Biblia/Nove Testamento/Timotheo/2Timotheo 1

Secunde epistola a Timotheo

Capitulo 1

Salutation

¹Paulo, apostolo de Christo Jesus per voluntate de Deo, secundo le promissa de vita in Christo Jesus, ²a Timotheo mi car filio. Gratia, misericordia, e pace de Deo le Patre e Christo Jesus nostre Senior.

Action de gratia e appunctamento de Timotheo

³Io exprime mi recognoscentia a Deo - que io serve con un clar conscientia como faceva alsi mi ancestres - quando io te rememora in mi preces; io lo face nocte e jorno! ⁴Quando io rememora tu lacrimas, io desidera ardentemente vider te, de sorta que io sia plenate de gaudio. ⁵Io rememora tu fide sincer, que alsi esseva in tu granmatre Loide e in tu matre Eunice, e io es certe^[1] que illo es anque in te.

⁶Pro iste ration, io te rememora de revivificar le dono de Deo que tu possede per le imposition de mi manos. ⁷Pois que Deo non dava a nos un spirito de timiditate, ma de potentia, amor, e disciplina^[2]. ⁸Non avergoniar te del testimonio de nostre Senior o de me, un prisionero pro amor de ille^[3], ma per le potentia del Senior, accepta tu portion de suffrentias^[4] pro le evangelio. ⁹Ille salvava nos e vocava nos per un sancte vocation, non a causa^[5] de nostre obras, ma secundo su proposito ipse e le gratia que ille concedeva nos in Christo Jesus desde le eternitate^[6]. ¹⁰Su gratia essera ora manifestate per le apparition de nostre Salvator Jesus Christo. Ille frangeva le potentia del morte^[7] e portava al lumine le vita e le immortalitate per le medio del evangelio! ¹¹De iste evangelio, io esseva appunctate predicator, apostolo, e maestro. ¹²A causa de isto, de facto, io me trova in suffrentias^[8]. Io, tamen, non me avergonia de illos, pois que io cognosce ille^[9] in le qual io poneva mi fiducia^[10] e io sape que ille pote proteger^[11] lo que me esseva confidite usque a ille die^[12].

¹³Seque le modello^[13] del san parolas que tu audiva de me e face assi con le fide e le amor que es in Christo Jesus. ¹⁴Protege le cosas bon^[14] que te esseva confidite mediante le Spirito Sancte qui vive in nos.

¹⁵Tu sape que omnes in le provincia de Asia me abandonava, includite Phygelo e Hermogene. ¹⁶Que le Senior concede misericordia al familia de Onesiphoro, proque ille sovente me ha consolate e non se avergoniava de mi imprisionamento^[15]. ¹⁷Al contrario, quando ille veniva a Roma, ille me cercava ardorosemente e me trovava. ¹⁸Que le Senior le concede trovar misericordia apud se ipse^[16] in ille die! E tu sape multo ben in quante manieras ille me serviva in Epheso.

Notas

1. O “persuadite”.
2. O “correction”.
3. O “que es in catenas pro ille”.
4. O “suffre difficultates insimul” (con me).
5. O “non fundate”.
6. O “ante que le tempore mesme comenciava”, “ante le tempores eterne”.
7. O “destrueva le morte”.
8. O “io suffre iste cosas”.
9. O “io sape in qui io ha credite”.
10. O “in le qual io ha credite”.
11. O “custodiar”.
12. Le die in le qual Paulo se presentara ante Christo a dar conto de lo que le esseva confidite.
13. O “forma”, “standard”.
14. O “le bon deposito”, illo es le veritate del evangelio.
15. O “mi catenas”.
16. O “Apud le Senior”.