Civilisation e lingua universal/Secunde Parte/Capitulo 14
4. Le CIVILISATION DEL ISLAM
[edit]In le anno 570 p.Cr. nasce Mohammed, fundator del Islam. Como le cristianismo, tamben le Islam contine un componente syriaco-arameic et elementos hellenic. Islam, como le cristianismo, es optime demonstration, que le collapso de Statos Universal prepara le terreno pro le emergentia, le apparition inattendite, de un religion superior.
ISLAM, como le cristianismo, adressa se a omne homines et aspira al conversion del tote mundo. In le stato de lor emergentia, anbes establi se in le quadro de un Stato Universal vicin al collapso. Ambes converte le population del Stato Universal, supervive le collapso del Stato e continua a diffunder se vigorosemente tamben ultra le limites del Stato Universal collapse. Islam obtene rapidemente grande influentia super le arabes barbaric e guida les in le campo del civilisation. Le successores de Mohammed, le CALIFAS, organisa le mohammedanos in potente armeas animate per le zelo religiose. Post quasi un millennio de domination occidental, le mohammedanos reconquire le Proxime e Medie Oriente; pois illes attacca le occidente decadente e conquire Nord-Africa, le Peninsula Iberic, le costa de Languedoc inter le Pireneos e le imbuccatura del Rhodano - plus tarde tamben Sicilia.
Como ja le dinamic akkadianos adoptava le civilisation persian, herede del medo-persian civilisation, le populos de Islam demonstra se como creatores de un civilisation proprie e preciose. Illes construe splendide moscheas e palatios, como le Moschea de Cordoba e le Alhambra de Granada, considerate como supreme obras maestral. BAGHDAD, le capital del CALIFAS, deveni le plus fin urbe del Oriente. Le califas organisa bon governamento. Le arabes developpa un civilisation plus alte que le civilisation occidental, alora decadente. Illes studia le litteratura grec e oriental fin a India, developpa specialmente astronomia, matematica, agronomia e grammatica. In le Peninsula Iberic, le lingua arabe amalgama se con le espaniol. Multe vocabulos arabe deveni currente in Europa; le notiones astronomic 'zenit, nadir, azimut' eveni certemente ex le scientias publicate in lingua arameic; notiones matematic como 'ciffra' 'zero' (= nullo) e le sistema numeral que nos dice arabic, veni de India. Expressiones chimico-farmacologic como alcali, alcohol, safran, sirop, sucro, borax, tassa, mokka etc., appertine al commercio como magazin, doana, varia poco secundo le via, per le qual illes vennit a nos, sia per espaniol, italiano, francese, o per latino medieval; assi 'jupe' e 'gilet' son scripte in modo francese.
Post seculos le occidente cristian supera su crise e contrattacca in le cruciadas in le zona mediterran. In le mesme tempore le Imperio Islamic es attaccate per le mongol nomades central-asiatic. Le situation del Islam deveni critic, ma on succede converter le mongoles al Islam e pois expeller le occidentales, excepte le territorios de Sicilia e del Peninsula Iberic, que retorna al cristian fide e resta al Occidente. Durante le lucta secular Occidente e Islam influe se reciprocamente. Totevia, post le dissolution del Stato Universal Roman, le civilisation occidental era ancora rustic in confronto con le Islam, que era in su grande periodo de floration. In consequentia, ubi le Occidente conquire territorio islamic (Sicilia, Espania), Islam conquire su conquisitores e introduce valores cultural in le vita del cristianitate.
Le sequente attacco del Islam contra le Occidente es lanceate per le successor del Imperio Islamic, le Imperio Ottoman (turc), fundate per le central-asiatic nomades convertite al Islam. Le offensiva turc reconquire le territorios perdite in le cruciadas e usque al bassino del Danubio, e este parte balcanic de Europa remane durante seculos sub le influentia del civilisation e domination islamic.
Pois, le vitalitat occidental prepara un contraattaco grandiose, surprendente e decisive a longe vista. Le Occidente crea le navigation oceanic, occupa non solo le terras virgine de America, ma tamben Oceania, Indonesia, India e Africa tropical, que era terras de mission islamic. Assi, in senso strategic, le Occidente incircula le mundo mohammedan concentricamente et attacca non solo Islam, ma tamben le altere civilisationes supervivente, in un tentativa de occidentalisar le mundo. Como nos va vider in le quarte parte del studio presente, le occidentalisation del mundo es ancora in curso.