Якстере теште/1924/26/Промкось ёфтасы эсь валозо
| Якстере теште. Еженедельный орган Мордовской секции при Ц. К. Р. К. П. (б.). — № 26, 1 сентября 1924 г. — с. 1 |
[ 1 ]
| Промкось ёфтасы эсь валозо. |
Недлянь трокс 7 сентября Московов прумить эрзянь мокшонь тонафтыцят, учителть. Сынст икеле ащить ламо покш тевть, конатнэнь кувалт сынянст сави ефтамс эсист валост. Минь весе лия вишкине нациятнэде кадовинек пек удалов.
Саемс чуваштнэнь эли марицтнэнь. Сынст умок уш школаваст тонафтыть пакшатнэнь эйсэ эсист кельсэ. Революциядо икеле вишкине нациятнэнь татардо башка киндяк эсист кельсэ арасельть а кинигат, а газет. Сынст ламо улить учебникест, школаваст улить сынсист учителест. Минек ютксо тевесь ащи лиякс. Эрзятнэнь ютксо те шкамс (те порас) улить ощо истят превтеме ломанть, конатне молить эсинек кельсэ тонафтуманть карчо. Прумксонтень эряви превс совавтомс истят ломатнень. Тень кувалт эряви ефтамс эсь покш валозо.
Арась минек эрзя-мокшотнэнь ютксо лац кортамот се тевенть маро як-зняро иеть (год) эрзянь-мокшонь пакшатнэнь (эйкакшнэнь) эряви тонафтомо сынсист кельсэ. Веенст мерить вейке ие, лият кортыть кавто. Конатнэнь превсэ эрзянь кельсэ паро ды полезна маряви тонафтомо васенце ступенень школатнэнь эзга. Омбонст мерить эсинек келенть а эряви кадомс омбоце ступенень школатнэнь эзга як. Истят сякой кортамотне прумксонть маро прядовить. Прумксось ней ефтасазо эсь валонзо зняро иеть эрзянь школатнэва эряви тонафтомс эрзянь кельсэ.
Минек велть пек берярнстэ ащи тевесь учебниктнэнь марто. Эрзянь кельсэ улить анцяк кавто учебникт-букварь „Тундонь чи“ ды Васенце иень тонафтума задачникь. Зняро жо книгатнэде мокшонь кельсэ як. Тонафтыцятнень прумксось ней ефтасазо эсь валозо зняро ды кодат эрзянь школатнэнень эрявмо кармить кинигат.
Эрзянь мокшонь школатнэнь эзга пек аламо эсинек учителенек. Косто сынст муемс, кода анокстамс? Московов пурнавозь тонафтума тевень роботниктнэ те тевенть парсте арсесызь ды муить май косто миненек таргамс эрзянь-мокшонь учителть и кода седе парсте путомс тевенть педтехникумтнэнь эзга, штобу седе курок анокстамс эсинек эрявикст пакшань тонафтыцят.
Ней варштадо кода тевесь ащи покш седе сыре ломатнень марто, конатнэ школас тонафтнеме овсе эсть яка, ловномо сермдомо а маштыть. Те тевенть эйсэ мезеньдяк паро а нейдянок. Эрзятнэнь-мокшотнэнь юткова истят ломатнеде велть пек ламо. Эрзятнэнь ютксто сядо ломаньстэ стака муемс 10 ломанть ловномо сермадомо маштыцят. Эрзянь-мокшонь аватнэнь ютксто седеяк ламо неграмотнойть. Эряви сынст веси тонафтомс. Учителень прумксось арсисазо (думасазо) ванусазо те тевенть и муи ки весе чопуда эрзятнэнь ды мокшотнэнь тонафтомс ловнума тевс, штобу Ленинэнь валонзо коряс Советской властень кемеце юбилеентень иляссо кадовт вейкэ як ловномо а маштыця ломань.
Ламо покш тевть ащить эрзянь-мокшонь учителнэнень прумксонть икеле. Кадык эрьва (каждой) Московов кучозь делегатось арсесынзэ (думасынзе) парсте не кевкстиматнэнь штобу тей прумозь весеменень дружнасто тееме тевенть ды ефтамс эсист покш виде кеме валост эрзянь мокшонь ютксо тонафтума тевенть кувалт.