Biblia/Vetule Testamento/Psalmos/Psalmos 95

Psalmos

95. Veni, vamos cantar de gaudio al Senior

Le Psalmista advoca Israel a laudar Deo qua le Creator del mundo e le Protectos del nation, ma ille rememora al populo de non rebellarse a Deo..

¹Veni, vamos cantar de gaudio al Senior; vamos clamar laudes a nostre Protector^[1] que libera nos. ²Vamos acceder a su presentia con actiones de gratia; vamos cantar psalmos pro laudar le. ³Quia Deo es un Senior eminente, un grande Rege superior a omne deos. ⁴Quia in su manos es le profunditates del terra, e le altitudes del montes le pertine alsi. ⁵Sue es le mar, quia ille lo faceva. Su manos formava le terra sic.

⁶Veni, vamos adorar e prosterner nos ante ille, vamos flecter nostre genus ante le Senior, nostre factor, ⁷quia ille es nostre Deo, e nos es le populo que ille pastura, le oves que su mano conduce. Si solmente hodie vos le obediva! ⁸Ille dice: “Non indura vostre cordes, ⁹sicut Israel faceva in Meriba, sicut illes faceva a Massa in le deserto, ubi vostre patres me poneva a proba nonobstante tote le obras que io faceva pro illes. ¹⁰Per quaranta annos ille generation me disgustava, e io diceva: ‘Iste populo desira discamminar se; illes non obedi a mi commandamentos’. ¹¹Assi, in mi ira io faceva un juramento: ‘Illes nunquan entrera in le loco de reposo que io preparava pro illes’”.

Notas

1. Hebr. “al roccose summitate de nostre liberation”.