Civilisation e lingua universal/Secunde Parte/Capitulo 13

by Stefano Bakonyi

13. Le SPIRITUAL STATO UNIVERSAL: ECCLESIA

In vision historic le religion e le ecclesia cristian es le resutato del incontro inter le civilisationes syriaco-arameic e hellenic, in tanto que omne religiones superior nasce ex le incontro de civilisationes.

Jam in le octave seculo a.Cr. le syriaco-arameic civilisation e lingua produce effectos permanente super le hellenic civilisation e lingua: le alfabeto, le nove codice etic, le sistema de cosmologia e tamben le filosofia stoic veni ex fonte syrico-arameic. Totevia, le cultural e lingual communication inter le due civilisationes era reciproc. Le hellenismo radia verso Syria et al tote Medie Oriente, jam longe tempore ante le conquestas de Alexandro. In le quinte seculo a.Cr. Syria jam importa hellenic ceramicos con inscriptiones e accepta le artistic standardes de Grecia. Tamben le lingua grec Koine veni cognite per le commercio. Este preparation explica le rapiditate, con que le syriaco-arameic civilisation e lingua succumbe al hellenismo e al koine post le militar conquesta per Alexandro. Totevia, le conquesta costava carissimo: Le conquesta material provoca un contra-offensiva spiritual (religiose et ideologic), que produce, poco a poco, le dissolution del civilisation hellenic.

In le epoca post-alexandrin, ideologias syriaco-arameic travesti e disguisa se in veste hellenic. Le stoicismo, per exemplo, es un ideologia apparentate al ideologia del profetas de Juda, presentate in terminos del filosofia hellenic. Le final dissolution del hellenismo es le obra del cristianismo, que recommendava se al hellenes in le veste del filosofia grec, e como tal le hellenes acceptava lo. Le spirito del cristianismo es tanto revolutionari, tanto superior alien al spirito del hellenismo, que e conversion del hellenes al cristianismo conspira e conjura le dissolution del hellenic civilisation. De facto Judea parlante arameico conquiste per le greco-romanos, captura su grecoroman conquisitores in le campo del religion, que es parte nucleari del civilisation. Le mundo grecoroman veni convertite ad un religion de origine arameo-judaic, que remane essentialmente arameo-judaic in su inspiration e principios, nonobstante su compromissos con le hellenismo. Como resultato del conversion le civilisation hellenic (grecoroman) perde su identitat e deveni le grecoroman civilisation cristian.

Le centro del nove civilisation es le Vetere e Nove Testamento de arameo-judaic origine, vestite in greco-koiné. Nostre civilisation occidental es herede del essential tresores del literatura arameo-judaic sacre, e con este literatura veni ad nos multe elementos linguistic.

Le CRISTIANISMO declara, que Deo es patre de omne homines, si que omne homines son fratres; que Deo es amor pur, si que Deo ama omne homines, dunque omne homines debe amar Deo; e este amor debe manifestar se in le amor pur pro omne homines. In su sermon del montania, Cristo proclama le absolute normas moral: amor pur, compassion active, altruismo, servicio spontan, humilitate, non-violentia, honestat e puritate. Cristo demanda de viver secundo tal normas e liberar nos del vitios contrari: odio, non-compassion, avaritia, orgolio, violentia, dishonestat e impuritate. In quanto nos cerca viver secundo le normas e libere del vitios, nos va posseder, poco a poco, un nivello spiritual e moral plus alte e plus felice. Cristo nomina este stato de felicitate le "Regno de Deo", o "Regno del Celo", ma precisa, sin ambiguitate, que le "Regno" es in nos mesme, dunque non es un loco material, ma un stato psichic. Assi, cristianismo promitte un felicitate progressive jam sur terra - pois vita eterne transhuman.

In principio le cristianismo es predicate in lingua arameic, lingua materne de Cristo e del Apostolos, lingua universal del Oriente. Totevia, le arameico era jam in regresso contra le greco koiné. Le discipulos de Cristo, volente conquirer le Occidente, adopta le KOINE como lingua universal del communitate cristian: "Ecclesia", traduce le message de Cristo (le Nove Testamento) in koiné e comencia predicar in greco-koiné. Assi, per koiné illes conquire le parte oriental del Stato Universal Roman.

In contrario, in Italia et in le provincias occidental le LATINO prevale. Le cristianos, volente invader tamben le Occidente, traduce le sacre scripturas in LATINO e predica in latino.

Le altere religiones oriental non poteva presentar le mesme consolation, sperantia, satisfaction moral, spiritual, compania et unitate in pur amor reciproc, que le cristianos del prime seculos offere e imparti. Super toto, cristianismo es de origine proletari. Cristo e le apostolos era ex le populo paupere. Dunque le pauperes, le proletarios, le sclavos, le humiles, le exploitates, le tribulates e illes, qui cercava un melior orientation moral e spiritual, assembla se in le communitate cristian. Durante le secunde seculo del pace universal (del Stato Universal Roman), le cristianismo supera absolutemente omne altere religiones, e forma un nove tipo de societate:

Le ECCLESIA

Ecclesia es, de facto, un specie de STATO UNIVERSAL SPIRITUAL. Le Ecclesia Cristian pretende se mesme - e ancora plus grande - universalitate que le Stato Universal Roman. Le Ecclesia adopta, successivemente, le linguas universal del Statos Universal, in le quales on propaga le cristianismo. Con su expansion le Ecclesia porta con se le lingua universal ad omne populos convertite al cristianismo.

ECCLESIA E STATO

Le locotenente del imperator DIOCLETIANO, GALENO, observa, que le Ecclesia Cristian ha create un organisation hierarchic solidissime, le qual contribue multo al mantenimento del ordine e de bon vicinitate. Con un decreto del anno 311 Galero recognosce le Ecclesia legalmente. CONSTANTINO, successor de Diocletiano, confirma le decreto et eleva le Cristianismo a religion del STATO UNIVERSAL. Assi le Ecclesia deveni tamben institutionalmente un Stato Universal Spiritual. Le successor de Constantino, Juliano (361-363 p.Cr.) refusa le cristianismo e tenta imponer un "hellenistic" religion inventate per ille e su collaboratores. Este religion artificial non supervive a Juliano - in analogia al experimento religiose de Ikhnaton in Egypto. - Religion non pote esser imponite per invention artificial.

Con le DIVISION del Stato Universal Roman, tamben le ECCLESIA divide se. Le Ecclesia Oriental (Ortodoxe)deveni dependente del Stato, con le imperator regnante como capite del Ecclesia. Al contrario, le Ecclesia Occidental (Catolic) developpa se a un organisation completemente independente del Stato. Le Ecclesia cristianisa le barbaros e gania considerabile influentia super illes. Ya, secundo le fide, Cristo ha date al apostolos e lor successores grande poteres spiritual - e le barbaros cristianisate sape lo. Assi, quando le Stato Universal Roman non es plus capace a reprimer le barbaros con le fortia material, le Ecclesia reprime e disciplina les per medio del fortia spiritual. Quando appare un nove invasion barbaric del slavos, le Ecclesia cristianisa e incorpora les in le civilisation cristian.

Le facto, que le prime episcopo de Roma, Sancte Petro, es considerate como le prime successor de Cristo, instaura le episcopo de Roma (le Papa) automticamente como capite del Stato Universal Spiritual - e instaura le de omne fideles.

Un parte del cristianos retira se del occupationes secular, reuni se in communitates spiritual nominate "monasterios" e practica le vita dedicate al diffusion del fide e del cultura general. Per le activitate del monacos, le Ecclesia assume tamben le cura del cultura e del lingua universal. Grande homines, in religion et in cultura general, appare, - como Sancte Augustino. Le monacoscopia le manuscriptos antique, si que illes contribue al conservation del literatura. Le Ecclesia cura tamben le artes et offere le occasion de spiritualisar le arte. Le architectura flora per le construction de templos. Le monacos converte le barbaros nordic al cristianismo e in le mesme tempore, al civilisation del epoca, incluse al uso del lingua universal - parallelmente e mixte con le linguas regional. Assi appare e developpa se le lingus filias del greco-latino: le espaniol, le portuguese, le francese, le catalano, le anglese e le linguas germanic.

Durante le tres seculos obscur inter le dissolution del civilisation hellenic (grecoroman) e le nascentia del civilisation occidental cristian, le Ecclesia, como Stato Universal Spiritual, es custode del valores del civilisation, como un cocon custodia le crisalide, ex le qual de papilion va nascer.