Эрязденть арсезь (2010)/Янксема
[217]
| Янксема |
... мон истямо сокор, мезеньгак а чарькодиця ульнинь?
— Вельть ламонь содыцякс кияк эзь чачо. Инетнеяк.
— Мекс пештинь пряудемем седе ламо лукшсо?
— Аволь ансяк «пештинь» — пештсть.
— Мекс ламось-мезесь кувать тень эзь чарькодеве?
— Эрямс эрявсь.
— Мекс кой-мезесь течинь эрямосонтькак превс а саеви?
— Эряви содамс седе ламо.
* * *
Пурнавинек Тихононь Лизамезень кедьс. Тейтерть, цёрат. Эйстэнек кеменде ламо. Весе Пичепень. Малав весе ве иень чачовт. Кирдажт. Оршнезтяно покшчинь оршавкссо. Эно кода лиякс? Течи покшчи! Весе одт, весе мазыйть, шумбрат. Турватнестэ мизолкстнэ а валгонить. Пеедькшнемат, згилямот, кеняркссо налксиця вановтт, Якстерть мерий од тейтерень турват... Аштетяно озадо стуворонть перька. Кудосонть лембе. Мельскак а сы: вальматнень тона ёно теле, сехте якшамо шка. Лов, пукшт-цят якшамо. Мейле мезе? Од шка... Сонензэ якшамонть ацирьгалеманзо...
Нежедсь вень чоподась. Потолокс уське вельде понгавтозь лампась валы валдыне лангозонок ды икельганок путнезь ярсамопель марто вакантнэнь-кедьгетнень лангс. Ашо почтонь сюкорот, пельксэнь-пелькс печксезь потмо прякат, салтозь, кансёройсэ ваднезь керсезь капста прят, чапамо ловсо, тамашакс маряви човинестэ керсезь колбасась... Сюпав стуворось, сюпав! Лиякс улемс а кона ёндо. Вейсэнь. Эрьвась кандсь, кинь мезезэ ули. Шказо уш — самс сюпавчинтень, вейксэце ие, кода прядовсь войнась.
Вети — кой кирди — Лизань патязо, Отяй. Лизань ды Отяень тетяст-аваст а неявить. Бешоконь тусть шабранень. Кадык [218] сынсь, одтнэ, симнить-морсить!
— Тейтяно кирькс, тейтерть-цёрат! — сергедсь азоравась, маряст весе, ды пештизе цярканть. — Кирдть Римма, Гришкань тейтерь, — ледстизе маласонзо аштиця Риммань лемензэ ды венстизе «кренч ведте» пешксе кедьгенть тейтерентень.
— Потмаксос, потмаксос! — ансяк саизе Римма цярканть, каятотсть кармавтыця жой вайгельть.
— Мезень кис? — эзь талакадо, мусь мезе ёвтамс, тейтересь.
— Кода мезень кис, течи Микита! — лездась велькссэнзэ кавалокс аштиця Отяй.
«Микитань кис» «симицясь» начтынзе турванзо, сорновтызе прянзо ды венстиксэлизе кедьгенть мекев.
— Арась, арась. Истя а туи. Истямо кон арась, — ледстизь, вейкест-вейкест поладозь, Отяй ды Сёдоронь Лиза.
— Потмаксос! Потмаксос! — кармавтсть лиятнеяк,
— А карман, — пердась раужо штерялкс сельмс Римма. — Куш повамизь — а карман!
— Потмаксос, потмаксос!!! — марикскак эзть тее, «лепштясть» эрьваёндо.
Савсь кунсоломс. Кандозенть чамдызе пелев! щьга. Мик козозевсь, ды сельведтнеде начксть сельмензэ. Таргась зепстэнзэ пашше.
— Вай, вай кодамо чинев! Сюлоткак лисить, — сельведень пачк — эль эзь лепия — пеняцясь Римма.
— Юты, юты, — оймавтызе Отяй, — берянькс а лади!
«Кренч ведь» марто кедьгесь пачколесь эрьвас.
— Кирьксэм прядовсь, — яволявтсь Отяй, — копордызе, ней пештинк вачо пекенк. Ярсадо, ярсадо, илядо визде!
— Сюкпря, Отяй пати! — серьгедсь таркастонзо Ивакань Надяй. Кодамо Надяй сонсь, эчке ды покш. истямо вайгелезэяк. Баягакс увны.
Лавшомгадсть кельтне, калдоргадсть пенчтне. Ливтнесть стуворонть велькска пеедькшнемань валт, кортавкст. Шабай Миша снартнизе эчке, теке букань, вайгельсэнзэ сыргавтомс моро: «По диким степям Забайкалья...» Кияк эзизе кирде, «Забайкальязо» лепиясь.
— Тейтерть-цёрат! — шаштынзе-оймавтынзс шалнозь кортамотнень «симнемань» ветицянть вайгелезэ. — Ютатаноомбоцеде. Мейле — морамо. Васенцекс таго каванизе Риммань, мельганзо Павол Андюнь...
[219] Прядовсь кандтнемась, палыця ведьсэ каванямось омбонь кирдаяк.
— Ней вана моро! — эрьгеласто, весеменень марямга яволявтсь стуворонь прявтось, аволь сэрей, лагоря рунго Отяй.
— Кодамо, кодамо, — шалнозевсть, прок лавкат, тейтертне.
— «Пандо прясонть» — ёвтызе мелензэ вечкемам, Бозань Рая, сэрьс апокшке, эль неявикс безьгунов чама тейтересь. Сон аштесь икеле, пазаватнень ало.
— Арась, арась, — каятотсть вайгельть, — «Девка пела» паро морось!!!
За горою у колодца, |
Аволь покшке, шабратнень коряс лазсо вельтязь Тихонмезень кудост пешкедсь гайтень чадыведте — васняяк, каштмолевтинзе кортавкшовтнень, мейле лоткась кельгемеде, мерят аноколь кепедемс потолоконть.
— Парсте, мелень путозь морыде, тейтерть! Цёратнеяк лездасть, — шнась Отяй инжензэ, Лиза сазоронзо ялгатнень. Кургозо мизолкстонть а пекстневи. Чамазо палозь палы. Покш сельме Лиза мазый, патязо, маряви, седеяк.
— Эрьде «Пандо прясонть» серьгедсынек! — натой стясь, эзь кирдеве Бозань Рая, омбоцеде ледстизе вечкевикс моронзо ды сонсь ушодськак.
Пандо прясо од килей, |
Вайгелезэ «солистканть» омбоце, цёрань ёнов молиця, лиси васолдо меште потсто.
| [220] | Килейсть ало од тейтерь, |
поладызь, макссть вайгель лиятнеяк, серьгедсть вейсэ.
Монь мельскак тукшны «Раянь морозо». Вечкеви эйсэнзэ валсо аёвтавикс сюморьксчись. Морат, тонськак а редясак, кода польдерь-польдерь туить сельведеть. Седеяк, зярдо морави апак капша, таргсезь, ёжомарязь, верьга-алга — васенце ды омбоце лийканя вайгельтнесэ.
— Кода истя, моротнень кис а кепедемс цяркатнень? — содась эсензэ, наянсто пейдезевсь Отяй, ансяк прядовсь «Пандо прясо» морось. — Кода? А? Тейтерть, кода тынь? Кода тынь, цёрат? Паряк, нуртнетяно?
— Эряви, эряви! — пупорькс вайгельсэ рангстась кие-бути цёратнестэ.
* * *
Кудосто кудос яксезь каванямонь коесь — эрзянь. Кезэрень пингень. Топавтнесть эйсэнзэ — лиякс ды лия тувталонь кувалма — церьковатнень стявтомадост икелеяк. Поптне эрзянь кезэрень ламо илатнень-кирдатнень — седе курок эрзятнень совавтомс евреень Кемемантень — рузыявтызь, педявтнизь эсест покшчизэст. Ютксост телень Микиласькак, конань ютавтома шказо — ацамковонь 19-це чись. Сонзэ таркас, зярдо эрзятне Иисусто эзть марсеяк, ютавтневиль Таунсяй. Кода эзть яжа кезэрень койтнень, кудосто-кудос яксема илась кирдевсь кувать.
Ульнинь комсомолецэкс, пазтнэнь-эвстнень эзинь лово мезекскак. Церьковатнень ды эйсэст аволь човине рунго, аволь дёкуш «бачкатнень» неемскак мелем арасель. Паро. сынь сестэ арасельтькак. Сестэ эно кие, кодамо вий кармавтокшнымим Микилань чинть тешкстамо?
Одксчись? Тейтертне? Аволь эсень мазя превтне?
«Нолдык, Инешкипаз, икелеть теезь пежетем. Эзть таштавкшно превень, эзь максне школась сень, мезе эрявсь, секс сюлмссвкшнинь чннев-чопода вийтнень марто, ульнинь зярс-бути «Микилай угодникекс». Ней, ламо иень ютазь, сынь мельс, чарькодия: шожда, вельть шожда од ломаненть саемс [221] кедькоморо ды ветямс, ветямс тов, ков эряви. Те парсте неяви «микиласонть». Пульзян икелеть, Верепаз, нолдык ды, тагояк,нолдык чумом. Ульнесть тень кевейксэе иеть. Ней — сизьгементнень трокс умок эскельдинь. Пачкодинь эрямонь пандо тёкшонтень. Тестэ парсте неявить теезь ильведьксэнь. Марямак, Инешкипаз, неемак! Чангодть витемс а истя теезь эскелькстэнь куш кой-конатнень, чангодть, чангодть!»