Biblia/Nove Testamento/Marco/Marco 6

Marco

6

Jesus repulsate de Nazareth

¹Ora Jesus quitava ille parte del pais e retornava con su discipulos a Nazareth, su patria. ²Le sabbato sequente ille incipeva docer in le synagoga, e multes qui le audiva se stupefaceva e diceva: “Unde prendeva ille tote iste sapientia e le poter de operar tal miraculos?”. ³Illes alsi le derideva e diceva: “Ille es solmente un carpentero, le filio de Maria e le fratre de Jacobo, Joseph, Judas, e Simon. E su sorores vive justo hic inter nos”. Illes esseva multo scandalisate e refusava de creder a ille^[1]. ⁴Igitur Jesus les diceva: “Un propheta es honorate ubicunque excepte in su patria e inter su parentes e su proprie familia”. ⁵E, propter lor incredulitate, ibi Jesus non poteva facer miraculos, excepte poner su manos sur alicun personas malate e resanar les. ⁶Jesus esseva stupefacite de lor incredulitate.

Jesus commissiona le Dece-duo

Deinde Jesus vadeva ab village a village docente le populo. ⁷E ille convocava su dece-duo discipulos e incipeva mandar les duo a duo, e les dava potestate super le spiritos immunde. ⁸Ille les instrueva de prender nihil con se pro le viage nisi un canna - nulle pan, nulle bursa, e nulle moneta^[2]. ⁹Ille les permitteva de portar sandalia, ma non prender un cambio de vestimentos. ¹⁰Ille les diceva: “Ubicunque vos vade, remane in le mesme domo donec vos quita le urbe. ¹¹Si, tamen, in qualcunque placia, le gente refusa de dar vos le benvenita o de audir vos, soccute lor pulvere de vostre pedes pro monstrar^[3] que vos ha abandonate ille gente a lor proprie destino”. ¹²Assi le discipulos exiva, dicente a tote le personas que illes incontrava de repenter se de lor peccatos e volver se a Deo^[4]. ¹³E illes expelleva multe demones e resanava multe malades, unguente les de oleo de oliva.

Le morte de Johannes le baptisator

¹⁴Ora, Rege Herode audiva re Jesus, quia omnes parlava de ille^[5]. Alcunos diceva: “Iste homine debe esser Johannes le baptisator qui resurgeva ab le mortos. Isto es le ration proque ille pote facer tal miraculos”. ¹⁵Alteres diceva: “Ille es le propheta Elia”. Ancora alteres diceva: “Ille es un propheta simile a altere magne prophetas del passato”. ¹⁶Quando, tamen, Herode audiva isto, ille diceva: “Johannes, qui io ha facite decapitar, ha retornate^[6] ab le mortos!”. ¹⁷De facto, Herode mesme habeva mandate milites pro arrestar e imprisionar Johannes qua un favor rendite a Herodiade. Illa habeva essite le uxor de su fratre Philippo, ma Herode se habeva maritate con illa. ¹⁸Johannes habeva repetitemente dicite a Herode: “Il es un infraction del lege de Deo prender pro te le uxor de tu fratre”. ¹⁹Il es pro iste ration que Herodiade habeva multe despecto contra Johannes e le voleva occider. Sin le approbation de Herode tamen, illa non poteva facer alco, ²⁰quia Herode habeva timor de Johannes e le protegeva, durante que ille sapeva que Johannes esseva un homine juste e sancte. Quando, de facto Herode le audiva parlar ille esseva multo disconcertate, ma, nonobstante ille esseva fascinate in audir su discursos. ²¹Le opportunitate veniva pro Herodiade in occasion del die natal de Herode, quando esseva organisate un banchetto pro ille e su officieros de corte, commandantes militar e personas eminente de Galilea. ²²Alora su filia, cuje nomine esseva alsi Herodiade, entrava e faceva un dansa que grandemente placeva a Herode e a su convitatos. Le rege diceva al puera: “Pete me quecunque tu amarea haber e io te lo dara”. ²³Ille mesmo faceva un juramento: “Quecunque tu petera io te lo dara, mesmo le medietate de mi regno!”. ²⁴Assi illa exiva e demandava a su matre: “Que deberea io peter?”. Su matre la respondeva: “Pete le capite de Johannes le baptisator!”. ²⁵Subito illa se hastava retornar al rege e le faceva iste requesta: “Io vole le capite de Johannes le baptisator hic e nunc sur un platto!”. ²⁶Le rege esseva multo contristate de un tal requesta, ma ille non voleva refusar lo propter su juramento e su convitatos. ²⁷Assi le rege immediatemente mandava un carnifice al prision pro taliar le capite de Johannes e portar lo a ille. Le milite decapitava Johannes in le prision, ²⁸portava su capite sur un platto, lo dava al puera, e le puera lo portava a su matre. ²⁹Quando le discipulos de Johannes audiva re lo que il habeva occurrite, illes veniva prender su corpore e lo inhumava in un tumba.

Jesus nutre cinque milles personas

³⁰Tunc le apostolos conveniva a Jesus e le contava tote lo que illes habeva facite e docite. ³¹Deinde Jesus les diceva: “Veni con me, vos solmente, a in un loco quiete^[7] e reposa un poco”. Ille les diceva isto proque il habeva tot personas qui veniva e vadeva e Jesus e su apostolos non habeva mesmo spatio^[8] pro mangiar. ³²Assi illes quitava con un barca e vadeva illes solmente in un loco quiete. ³³Multes, tamen, les videva quitar e les recognosceva, e se hastava a pede ab omne urbes e perveniva ibi avante illes. ³⁴Jesus videva ille grande turba e habeva compassion de illo, quia le turba esseva sicut oves que non ha pastor. Alora ille incipeva docer les multe cosas.

³⁵Plus tarde in le postmeridie, su discipulos le accedeva e le diceva: “Iste loco es isolate^[9] e il es jam multo tarde. ³⁶Dimitte le turba, ut illes vade a in le campanias e villages circumstante a emer alique pro illes a mangiar”. ³⁷Jesus, tamen, respondente, les diceva: “Vos ipse da les a mangiar!”. E illes le replicava: “Deberea nos vader emer alimentos pro tote ille turba? Isto costarea nos al minus 200 monetas de argento!”. ³⁸Illes les diceva: “Quante panes vos ha? Va e vide”. Quando illes lo faceva, illes diceva: “Cinque - e duo pisces”. ³⁹Deinde Jesus diceva a su discipulos de facer seder le turba sur le herba verde. ⁴⁰Assi omnes se sedeva in gruppos de cento e de cinquanta. ⁴¹Jesus prendeva le cinque panes e le duo pisces e, reguardante al celo, los benediceva e frangeva le panes. Ille los dava a su discipulos a que illes los distribueva al gente. Ille alsi divideva le duo pisces inter tote illes. ⁴²Assi omnes mangiava e esseva satisfacite. ⁴³Illes colligeva le fragmentos e le pisces restante, e con illos se impleva dece-duo corbes. ⁴⁴Illes qui mangiava tal panes esseva cinque milles homines.

Jesus ambula sur le aqua

⁴⁵Immediatemente post isto, Jesus faceva montar su discipulos in le barca pro vader al altere latere del laco, a Bethsaida, durante que Jesus haberea dimittite le populo. ⁴⁶De post dimittite les, Jesus vadeva sol sur le colles a precar. ⁴⁷Quando veniva le vespere, le barca con su discipulos esseva in le medio del laco e Jesus habeva remanite sol a terra. ⁴⁸Ille les videva effortiante se remar, quia le vento les esseva contrari. Il esseva tres horas del nocte, e Jesus veniva ad illes ambulante sur le mar, e pareva voler passar preter les. ⁴⁹Quando illes le vedeva ambular sur le aqua, illes pensava tractar se de un phantasma e incipeva critar ⁵⁰quia tote illes le habeva vidite. Immediatemente, tamen, ille les diceva: “Habe corage! il es io! Non habe pavor!”. ⁵¹Deinde ille montava in le barca con illes, e le vento cessava. Illes esseva disconcertate, ⁵²proque illes non habeva comprendite le signification del miraculo del panes: lor cordes esseva indurate.

⁵³Post haber transversate le laco, illes perveniva a Gennesaret e anchorava ibi. ⁵⁴In descender del barca, le gente immediatemente recognosceva Jesus. ⁵⁵Turbas accurreva per tote ille region e incipeva portar malades sur mattas a in ubique illes audiva que Jesus se trovava. ⁵⁶Ubicunque illes vadeva - in villages, urbes, o in le campania - illes haberea ponite le malades in placias de mercato. Illes le precava de permitter a lor malades mesmo solmente tanger le fimbria de su vestimento, e tote les qui le tangeva esseva sanate.

Notas

1. O “illes esseva scandalisate”.
2. Le texto specifica “in lor cincturas”.
3. O “qua testimonio”.
4. O “facer repententia”.
5. O “quia le nomine de Jesus habeva devenite cognoscite”.
6. O “resurgeva”.
7. O “deserte”.
8. O “tempore”.
9. O “deserte”.