სიმარტოვე

სიმარტოვე ავტორი: ტერენტი გრანელი

იმედი ასე გაქრა,
დავრჩი სრულიად მარტო.
დაო, არ ვიცი რა ვქნა,
დაო, შენ ჩემზე დარდობ.

ისიც გაქრა, ვინც მწამდა,
დავრჩი სრულიად მარტო.
დაო, ვერ ვუძლებ ზამთარს,
ისევ გაზაფხულს ვნატრობ.

და მიღალატა ყველამ,
დავრჩი სრულიად მარტო.
ეს ღამე მიდის ნელა
და მე გაზაფხულს ვნატრობ.

და ვიღუპები აგრე,
დავრჩი სრულიად მარტო.
სხვა იმედები გაქრნენ,
მხოლოდ გაზაფხულს ვნატრობ.

რესურსები ინტერნეტში

• მამარდაშვილის ციფრული ბიბლიოთეკა