Эрязденть арсезь (2010)/Тундонь ильтема чи
[129]
| Тундонь ильтема чи |
КИНЬГАК вальмало ёролдови ломанень сэрьсэ килейне. Понгавтовить эйзэнзэ лехинеть-лентынеть. Те — Тундо. Тейтертне киштевтьсызь-морсесызь. Теде мейле сыргить Тундонть велеванть ютавтомо. Лотксить киштеме, морсеме нурька морынеть кеменьшка кудонь ютазь. Кудосто кудос молемстэ морыть кодамояк кувака лужаня моро. Седе сеедьстэ «Пиже садсо». Ваныцятнеде-кунсолыцятнеде — вирь! Истя киштезь-моразь ютавить велень весе ниле куротне.
Прядови Покшчись чикуншкадо мейле Орданьбуень куншкасо сэденть лангсо. Тесэ меельце киштема. Ансяк прядови, весе эскельдить балясатнень ёжос.
— Сы тундос! Сы тундос! — серьгедить киштевтицятне ды каясызь Тундонть ведентень.
Весе. Тундось тусь. Ильтявсь. Юты ие ды сы одс.
Текекс туи тейтертнень одксшкаст. Туи ды зярдояк уш а мурды.
Покштянок нардевстэ сюлмавозельть пертьпельксэнть марто. Эйсэнзэ полавтневкстнэнь тешкстнесть покшчисэ, озномасо, лиясо. Тундонь ильтемась — эйстэст вейкель. Ней сонзэ рузонь церьковась петнявксонь пес теизе эсензэкс ды лемдизе евреень та-кодамо «троицякс».
Анокан рангозевемс, прям стенас чавомс оймень сэредькстэнть: чуросто кие эрзятнеде содасызь Хейкки Паасоненэнь, Суоминь Ине содыдеенть, кона аволь ве ие эрясь эрзятнень ютксо ды кадсь мельганзо сынст эрямодост, кельдест ды койдест-кирдадост ламодояк ламо книгат. Те лементь содамаль эйкакшонь пес, эрьванень!!! Тарказонзо, ловт, — ... кияк. Самай сон, ине Хейкки, кенерсь, шкастонзо сёрмадызе, ванстызе ёмамодо истямо мазый, домка смусть марто Инечи покшчинть.
Сюконян теть, вечкевикс Паасонен, модас.