Alla festa da chaunt a Ponte
Alla festa da chaunt a Ponte.
Chantunzs, il scruosch della lavina,
Chi tuna tres il laviner,
Ais d'prümavaira vusch divina
Chi ans invid' a dutsch chanter.
Da liberted chanzun sublima
Rimbomba tres ils munts e val,
In dschand in püra, libra rima,
»L'Engiadinais non ais vasal!«
Dels munts otissems la coruna
All' estra terra clarna cler:
»Il liber dret co tschainta, truna
E sainza macla voul rester!«
Del vent la mistic' armonia,
Chi tres ils pins suschura bain,
Ans disch: »O resta vossa lia
»Adüna verda, sco convain!«
»Pêsch!« ans acclama l'uond' azzura
Da noss bels lejs in sun contschaint;
»Cha ogniün pel bön lavura
Ed ogniün saro containt!«
»Fermezz' in ogni evenienza!«
L'antic granit favell' a nus;
»Immacoled' indipendenza,
Virtüd conserva löng tiers vus!«
L'ovel suot vusch a violetta
Suschura pleds d'etern' amur,
Sorria sco staila quell' ümletta,
Tratt' aint in abit da candur.
Dal spelm grischaint cascata crouda
E ravaschia fo tres il god;
Ün inno d'glori' intuorn ün oda
E glüsch inuonda plaun ed ot.
La liberted, la prümavaira,
Ün chaunt sublim d'eterna fé,
Infuond' in nus leidezza vaira;
Ün ais beo containt usche.
L'immens creo ais armonia,
Cha cour sensibel so chapir;
Natür' inter' ais poesia,
La vusch da Dieu ais sieu respir.
La vusch eterna d'la natüra
As masd' al chaunt da vus, mieus chers,
Da nus slontauna l'ora s-chüra,
Fadias, led, dolur, pissers!
Chantunzs, chantunzas, ün' evviva,
acceptè, d'ün cour amih,
A tuots dunains leidezza viva
E bain custaivel fais quaist di!
Evviva, viva, l'armonia
Darcho s'unesch' in vair plaschair:
»A bun ans vair! Brajed' amia!
Eau's di: »Mieus chers, a bun ans vair!«
2 Gün 1879.