kabeh
• dwādaśa yojananya kupaking gĕlap angawang-awang
• śabdani sang sujāna mĕpĕking bhuwana paḍa ngalĕm

12.

• haywa mamukti sang sujana kaṣṭa piśita tilarĕn
• kaśmalaning śarīra ripu wāhya ri dalĕm aparĕk
• lwirnika kaṣṭa-mangsa musikā śrĕgala wiyung ulā
• krimi kawat makādinika pāpahara hilangakĕn

13.

• haywa maninda ring dwija daridra dumadak atĕmu
• śāstra tininda denira kapātaka tinĕmu magöng
• yan kita ninda ring guru patinta maparĕk atĕmu
• lwirnika wangśa-patra tumibeng watu rĕmĕk apasah

]]