Biblia/Vetule Testamento/Reges/1Reges 1

1 Reges

1

Vetulessa de David

¹Le rege David esseva multo vetule e le coperturas de lecto non esseva unquam assatis pro calefacer le. ²Alora su consilieros^[1] le diceva: “Nos debe trovar un juvene virgine pro nostre senior le rege, que le servi, le face compania e que va dormir con ille^[2]. Assi illa potera calefacer nostre senior le rege con su corpore”. ³Igitur, illes cercava per tote le territorio de Israel un belle juvene femina, e trovava Abishag, un Sunamita, e la conduceva al rege. ⁴Illa esseva vermente multo belle; illa deveniva le attendente del rege e le serviva, ma le rege nunquam habeva relationes sexual con illa^[3].

Machinationes de Adonija

⁵Intertanto, Adonija, filio de David e Haggit^[4], promoveva se ipse e se vantava dicente: “Io essera le proxime rege!”. Ille arrangiava de procurar se carros de guerra e cavalleros, e mesmo cinquanta homines pro servir le como guardia regal^[5]. ⁶Ora, su patre nunquam le habeva disciplinate^[6] in su vita o dicite le: “Proque face tu tal cosas?”. Adonija esseva alsi un homine multo belle e nasceva justo post Absalom^[7].

⁷Adonija habeva succedite a persuader Joab, filio de Zeruiah, e le sacerdote Abiathar de sustener su ambitiones. ⁸Del altere latere, le sacerdote Zadok, Benaiah, filio de Jehoiada, le propheta Nathan, Shimei, Rei e le guardia selecte de David non esseva su partisanos. ⁹Adonija organisava un sacrificio de agnos, bestial, e bovellos ingrassiate juxta le lapide de Zohelet apud le fonte de Rogel. Ille habeva invitate pro le occasion tote su fratres, le filios del rege, e tote le gente de distinction in Judea que esseva al servicio del rege. ¹⁰Ma ille non habeva invitate le propheta Nathan, ni Benaiah, ni le le truppa selecte, ni su fratre Salomon.

¹¹Itaque Nathan diceva a Bathsheba, le matre de Salomon: “Esque tu non audiva dicer que Adonija, le filio de Haggith, jam presume devenir rege e David, nostre senior, lo ignora? ¹²Nunc ergo, permitte que io te da alicun consilio in re como salvar tu vita e le vita de tu filio Salomon. ¹³Curre, va visitar le rege David e dice le: ‘Oh Senior, mi rege, esque tu non ha jurate a iste tu serviente: ‘Tu filio Salomon me succedera e se sedera sur mi throno’? Como es il possibile, dunque, que Adonija jam ha le presumption de esser rege?’ ¹⁴E durante que tu parla al rege, io arrivara e confirmara tu parolas”.

¹⁵Itaque Bathsheba vadeva visitar le rege in su quartieros private^[8]. Le rege esseva multo vetule e Abishag, le Sunamita, serviva le. ¹⁶Bathsheba se inclinava ante le rege pro render le homage, e le rege la peteva: “Que desidera tu?”. ¹⁷Illa le respondeva: “Mi senior, tu jurava per le Senior tu Deo a iste tu serviente: ‘Tu filio Salomon me succedera e se sedera sur mi throno’. ¹⁸e ecce, nunc, que Adonija jam presume de esser rege sin que tu, rege e mi senior, sape nihil re illo. ¹⁹Ille offereva un sacrificio de multe bestial, bovellos e oves e pro le occasion ha invitate tote le filios del rege, le sacerdote Abiathar, e Joab, le commandante del armea, ma ille non invitava tu serviente Salomon. ²⁰In iste momento, mi senior, oh rege, le oculos de tote Israel te reguarda e attende che tu annuncia les qui es nominate succeder a mi senior, le rege, sur su throno. ²¹Si un decision non es prendite, quando mi senior le rege vadera reposar con su ancestres^[9], mi filio Salomon e io essera tractate como conspiratores^[10]”.

²²Justo alora, durante que ancora illa parlava al rege, le propheta Nathan entrava. ²³Su arrivata esseva annunciate al rege e le propheta se presentava ante al rege, se prosternava con le fronte usque al pavimento, ²⁴e le diceva: “Rege e senior mie! Esque tu mai diceva que Adonija haberea te succedite e sedite se sur tu throno? ²⁵Proque hodie ille calava e sacrificava multe bestial, bovellos e oves, e invitava tote le filios del rege, le commandante del armea, e Abiathar le sacerdote. In iste momento illes mangia e bibe in su presentia e illes crita: ‘Vivat le rege Adonija^[11]! ²⁶Del altere latere ille non invitava ni me - tu serviente -, ni Zadok le sacerdote, ni Benaiah, filio de Jehoiada, ni tu serviente Salomon. ²⁷Esque mi senior le rege authorisava tote isto sin informar tu serviente in re qui deberea succeder a mi senior le rege sur su throno?”.

David selige Salomon como le proxime rege

²⁸Le responsa del rege David esseva iste: “Manda vocar Bathsheba^[12]!”. Assi, quando illa entrava coram le rege e stava ante le, ²⁹le rege faceva iste juramento: “Pro le vita del Senior, que redimeva mi vita de omne angustia, ³⁰io complira hodie le promissa solemne que te faceva per le Senior, Deo de Israel, quando io diceva: ‘Tu filio Salomon succedera a me e se sedera sur mi throno”. ³¹Bathsheba alora geniculava e se prosternava con la fronte a terra ante le rege e le diceva: “Que mi senior, le rege David, vive per sempre!.

³²Le rege Davis, plus tarde, commandava: “Manda vocar Zadok, le sacerdote, Nathan, le propheta, e Benaiah, filio de Jehoiada”. Quando istes entrava coram le rege, ³³lle les diceva: “Prende con vos le servientes de vostre senior, face montar mi filio Salomon sur mi mulo, e conduce le a Gihon. ³⁴Ibi le sacerdote Zadok e le propheta Nathan le consacrera^[13] rege de Israel; pois face sonar le cornos e crita: “Vivat rege Salomon!”. ³⁵Post illo seque le mentre ille veni e se sede sur mi throno. Ille essera rege in mi placia. Io ha decretate que ille essera soveran super Israel e Judah”. ³⁶Benaiah, filio de Jehoiada respondeva: “Que sia assi! Que le Senior le Deo de mi senior lo confirma! ³⁷Quomodo le Senior esseva con mi senior le rege, assi ille sia con Salomon, e que ille le face ancora plus grande que mi senior, le rege David!”.

³⁸Assi, le sacerdote Zadok, le propheta Nathan, Benaiah, filio de Jehoiada, le Kerethitas e le Pelethitas^[14] descendeva, poneva Salomon sur le mulo del rege David, e le conduceva a Gihon. ³⁹Le sacerdote Zadok prendeva pois del Tabernaculo un corno plen de oleo sancte de oliva e consecrava le rege Salomon versante lo sur su capite; le cornos esseva sonate e tote le populo critava: “Vivat le rege Salomon!”. ⁴⁰Postea tote le populo remontava retro ille. Le gente sonava le flauta e critava de allegressa tanto fortemente que le terra pareva tremular.

Adonija se submitte

⁴¹Ora Adonija e tote su convitatos audiva le ruito de tote ille commotion del populo justo quando terminava lor banchetto. Quando Joab audiva le sono del corno, ille diceva: “Proque il ha un tal commotion in le citate?”. ⁴²Durante que ille parlava, Jonathan, filio del sacerdote Abiathar arrivava. Adonija diceva: “Entra, quia un homine tanto importante como tu non poterea que portar bon novas!”. ⁴³Ma Jonathan le replicava: “No! Nostre senior, le rege David, proclamava rege Salomon! ⁴⁴Le rege ha mandate con ille le sacerdote Zadok, le propheta Nathan, Benaiah filio de Jehoiada, le Kerethita e le Pelethita, e le ha facite montar sur le mulo del rege. ⁴⁵Alora le sacerdote Zadok e le propheta Nathan le consecrava^[15] rege in Gihon, e inde ascendeva con grande enthusiasmo e le citate integre es in grande tumulto: illo esseva le ruito que vos sentiva. ⁴⁶In ultra, Salomon se sedeva sur le throno regal. ⁴⁷Le consilieros regal arrivava e benediceva nostre senior le rege David dicente: ‘Que tu Deo face le nomine de Salomon ancora plus gloriose que le tue, e su regno ancora plus grandiose que le tue!”. Pois le rege, in su lecto, le rendeva homage, ⁴⁸e diceva iste parolas: ‘Le Senior Deo de Israel es digne de laude proque hodie ille ha ponite un successor sur mi throno e me permitteva de vider le”.

⁴⁹Alora tote le convitatos de Adonija esseva colpate de panico: illes se altiava e vadeva cata uno de illes per lor via. ⁵⁰Adonija timeva Salomon e, pro salvar se, curreva tosto a sasir se al angulos^[16] del altar. ⁵¹A Salomon on diceva: “Reguarda, Adonija te time e vadeva sasir se al angulos del altar, dicente: ‘Que hodie Salomon face le promissa solemne que non vadera occider su serviente con le spada’”. ⁵²Salomon replicava: “Si ille se comportara como un subjecto loyal, non mesmo un capillo de su testa le cadera a terra, ma si ille revela se un traitor, ille morira”. ⁵³Rege Salomon inviava assi gente pro facer le descender ab le altar. Ille vadeva assi prosternar se ante le rege Salomon, e Salomon le diceva: “Retorna a tu casa”.

Notas

1. O “servitores”.
2. Let. “in su sino”, “in su brachios”.
3. Let. “nunquam la cognosceva”.
4. Haggit esseva un del uxores de David (2 Samuel 3:4; 2 Chronicas 3:2).
5. Let. “que curreva ante le”.
6. o “nunquam habeva volite contristar le”.
7. Isto non implica que ille habeva le mesme matre de Absalom, que esseva Maacah, non Haggit (2 Samuel 3:4).
8. O “camera de lecto”.
9. O “patres”.
10. O “traditores”.
11. O “que le rege Adonija vive longemente!”
12. Bathsheba quitava le camera quando Nathan arrivava.
13. O “unguera”.
14. Membros del guardia regal de David (cfr. 2 Samuel 8:18). Le Kerethita poterea esser descendente de un gruppo ethnic originari del insula de Creta.
15. O “ungueva”.
16. O “cornos”.