Le Proverbios

Capitulo 29

¹Qui obstinatemente refusa acceptar reproches, subito essera destruite sin remedio.

²Quando le justos deveni numerose, le vulgo se allegra, ma quando le impios governa, le populo geme.

³Le persona qui ama le sapientia allegra su patre e su matre, ma quicunque se associa con prostitutas dilapida su substantias.

⁴Un rege juste da stabilitate a su nation, ma qui accepta offertas a scopo de corruption^[1] lo destrue.

⁵Qui blandi su amicos pone un trappa pro lor pedes.

⁶Personas inique es trappate in lor peccatos, ma le personas juste pote cantar e allegrar se.

⁷Le persona juste defende le causa del pauperes, ma le impios non comprehende le importantia de tal necessitate.

⁸Irrisores pote poner in agitation un citate integre, ma personas sage averte le furor.

⁹Quando un persona sage contende in judicio con un persona stulte, il habera diatribas e ridiculo, ma nulle satisfaction.

¹⁰Personas sanguinari odia qui es moralmente integre, ma le justos quere adjutar le.

¹¹Le stultos da libere curso a lor ira, ma le personas sage lo retene.

¹²Governantes qui presta attention a mentitores, tote su ministros essera impie.

¹³Le personas paupere e le oppressores ha isto in commun: le Senior illumina le oculos de ambes.

¹⁴Si un rege judica le pauperes in veritate, su throno essera establite pro semper.

¹⁵Le virga del correction imparti sapientia, ma un puero que es lassate facer tote lo que ille vole porta vergonia a su matre.

¹⁶Quando le impios se multiplica, anque actos scelerate se multiplica, ma le justos videra lor ruina.

¹⁷Disciplina tu filios e illes te dara pace del mente e rendera contente tu corde.

¹⁸Quando il non ha visiones prophetic le populo se libera del restrictiones, ma quicunque observa le Lege es gaudiose^[2].

¹⁹Solmente parolas non pote disciplinar un servitor; parolas pote esser comprendite ma illos non es ascoltate.

²⁰Esque tu videva un persona veloce a parlar? Il ha plus sperantia pro un persona insipente que pro ille.

²¹Un servitor tractate desde su infantia con indulgentia excessive devenira un rebelle.

²²Un persona irascibile provoca solmente dissentiones: qui es facile al ira committe omne sortas de peccatos.

²³Un persona superbe tosto essera humiliate, durante que le humilitate comporta honor.

²⁴Qui adjuta un fur, solmente facera mal a se mesme; ille audi le juramento a testificar, ma non parla.

²⁵Timer le homines es un trappa periculose, ma quicunque spera in le Senior essera exaltate.

²⁶Multes quere le favor de rectores, ma le justitia proveni del Senior.

²⁷Le justos ha in abomination le impios, e le impios ha in abomination le justos^[3].