دل سے پوچھا تو کہاں ہے تو کہا تجھ کو کیا
دل سے پوچھا تو کہاں ہے تو کہا تجھ کو کیا
کس کی زلفوں میں نہاں ہے تو کہا تجھ کو کیا
چشم گریاں سے شب وصل میں پوچھا میں نے
اب تو کیوں اشک فشاں ہے تو کہا تجھ کو کیا
جب کہا میں نے کہ نیں بولتے ہو گالی بن
جان یہ کون زباں ہے تو کہا تجھ کو کیا
کہنے لاگا دل گم گشتہ ترا ہے مجھ پاس
جب کہا میں نے کہاں ہے تو کہا تجھ کو کیا
جب کہا میں نے کہ اے جان تری صورت پر
شیفتہ پیر و جواں ہے تو کہا تجھ کو کیا
جب کہا میں نے کہ اے سرو ریاض خوبی
کس کا تو آفت جاں ہے تو کہا تجھ کو کیا
دل سے بیدارؔ نے پوچھا کہ ترے سینے پر
کس کے ناوک کا نشاں ہے تو کہا تجھ کو کیا
|
This work was published before January 1, 1929, and is in the public domain worldwide because the author died at least 100 years ago. |