یہ تو سچ ہے کہ صفیؔ کی نہیں نیت اچھی
یہ تو سچ ہے کہ صفیؔ کی نہیں نیت اچھی
ہاں مگر پائی ہے ظالم نے طبیعت اچھی
کیا ہوا آپ نے پائی ہے جو صورت اچھی
آدمی وہ ہے کہ جس کی ہو طبیعت اچھی
آج وہ پوچھنے آئے ہیں ہمارا مطلب
سن لیا تھا کہیں مطلب کی محبت اچھی
خوب صورت ہے وہی جس پہ زمانہ ریجھے
یوں تو ہر ایک کو ہے اپنی ہی صورت اچھی
کچھ بھی ہو ایک تمنا تو بندھی رہتی ہے
تجھ سے سو درجہ ترے ملنے کی حسرت اچھی
نہیں اپنے میں کوئی چاہنے والا تیرا
ڈال دی ڈالنے والوں نے عداوت اچھی
کوئی ارمان نہیں ہے تو فقط بیتابی
وصل سے تیرے ستم گر تری فرقت اچھی
ان کے آتے ہی بدل جاتے ہیں تیرے تیور
اے صفیؔ چاہیے انسان کی نیت اچھی
|
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author. | 
|