Michea

4

Le futur regno del Senior

¹In le dies futur, le Monte del Templo del Senior essera le monte le plus importante de omnes. Illo essera plus prominente que le altere colles. Populos affluera a illo. ²Multe nationes venira dicente: “Veni, ascende al Monte del Senior, al Templo del Deo de Jacobo. Ibi ille docera nos su vias e nos ambulara in su semitas. Quia de Sion procedera le Lege, e le Parola del Senior de Jerusalem. ³Ille arbitrara^[1] inter multe populos e componera contentiones inter multe nationes distante. Illes forgiara lor gladios in aratros e lor lanceas in cisorios de verdieros. Nationes non empleara plus armas adverso altere nationes e non plus exercitara se al belligerentia. ⁴Cata uno sedera subtus su vite o subtus su proprie fichiero quia il non habera plus nihil a timer. Le Senior del universo ha facite iste promissa! ⁵Quanquam le nationes circa nos seque lor idolos^[2], nos sequera le Senior nostre Deo pro semper.

Le restauration consequera le crise

⁶“In celle tempore,” dice le Senior, “io congregara le claudicantes, colligera illes que esseva exiliate e illes qui io affligeva. ⁷Le debiles supervivera como un residuo; illes que esseva exiliate devenira un forte nation. Le Senior regnara super illos sur le monte Sion, de ille die usque in eterno. ⁸E tu, turre del grege^[3], fortalessa del filia de Sion, tu dominio anterior essera restablite, le soveranitate que pertine al Filia de Jerusalem”. ⁹Jerusalem, quare clama tu nunc con tal grande clamor? Esque tu non ha alcun rege pro ducer te? Esque tu sage rectores periva? Esque isto es le ration proque te sasiva forte dolores sicut un parturiente? ¹⁰Contorque te e geme, Filia de Sion, como un parturiente! Quia tu quitara le citate e habitara in le campos. Tu vadera a Babylonia, ma de ibi tu essera salvate. Ibi le Senior te liberara ex le manos de tu inimicos. ¹¹Multe nationes nunc se congregava contra te. Illos dice: “Jerusalem debe esser profanate, ut nos pote contemplar con satisfaction le ruina de Sion!”. ¹²Illes, tamen, non sape lo que le Senior cogita e non comprende su propositos. Ille les congregava como fasces de frumento a vannar in le aira. ¹³Surge e tribula, oh Filia de Sion! Quia io te dara cornos de ferro; io te dara ungulas de bronzo, e tu fullara multe populos. Tu consecrara al Senior le spolias que tu sasi de illos e dedicara lor ricchessas al Domino soveran del Terra integre.

Notas

↑ “judicara”.
↑ O “deos”.
↑ Migdal-Eder.

[1] “judicara”.

[2] O “deos”.

[3] Migdal-Eder.

[1]

[2]

[3]