Allgemeines plattdeutsches Volksbuch/Dei witt Junfer

O, Maurer, wat satt up dei Brügge? O, leiwste Dochter min,
Dat ward woll Keine anners as dei witt Junfer sien.

Da hare mal ein Mäten up disse Brügge stahn;
Da güngen vel Lüde äwer, dat Mäten wull nich gahn.

„Dat mag so lange duren, so lang dat duren mag,
Un süll ick up em täuwen bet an den jüngsten Dag.“

„O, Mäume, segg, min Brügam, wo lange blift hei ut?“
„„Hei is in 't Welschland trocken, namm sick ne anne Brut.““

Sei güng doch nich na Huse; wo 't deipste Water flot,
Da fünnen sei am Morgen dat Mäten, dat was dod.

Sei mütt nu alle Nachten upp dei Brügge späuken gahn;
Den Späuk sehgst du hüt Abend woll up dei Brügge stahn.

O, Maurer, hu, mi gruget! Mi steiht kein Brügam an!
O Kind, wer keinen Brügam will, dei krigt ok keinen Mann.