Biblia/Vetule Testamento/Samuel/2 Samuel 24

2 Samuel

24

David proclama un censimento

¹Ancora un vice le furor de Deo ragiava contra Israel: Deo causava David damnificar les per indicer un censimento. Le Senior le diceva: “Vade e enumera le populo de Israel e Juda”. ²Assi le rege diceva a Joab e al commandantes del armea: “Face un censimento de tote le tribos de Israel - ab Dan, in le nord usque a Beersheba in le sud - assi nos potera saper quanto grande es nostre armea”. ³Joab replicava al rege: “Que le senior tu Deo face que, ante le oculos de mi senior le rege, le armea sia cento vices plus large. Ma proque mi domino le rege vole facer isto?". ⁴Tamen, le edicto del rege esseva confimate^[1], nonobstante le objectiones de Joab e del commandantes del armea. Assi illes quitava le presentia del rege e passava in revista le armea israelite.

⁵Primo illes tranversava le fluvio Jordan e se campava in Aroer, a sud del citate in le vallea^[2], in direction de Gad. Pois ille vadeva a Jazer, ⁶e perveniva a Gilead in le terra de Tahim-hodshi in Cades, e veniva a Dan-jaan, pois ab Dan illes verteva se a Sidon. ⁷Inde illes perveniva al fortalessa de Tyro, e tote le citates del Hivitas e del Canaanitas. Finalmente, illes vadeva a sud in Judah, usque a Beersheba. ⁸Percurrite assi le integre pais per novem menses e vinti dies, illes retornava a Jerusalem. ¹⁰Joab reportava assi al rege le numero del guerreros. In Israel il habeva 800.000 habile^[3] guerreros, e in Juda il habeva 500.000 soldatos.

Le judicamento pro le peccato de David

¹⁰Depost haber facite iste censimento, le conscientia de David le faceva sentir in culpa. Assi David diceva al Senior: “Io peccava grandemente in facer isto. Nunc, io te preca, pardona mi culpa, Senior, quia io ageva stultemente”. ¹¹Quando David se levava le matino sequente, le Senior habeva jam parlate a Gad, le propheta, que esseva le vidente de David. Isto esseva su message: ¹²Vade e dice a David: “Isto es lo que dice le Senior: Io te dara tres optiones: selige uno de iste castigamentos, e io te lo infligera”.

³Assi Gad veniva a David e le peteva: “Esque tu seligera tres annos de fame per tote tu pais, tres menses de fuga ab tu adversarios que te persequera, o tres dies de pestilentia in tu pais? Nunc ergo delibera super qual responsa io va dar al Senior que me mandava!”. ¹⁴David replicava a Gad: “Io es in un situation desperate! Ma que nos cade in le manos del Senior, proque su misericordia es grande. Non face me cader in le manos del homines!”.

¹⁵Assi le Senior mandava un pestilentia super Israel ille matino, e illo durava tres dies. Un total de 70.000 personas moriva in tote le pais, ab Dan in le nord usque a Bersheba in le sud. ¹⁶Quando le angelo del morte esseva preste a extender su mano pro destruer Jerusalem, le Senior cedeva e diceva al angelo del morte: “Illo suffice! Arresta te nunc^[4]!” (In ille momento le angelo del Senior esseva juxta le aira de Arauna, le Jebusita).

¹⁷Quando David videva le angelo que destrueva le populo, diceva al Senior: “Io es qui peccava; io ageva iniquemente! Ma iste gente es innocente como oves - que faceva illes? Que se verte, io obsecra, tu mano contra me e contra mi familia^[5]!”.

David erige un altar

¹⁸Assi Gad veniva ad David in ille mesme die e le diceva: “Monta al aira de Arauna le Jebusita e erige ibi un altar pro le Senior”. ¹⁹Alora David montava ibi como Gad le habeva instruite facer, secundo le preceptos del Senior.

²⁰Quando Arauna videva le rege e su servitores que veniva a su incontro, ille exiva e se prosterneva ante le rege con su facie a terra. ²¹Arauna le diceva: “Quare mi senior le rege veniva ad su servitor?”. David le replicava: “Io veniva pro emer de te le eira, assi io potera eriger ibi un altar pro le Senior, a que ille va facer cessar le pestilentia que afflige le populo”. ²²Arauna diceva a David: “Mi senior le rege pote prender gratis quecunque ille desira^[6] e offerer lo. Ecce hic le boves pro le holocausto, e tu pote emplear le lignos pro tribular e le jugos mesme pro alimentar le foco sur le altar. ²³Io, le servitor de mi senior le rege, da tote illo al rege”. Arauna diceva alsi al rege: “Que le senior tu Deo velle acceptar tu sacrificio!”. ²⁴Ma le rege replicava a Arauna: “No, io insiste in emer lo de te, proque io non va offerer holocaustos al Senior mi Deo que me sia costate nihil”. Assi David pagava cinquanta pecias de argento pro le eira e le boves. ²⁵Pois David erigeva ibi un altar pro le Senior e offereva a Deo holocaustos e offertas de pace. E le Senior acceptava le precarias pro le terra e le pestilentia super Israel esseva haltate.

Notas

1. O “le rege insisteva”.
2. O “wadi”.
3. Que poteva manear le gladio.
4. O “abassa tu mano”.
5. Litt. “contra le casa de mi patre”.
6. O “lo que es bon a su oculos”.