Эрязденть арсезь (2010)/Асодамось - чансть

by Нуянь Видяз

[212]

Асодамось — чансть

КАВТО ёнов. лыйнезь шаштсть раужо коцтсто стазь шаршавтне. Панжовсь сценась. Панжовсь сон, теке келей вальма, икелензэ аштицятненень. Залось шалнозевсь вайгельтнеде ды ютамодонть. Эземтнесэ цёрат. ават. эйкакшт... Махоркань сэнь, судос эциця качамось уйкшни потолоконть ёжова. «Мадстинк каштомонк!» — каятотсь корсяня, маряви, копордазь алянь вайгель. Текеде серьгедсь ава. Оршнезь седе ламот «кухайкасо», кой-кить — шубасо. Талаень сёксь, ве панарсо а сат. Какарьгадат.

Сценанть икелев лиссь Пронянь Коля. Сэрей, тусто валдо черензэ судрязь удалов. Цёрась мазый, аволь истямо эрьва тейтересь. Чамаумарензэ талномадонть Якстерть мерить. Тедеде пряды школанзо. Сон концертэнь ветицянок.

— Начинаем Дига колхозников алтавозь концертэнть, — вайгелезэ Колянь ванькс ды жойниця, явови-маряви валсонть эрьва гайтесь: — Первый номером нашей программы — оймадо эно, саты кирьгапаренк раздемс! — нашей программы моро, да биш, песня — «Закурю-ка что ли». Морыцясь Коля Четвергов.

	Закурю-ка что ли Папиросу я.
[213]	Никогда я крепкий Не курил. Полюбил я девушку Курносую. Да, видать, напрасно Полюбил. Ох, неприятно...

Тусь ожо сёлмине нимилявнекс залонтень меельце о-о-о гайтесь, ды кепететсь цяпамонь буря. «Давай, давай!» — васоло ужостонть цярнозевсь цёрань вайгель, марявсь, Долгов Ванянь. «Паро, паро!» — каятотсь лия ёндо.

Астяко цяпить.

Минек Колянь верьга вайгелезэ чевте, валаня, вечкевикс. Истятнэнень мерить драмань тенор. Моры — ютавты моронть седеензэ пачка, моры сэтьместэ, вайгелень апак нолдтне, кунсолозь.

Радио аволь эрьва кудосо. Дык, теяк паро! Радиось — радио. Вайгельтне эйстэнзэ чудить-чольдердить кшнинь. Те вана, икелеть — эрий ломань, эрий вайгель, од цёрыне. Вайгелезэ, кода корты Долгов Ваня, «натуральной». Радио...

— Песня... — содась эсензэ, ветясь концертэнть омбоце Колясь, Пронянь: — «Зачем тебя, мой милый друг, узнала». Морыть. да биш, исполняют Ионова Вера ды Четвергов Шурка.

Вера — войнань шкасто тетявтомо-ававтомо лытыця ламо эйкакштнестэ ськамонзо, кие зярс кирдевсь минек велесэ. Эрзякс корты — кунсолат кунсоловлить. «Минек» тейтертнестэ мейсэяк а явови: важоди фермасо, весе марто яки клубов, моронь-киштемань кужов, пеедькшни. Эрзянь тейтерь! Вейке, редия, асатыксэзэ: виздиця. Кодамояк чирь вал мари, чамазо гувк артови зорякс. Мекс истя визди, эзь чарькодеве. Нейгак... Содазь, лисемс аволь ве сядо лангозот ваныця сельмтнень икелев а шождыне, талакады эрьвась. Вера... мик сорнозевсь. Саия кавалалдо ды, натой аламнеде виень путозь, ветия сценанть икеле пес.

Зачем тебя я, милый мой, узнала,
Зачем ты мне ответил на Любовь? —

сергедсь Вера ды ськамонзо морынзе кавто кикстнэнь сорныця вайгельсэ:

Ах, лучше бы я горюшка не знала,
Не билось бы сердечко моё вновь —

совавтыя вайгелем, ды вейсэ прядынек куплетэнть. Марявсь, [214] Верань вайгелезэ седе виевгадсь, теевсь нардевекс, лавшомсь седе талномазо.

Я жду, и вот приходит долгожданный,
Целует, нежно за руку берёт.
Ах, милый друг, мой нежный друг, желанный!
И сердце песню радости поёт.

Морамонок Вера марто прядынек меельце нотанть кувакасто, прок алкуксонь артистт, таргазь. Сюконинек ды ютынек кулисатнень удалов. Мельганок марявсть «вецана» цяпамот. Теке тандавтозь зярыя гулькат кепететсть масторсто сёлмосост ахолязь-шалнозь. Теяк паро. «Псилгалгалезь» «зачементь» лангсо ульнесь аволь ламо.

Арась гармониянок. Арась тонавтыцянок-ветицянок. Минсь. Кода машттано, кода лиси. Сень кис ваныцянок, кунсолыцянок вант зяро! Залось тыц, озамс а козонь.

Шаршавось пекставсь.

Весе лисинек сценанть куншкас ды стинек-арынек эсенек таркава хорсо морамо. Талномадонть эль а сорнотано — вант видьстэ, прясот иля лыкавтне.

Шаршавонть тона ёнов лиссь ветицянок.

— «Горят костры далёкие», — каятотсь Колянь вайгелезэ, — исполняет хор. Цяпатано! Цяпатано!

Панжовсь залонтень «кенкшесь», ды серьгединек верьга вайгелть яволявтозь моронть:

Горят костры далёкие,
Луна в реке купается,
А парень с милой девушкой
На лавочке прощается.
Глаза у парня ясные...

Концертэсь мольсь.

Егань Нина ды Игань Рая кецневтизь кунсолыцятнень «Мой костёр в тумане...» моросонть. Мельгаст лисинь мон. Шкань-шкань мокшнан сюворязь, мештень икеле кедьсэнь коштонть керсезь, «понгавтнинь» «мировой буржуйтненень» Маяковскоень «Стихи о советском паспорте» стихсэнзэ.

Берут, как бомбу,
Берут, как ежа,
Как бритву обоюдоострую, —

ливтнесь залганть, кунсолыцятнень велькска орькс вайгелем.

[215] Ламот содыть: Маяковский сэреель, вайгелезэ эчкель, поэтэсь маштыль парсте ловномо эсь стихензэ. Мон, сонзэ коряс, мезе... Ялатеке, ванан, кунсолыть, а лекситькак.

— Таго моры Четвергов Коля, велекс Ёгань Коля, — прянь шназь, каштансто, валтнэнь путнезь яволявтсь од номер концертэнь ветицянок.

Вейсэндявозь шаршавонть икелев, сценанть чирес лиссь минек Коля. Лангсонзо ашо панар. Черензэ, модань коряс, судрязь удалов. Виде рунго. Монь коряс седе сэрей. Ютавтызе вановтонзо залонть васоло пев, изнизе лип шкань ютазь талноманзо ды сэтьместэ таргизе вайгелензэ.

Далеко-далеко,
Где кочуют туманы,
Где от легкого ветра
Колышется рожь, —
Ты в родимом краю,
У степного кургана,
Обо мне вспоминая,
Как прежде живешь.
От далекого друга
День и ночь непрестанно
Дорогой и желанной
Ты все весточки ждешь, —

морась цёрынесь мазый мастордо, вечкемадо, од шкадо, морась Коля, конанень мернинек «Орданьбуень Лемешев». Прядызе моронзо, сюконясь ды «кекшсь», потась шаршавонть удалов. Мельганзо каятотсть увныця цяпамот, талномат...

— Михаил Исаковский, музыкась Захаровонь — «Ой, туманы, мои растуманы» — содась эсензэ, ветясь концертэнть Пронянь Коля, Пичепень весемеде мазый цёрась. Кавто ёнов лыйкстась сценань пекстыця коцтось, ды Орданьбуень эрицятнень, цёратнень-аватнень, одтнэнь-сыретнень икелев лиссь «Пятницкоень хорозо». А баян, а гармония, а тонавтыця-ветиця, оршнездяно — кинь мезезэ ули. Теке марто мель путынек муемс ашо панарнэ ды раужо понкст, тейтертне — истямо жо ковтыне, раужо юбкат. Эрьвась моры — кода машты. Ялатеке превскак киньгак эзь сакшно — моратано беряньстэ. Те кода истя, «Пятницкойде» седе беряньстэ?

[216]

*  *  *

Ютась се зярдояк астувтовикс «Колхозникень чиденть» мейле иешка. Ёгань Шурка тусь лия ошов тонавтнеме. Ёгань Нина лиссь мирденень ды сась эрямо Саранов. Игань Раяяк текекс: Толя мирдезэ саизе лия буень велев. Кавто Колятнень саизь армияв. Кадызе Орданьбуенть, эзь кирдеве, уроз тейтересь Ионова Вераяк. Паряк, сайсь мель муемс войнань отьмантень ваязь тетянзо-аванзо? Муемс эсь уцясканзо? Срадынек теке ве пизэнь нармуньлевкст.

Ней тенек, се шкань «велень артисттнэнень», кить пачкодсть эрямонь стакачитнень изнязь те шкантень, — кинень сизьгеменде ламо, кить кенерсть эскельдямо кавксоньгеменень буенть малавгак. Кой-кить умок уш тюсот, свал Чопода масторсонть,

Варма, варма, варма... Кежей, чамань пиштя, оймень костиця Шкань варма. Седеень апак маря, сиземань апак сода сюконявтнят-яжат, рестеят тон кудом икеле сыре каленть. Те тон, тон, юргозь-вешкезь, салык панжиковонок, лёмзёркс ашолдыця мазый шканок, те тон ней тердят эйсэнь ёнкстнэв, косто кулят тей а пачколить, косо ойменть Эрьмай — Эремкань Миша, Кендял Палю, Пронянь Коля, Бозань Рая, Покшкарень Толя... Вай, ды каня весень лемест ёвтавить?

Се умонь концертэсь кадовсь ледстнема паргинезэнь тундонь нармунень вайгельсэ чоледиця вирень кужокс. Ней вана кисэнзэ визькс, кияк уш а нолдасы теезь чумонок: хоть вейке стихке, вейке морыне моравлинек чачома кельсэнек, куш ве нотыне лисевель кельпрястонок покштянок ледстязь. Рузокс, рузокс... Рузокс пестэ пес! Валтнэнь менчезь, поркснезь, кокнозь — ялатеке рузокс. Минь, «ожо нерть», мезе теинек, эзинек чарькоде. Эзинек сода, кодамо тсрне таркас ветимизь. Залсонть ульнесть ламо сияждыця пряткак. Ютксост тонавтыцянокак! Мекс сынь келест сускокшнызь? Мекс сынь каштмолемасост совавтсть мештезэнек-прязонок лия раськень валтнэнь ды мелоднятнень? Мекс кияк эйстэст эзь мере: «Тынь мезе истя тейтядо? Мекс чирь-трокс валгак эзиде ёвта эрзякс?»

Уш сестэ, ведьгеменце иетнестэ, лисни, кшувавтозельть превстэ-седейстэ эрзятнень арсема лувост, мелест — эсь пряст ловомс эрзякс, вечкемс эсь Масторост ды Раськест, кирдемс корязост каштанчи.

...Варма, варма! Ахоли тень кудом икеле вальмазон ваныця [217] калесь тарадсонзо, энялды, веши пельдень лезкс — лоткавтовиця апак визде лангсонзо нарьгицянть. Седеем китны-аварди майсевицянть лангс ванозь. «Мон теть, сыре, сормсевезь керь каль, лездан, вийть аволь аламо ютавтан — пирявкст путнян зыянонь теицянть, нарьгицянть каршо. Лездаволыъкак теть седе ламот, паряк, лоткавтовольгак зыянонь-куломань кандтний даволось?! Эх!»