Biblia/Vetule Testamento/Psalmos/Psalmos 94
Psalmos
[edit]94. Oh Senior, Deo del vindicantia!
[edit]- Le psalmista pete a Deo de condemnar le malfactores e affirma su fiducia in le justitia de Deo.
1Oh Senior, Deo del vindicantia! Oh Deo del vindicantia, revela tu splendor! 2Surge, oh judice del Terra. Da al superbe lo que illes merita. 3Usque a quando, oh Senior, usque a quando al peccatores essera permittite de exultar[1]? 4Illes lancea menacias e parla con attitude defiante; omne illes se gloria de lor iniquitates. 5Oh Senior, illes fulla tu populo; illes opprime le nation que te pertine. 6Illes occide le viduas e le estranieros, e illes assassina le orphanos. 7Illes dice alsi: “Le Senior non vide lo que nos face; de facto, al Deo de Jacob isto non importa!”.
8Prende nota de isto, vos populo insipiente. E vos stultos, quando vos comprendera? 9Esque ille qui faceva le aures human non pote audir? Esque ille qui formava le oculos non pote vider? 10Esque ille qui disciplina le nationes non inflige punitiones? Qui doce le scientia[2] al homines, si non Deo? 11Le Senior sape que le cogitationes human es sin valor[3]!
12Beate es le homine, quem tu erudi, oh Senior, le persona al qual tu doce tu leges. 13Solmente isto pote mitigar le tempores de affliction usque le momento in le qual le peccatores essera destruite. 14Quia le Senior certemente non repelle su populo; ille non derelinquera le nation que le pertine. 15Le justitia prevalera e qui es moralmente recte essera vindicate.
16Qui surgera pro proteger me contra le malfactores? Qui stara pro me adverso le malfactores? 17Si le Senior non habeva adjuvate, io tosto haberea habitate in le silentio del tumba. 18Io clamava: “Mi pedes glissa!”, ma tu misericordia, Senior, me susteneva. 19In le multitude del sollicitudes de mi corde, tu consolationes allegrava mi anima.
20Poterea rectores cruel pretender que Deo es de lor latere - rectores cuje decretos permitte injustitias? 21Illes conspira contra le vita del justos e condemna a morte le innocente. 22Ma le Senior es le fortalessa que me protege; mi Deo es le rocca solide sur le qual io me refugia. 23Ille les repagara pro lor iniquitates. Ille les destruera propter lor peccatos. 24Le Senior nostre Deo les destruera.