Эрязденть арсезь (2010)/Инечи

by Нуянь Видяз

[115]

Инечи

Чокшне. Авам калдорды, мезе-бути теи каштомикеле. Аноксты, содан, почтонь аразде човсезь модамарьстэ чапакс. Каясь коморо-кавто почткеть. Вайкстни-мелявты пидемань-панемань тевтнеде. Ванды покшчи. Вастома мейсэяк. Мейсэ? Кода? Сёксень таштавкстнэ дёкушкадсть. Те валсонть апак кекшне — прядовсть. Секскак мелявты.

Стенас понгавтозь содсо лексиця лампинесь валдомты стуворонть. Эйсэнзэ керсезь олгопеть, васоньпеельть, конёвт, алонь лукшт — тейтяно «баяга». Те Орданьбуень инечинь кой. Саема, васняяк, верек ал, карама састыне-састыне лукшонзо ды чова вариневанть таргама уличинзэ. Те тевесь весемеде стака. Теема мелень путозь. Апак эрязкале. Васняяк артомат алтнэнь. Вейкень [116] якстерьстэ, омбоцень чурька лукшсо тюжасто, колмонень кодамояк лия тюссо. Теде мейле каразь варинетнева тонговить олго петь-пелькскеть ды тееви геометриянь мазый шождыне фигура.

«Баяганок» анок. Кузинь стувор лангс. Рая патям састо-састо, илязо каладо, венстизе тень «мазыйненть», ды мон текекс, апак лексе, понгавтыя суре вельде потолокс чавозь эскентень. Коштонть анеявикс якамодонзо «баягась» эль неявомга велязевсь эсь перьканзо пазаватнень икеле. Мазы-ы-й!

Инечинь каршо чокшнесь ютась.

Учан кодамо-бути асодавикс кеняркс, эрямосонть полавтома, аёвтавикс ёжот эвтить потсон. Кода эно? Кемгавтово чассо, пелеветь рангстыть атякштне ды вельми, келя. маштозь Иисус. «Вельмемась» аламо талновты. Лия ёжот мештьсэнь эрить. Стян, маряви тень, ванды валске ды вастован лия эрямо марто: пешксепеке, седе эрьгела, лембе, лиякс, ламо тюссо артозь. Вастсамизь лия, асодавикс ялгат.

Аштян тетянь ёндо сырькаень кедьсэ. Федолия — мерить тензэ шабратие-покштне.

— Ванды, эйкакшт, чипаесь лисеме карми ю пнтезь(?)-тёкаезь, — пшкадсь тенек сырькаем, моргасто ды кемстэ, апак пеедькшне, валтнэнь чуросто путнезь — а стяко покштянок лемдекшнызь те ш шть Инечикс. Лисиде ванды. Варштадо.

— Ансяк а удовомс! — серьгединь марязенть каршо полоклангс, теке Шпшай псаканок, куземстэ.

— Иля пеле, сяткинем, сыргозстян! — ёвтызе валонзо кудазоравась. саизе стуворонть лангсто мезекс-бути салдырьксэнть ды совась моргас тевензэ поладомо. Сырькаем покш, эчке ловажа, капшамонь асодыця, келей чама ломань, аволь кода покштям, вайгелезэ вана — лавшо, чевте, оймень эждиця.

Пувтамс эзинь саво. Монсь удомам сезия. Ёзынь сельмень ды поцорсо валгинь полоклангсто каштлангс, тосто — масторов.

— Сырькай, чись эзь кенере лисеме? Эзь? — талнозь, пелезевезь мик, илязо менстяво «киштемась», вередеминь сырькаезэнь.

— Эзь, эзь, розь пештинем, — оймавтымим сырькаем пижнемань асодыця вайгельсэнзэ, чевтьстэ ёвтазь мельсэнзэ.

— Курок карми лисеме? — кевкстия тензэ сельмезэнзэ ванозь.

— Шказо уш, — маринь каршо.

Лисинь кузтемпес. Эзинь оршнеяк кода эряви. Неемс [117] чипаенть «киштеманзо» эзь максо чилисема ёно шабранок кудост. Секскак топ-топ-топ чиинь седе оля таркав, умарьпире пев. Тестэ парсте неявсь модачиресь.

Валскесь маней. Менелесь ванькс. А неяви, козоньгак эзь кадово пель пакшкеяк. Кува кекшнесть? Чилисема ёнксось гувнозь гувны ожо-якстере толсо. Менелесь кирьвазтизетолпандянзо. Эждеме ушоды. Зярс коштось экше. Ильведькс теинь — ношкстынь кудосто кепе-штапо. Кельминь. Учан пеень сускозь асодавиксэнть чачоманзо. Учан дюниянь тевенть.

Вана модачиренть тона ёндо, марявсь тень, жойнезь-чольдердезь кивчкадсть якстере-ожо налт. Мельгаст невтизе пря тёкшкензэ, прок сырнень кочом, чипаесь. Ванан. Ванан сельмень тетькезь. Лип а теян. Учан. «Кармат-арась эно ландчеме? Эрь, эрь эно, мезе учат? — а паневить, чийнить удем сормсевкскан валтнэ. — Эли стувтык киштемань уставот?» Чипаень «кочомось» кассь ды кассь. Вана уш лиссь пелевидьга, вана... «Арась, бешоконь, мелезэ, удомазо эзь ява» — кирдян мельсэнь. «Лиси ужо, перьгеди модачирестэнть ды невтьсы ливчанячинзэ» — оймавтнян эсь прям, учан, учан... Экшеськак лоткась марявомадо. Окойники, учомам «озась» васоло-васоло вирьсэ вельтязь модачирентень ды куроксто перьгедсь эйстэнзэ.

Ёжом кольсь.

Кельме луганть ланга нумолокс ношкстынь луганарсо копачазь тингень кияванть кудов. Пеняцямо сырькайнень эзинь арсеяк. Каня казезь паро, валдонь пургсиця чипайде ёвксонть кис пеняцякшныть?

...Ютась ие. Чадыковонь лембе чинзэ малав весе солавтызь теленть таштавксонзо. Карьксэнь эчксэ кардазсто-косто лисиця чольдерькай чудикерькскетне сыргозить ансяк чикуншка малава. Валске марто сынь ды лия начко таркатне вельтявить эень човине, пачк невтиця кувосо. Те шкастонть «коське». Карьсэяк пильгеть а начкить. Вечкеви якамс суликакс цитниця «кувотнень» ланга! Шпанк-шпанк, цётор-цётор порксневить-тапавить пильгеть ало, чалгавкстот.

Лелят-ялакст, зярс «коське», лисинек ушов — алонь пурнамо. Оршазьтяно покшчикс. Пильгсэнек од, ловдонть ашо пракстат, од, покштянь кодавт, карть. Мельспарось кургозонок а кельгстяви: истят пракстат пильгезэнек тапардынек! Эрьванть кедьсэ кескавне.

[118] Лисинек ушов. Ютама малав весе велеванть. Кода а ютат? Пичепесэ эрить Оверень, Марфа патям, Элина патям, тетянь сазоронзо, Алопесэ — од покштянок, Понкспесэлиямалавиксэнек. Тетянь ды авань ёндо пурнавить байтяк. Весень ютамат солавтомадонзо икеле. Меельце кудотне Покшпесэ — Калдоронь, Индялонь ды Пулянь. Меельцесэнть эри явсь кудонь Верка патянок.

...Чийневсть-якавсть весе. Кескавненек марто, мон ды Коля ялаксом, шкань ютазь пачкодинек чачома ошкозонок, кудов.

— Зяро тонь? — варштась Коля, судалксонзо нардтнезь, кескавнем лангс.

— Мон а содан... — кавтолдозевинь. — Зяро тонь?

— Монгак а содан... — текекс мерсь ялаксом.

— Адя ловсынек, — ёвтыя мелем, ды карьсэнек вачкоезь мельга-мельцек совинек кудос. Паро, мурдынек «вецакавтомадонзо» икеле.

— Пачкодиде, пильгенк эзть начко? — пачкодсь авань мелявксозо каштомикельде, ансяк кенеринек мельганок пекстамо кудонь кенкшенть.

— Эзинек, эзинек начко! — каятотсь каршо Колянь горниповнекс чольдердиця вайгелезэ. — Коськть пильгенек. Ютынек икелев ды стинек, стувтынек кайсемскак, пурнавксонок марто стувор экшс.

— Вейке, кавто, колмо... — моткоди-лови веженсесь, — якстереть кото, ожот — кавто. Вейке, кавто... кемень тюжат. Весемезэ, леляй, комсьнилее!

Монгак кескавнем чамдан. Эрьва алонть, Колякс, путан анокстазь ваканс.

— Весемезэ комсь кавтово! — монгак эзинь кирдеве кеняркстонть, сергединь кескавнестэнь меельце алонть саемстэ.

— Изнитинь, изнитинь, леляй! — кецнемадонть цяпазь, пейдезь пижакадсь ялаксом.

— Саты тенк чоледемс, цянавт! Ярсамо озадо, — стуворс пси модамарень чугунонть путомсто мерсь авам.

Апак ватксе, «мундирсэ» пидезь модамартнестэ, тей-тов чиремкшнезь-велязь, сиякс кувтолдыця сувось кузи потолокс. Чугунонть вакссо капста салведь. Почанят, тантейть модань умартне! Кой-конатне эйстэст апак ватксе кургс эцить. Кшиськак аволь пиже. Кши ёнов моли. Течи Инечи. Истят ярсамопельть лия Ч1гп тестэ I ш я учо. Иисуст-кить — те кадык, сынст тевесь. А вана икеленек [119] чарыця раужо чугунось кенярдовты.

...Шкась моли. Азгун чипаесь, конань киштемазо эзь учово манынь Инечистэ, каванясь весень валдонь пшти налсо ды чамань чентиця псисэ. Теке аволь чадыковгак, кизэ. Модась маризе Менелень Азоронть, кецнесь лембезэнзэ: лугатне, лейчиретне, васняяк, пандочаматне, вельтявсть пижесэ, чувттнэ каясть лангаст истямо жо тюссо, пачк невтиця викшнезь пацят. Ней аволь кода тельня — карсемань аразде ушов а лисят. Чийнек илыкеть маштомс. Кепе. Чийнек куш прамозот вирьга, паксява, веле юткова.

Верепень од цёратне стявтсть нурсемат. Сэрест — менельс! Ломантнеде. .. Весе песь-куринкась, маряви, тесэ. Сыреть, одт, эйкакшт. .. Кувака теледенть мейле кинь кирдьсак кудосо! Эйстэст пек явовить тейтертне ды од аватне-урьватне. Лангсост якстере, пиже, ожо, сэнь... тюс оршавкстост вановтот а саеви. Тейтертнень прясо, пангонь таркас, цитнить чинть каршо каштазт. Истямо уш, рузонь ёнов молиця, оршамонь коест Орданьбуень. Ве ёндо, седе сэрей таркасто ванозь, неявить мазыйдеяк мазый пусмокс!

Налксить алсо.

Кеменьшка эскельксэнь ютко путовить кавтонь-кавтонь инечинь артозь алт. Понги оскань кайсицясь-кеверькшницясь алтнэс, алтнэ — сонзэ. А токавить — оскась максови лиянень. Тон — учок. Учок мейле, зярдо сы дёпот. Пеедькшнемат-згилямот, раксемат, нусманя чама те чистэнть а неят.

Инечи.

Аволь васоло нурсемат. Ламот эвтить, якить-пакить перьканзо. Учить пай, кие-ки мельга. Лачо лангс чалгазь, цёратне нурить тейтертнень. Стядо. Кавтонь-кавтонь. Трокс лазонть лангс ландчезь-нежедезь люкштяить эсь пряст сынсь. Тейтертнестэ седе ламот нурсить озадо. Текекс эйкакштнеяк. Кавто ёндо люкштяить сынст пикс вельде. Кепсетить, седеяк апелицятне, верев-верев! Менельс. «Ванодо пельтнень потс илядо чопавте!» — серьгеди кияк. Жу-у-йк мери седееть верев ливтямсто-валгомсто. Паро, вечкеви!

Нурсематнень маласо кужо. Вельтязь од тикшесэ. Тесэ цёрынетне ды цёракс кенерицятне, цёракштне пансить оска — налксить лаптасо. Каязь, аволь васов, верев ёртозь осканть омбоце цёрась эшксы лапужа мандосо. Зярс сон, оскась, ливти, эряви вейкенень-кавтонень чиемс тона пес ды велявтомс мекев. Теке басом, а понгома оскань кундсицятненень. Сынь [120] бажить кундамс ливтиця осканть ды эшкемс эйсэнзэ чиицянть. Изницясь — а кундавицясь. Пижнемат, кенярдомат, эйкакшонь ций вайгельть, налокс чийнемат...

... Вана истя тешкстневсь Инечинть васень чизэ монь эйкакш шкастом. Таргонь ютазь текекс. Ансяк седе олазь.

 

*  *  *

Ютазь пингень ниленьгеменце иеть. Советтнэнь прявттнэ-ветийтне кирдсть православиянть пулодо. Яжакшнызь церьковатнень, кшувавтнекшнызь раужо пона «архитнень-иеротнень». Ялатеке Инечись ютавтневсь. Кадык човорязь, лиякстомтозь покшчикс. Эрзянсенть велявтызь мекев ды теизь «православнойкс». Инечинь вастома-ильтема, алонь артома-пурнамо койтне, нурсематне-налксематне зярдояк евреень-иудеень Пасхасо арасельть.

Нарьгизь аволь ансяк Инечинть. Мазыйдеяк мазый эрьведьксэнь явныця «Кизэнь вешнема» покшчинть таркас нерьгизь евреень «Тронцанть». Тельня тешкстневсь Раштамочп. Тейсть... Рождество. Инечинтькак эсест ладсо лемдевлизь. Идизе сонзэ евреень, рузокс ёвтавозь «пасха» валось. Эрзякс эрьва кортыцясь соды: «пасхась» — визькс вал. Церьковань «тетятнсяк» содасть теде. Секс потасть. Кадызь Инечикс. Эстест эрзятнененьгак ашождынсль марямс, кудосо-косо, ды седеяк эйкакшпингестэ, те визьксэнь всльмий валонть. Истя евреень Пасхась идизе эрзянь Инечи лементь.

Эрзянь, апак «крестя» Инечись вастневсь-ильтневсь кезэрень шкатнестэ саезь тунь лиякс, сюлмавозель пертьпельксэнть марто, кирдевсь эйсэнзэ домка зэме ды ловномань-морамонь мазычи. Вана сон, алкуксонь Инечись.

Инечинь вастома. Те чистэнть велень тейтертне оршнить сехте мазый оршамост. Алга покай, ланганзо — мазыйстэ викшнезь руця, карксамга пулай. Пильгест тапардасызь лов ашо пракстасо. Икеле, олячинь Эрзянь Масторсо, кандтнесть кедень котат.

Вейкесь тейтертнестэ салава, киненьгак апак ёвтне туи велестэнть чилисема ёнов. Кекши куракш экшс эли ков-лияв. Лиятне, шкань ютазь, моразь ютыть велеванть велепес Инечинь вастомо. Мартост кедьгесэ брага. Серьгедить песэ кудонть вальмало моро:

	Тейтерь-какат, тейтернеть, Боярават, азрават, Мезень коряс минь сынек? Эрязденть арсезь
[121]	Сень коряс минь ней сынек, Пурнавинек, тейтернеть, Минь Инечинь учомо, Мазы чинек вастомо. Коёндо сы Инечись, Коёндо сы мазычись? Чилисема сон ёндо, Нишкепазонь икельде, Мазынестэ наряжазь, Парынестэ сон пурназь. Сы сон ашо палясо, Паля ланга руцязо, Сы сон парсей пацясо Пуло песэ лентазо, Кецякавтсы веленек, Кенярдовтсы кужонок.

Теде мейле брага марто кедьгенть путсызь модалангс, ушодыть, чилисема ёнов ванозь, од, седе эряза ды эрьгела морыне:

Сак, сак, Инечи,
Сак, сак, мазычи —
Нишкепазонь тейтерезэ,
Верепазонь кучовксозо.
Вана ведра браганок,
Пештязь брага плошканок,
Сюконятан пильгезэть,
Симдятадызь брагадо,
Кеднезэнек сайтядызь,
Велезэнек ветятадызь,
Сисем чинеть кирдтядызь,
Кавксоцестэ ильтятадызь
Таго пиже лугава,
Мазый цеця юткова.

Инечи лиси кекшема таркастонзо, моли стамбаро пильгензэ путнезь, апак капша, прок сонсь Чипаесь. Тейтертне молить каршонзо. Сыньгак а капшить. Молить, нурькинестэ эскелязь. Молить ды морыть:

	Адядоя, тейтернеть, Инечинек неяви, Адядоя, азравкат,
[122]	Мазычинек редяви. Каршозонзо листяно, Брага плошка кандтано, Пильгезэнзэ пратано, Мазы моро моратан, Кеднезэнек сайсынек, Велезэнек висынек, Эрьгелгавтсы веленек, Мазылгавтсы кужонок.

Вастовить. Инечинтень кандыть, сельмезэнзэ ванозь, брагадо пешксе кечине. Сюконить. Морыть:

Боярава, Инечи,
Азорава, азравка,
Нишкепазонь кучовтке,
Верепазонь вечкема.
Пазонь пельде кучозят,
Сисем чинес нолдазят,
Масторланго якамо,
Пуринеде симеме,
Иредсь пирянь саеме,
Мазы моронь морамо.
Неикая сюкпрянок,
Симик пуре плошканок,
Кедъпезэиек кундака,
Велезэнек адяка,
Мазылгавтык веленек,
Кенярдовтык кужонок.

Инечись копорды кечинестэнть. Тейтертне сайсызь кавто ёндо кедте ды апак эрязкале молить мартонзо веленть ёнов жойсэ моразь:

Тейтерь-какат, боярават.
Вана учовсь учовксонок,
Вана учовсь кецнеманок.
Кедьпенеде кундасынек,
Велезэнек ветясынек,
Веле-сядо сынь кенярдыть.
Кецязь, моразь вастасамизь,
Сюкпря марто кециевтъсамизь.

Велень лия эрицятне, одт, сыреть, эйкакшт, учить, ваньксстэ оршнезь, велепесэ, ваныть сыцятнень пелев. Тейтертне моразь [123] совить велентень:

Веле-сядо, кенярдодо!
Вана, ней сась учовксонок,
Киштезь-моразь минь вастсынек,
Кедьпенеде минь кундынек,
Минь велес-сядс ней ветинек,
Кенярдовтсы сон веленек,
Эрьведевтьсы сон кужонок.
Чилисема ёндо сон сась,
Чивалгомав таго туи
Пиже мазы сон лугава,
Мазы цеця сон юткова.

...Таргонь перть тейтертне Инечинть марто эрьгелгалигь ды якить кудосто кудос. Эно кода лиякс? Эрьва кудось эрязо валдочисэ. Эрьва кудось ушодозо од, шумбра, сатыксчисэ эрямо.

Инечистэ ютавтови Касгаргонень, Инешкипазонь тейтеренстэнь, алтазь ознома. Покштянь покштятнень лемест кундамга Инечинь каршо чистэнть тейнесть Инечинь пуре. Аравтозь-кортазь кудос пурнавить ламот. Сыре ава эрьва сыцянть вакансто саи пацинес ярсамопелень пелькске, палнэ ды моли ауняв. Путсынзе тосо ярсамопельтнень ве таркинес, пеельсэ коцькери пижень ярмакт ды, пульзядо аштезь, пшкади Тоначисэ эрицятненень:

	Покштинень-бабинень, Тона чисэ эрицят, Виде чисэ ломаидят, Арасть грехенк-пежетенк, Шачи модасо сэриненк, Паз икеле ойминенк! Леменк кундасынь, Весеменень ве вал, ве кель. Ёртынк колмо коморт моданк, Панжинк петлявтомо кенкшенк, Садо мастор алга киява, Илядо пеле пинеде, Илядо пеле туводо, Тонол пекш маро ломанде. Вана сынь тердеменк, Пурныя теик столем, Путыя кшинем-салнэм.
[124]	Вана чевте пачалксеть, Сюкорнэть, прякинеть, Пидень-панень саразке, Пидинь-панинь монсь, Ашо паро кеднесэнь, Шожда мельнесэнь. Арсинь-теинь тердеменк, Леменк-меленк кундамо. Шлия-нардыя лангом, Пурныя-сэрния рунгом. Покштинеть-бабинеть, Садо эйднек-какшнек, Нуцьканек-буенек, адядо мартон. Течи чись тынк, течи покшчинк, Ярсадо-симеде, киштеде-морадо.

Аванть аунясо улема шкасто кудосонть анокставсь стувор. Перьканзо эземтне вельтявить ашо кендесэ. Аунясто велявтыця-сыця авась терди кулозетнень. Тоначинь эрицятнень ярсамо-симеме. Пурнавозь ломантне аштить стядо.

Покштинеть-бабинеть,
Сыринетъ, однэть,
Тердидизь ярсамо, симеме,
Таргинек столенек,
Путынек кшинек-салонок,
Пештинек ведра пиянок,
Путынек ведра винанок,
Ярсадо, симеде,
Пештинк вачо пекиненк,
Витинк нучкань седейненк.

Теде мейле кудонь аватне стуворонть лангс путнесть ярсамо-симемапельть. Стуворонть ваксс эземне лангс путови паргине. Эйзэнзэ эрьвась кан ярсамопелень палнэ ды зярыя петнявкст симемапель. Тень пингстэ корты:

Покштинеть-бабинеть,
Чанстъкепк улезт,
Чантеде эрямо-аштеме!

Зярыя шкань ютазь стить весе ды морыть. Ярсамонь коенть поладомга сыргить омбоце кудос, колмоцес... Мейле мурдыть васенцентень. Тесэ таго озыть стувор экшс. Ярсыть-симить ды [125] лисить стуворонть экшстэ. Пульзить, стить кумажа лангс. Сыре авась коцькери пижень ярмак ды озны:

Покштинеть-бабинеть, Тоначисэ ломантяд, Мастор алга сыде, Симиде-ярсыде, Киштиде, морыде, Пешкедсть вачо пекенк, Витевсть нучкань седеенк, Ней пурнаводо-сэрняводо Ве таркас, ве эземс, Пурнынк родонк-раськенк, Пурнынк нуцьканк-буенк! Сюконятано тенк, Простямизь, чантимизь! Паряк, меленк эзь вановт, Паряк, кежиявтыде, Паряк, бокасо токавиде, Паряк, кедьсэ аволдавиде, Илязт са кеженк, нолдадо. Нолдадо прясо превга, Кавто ваны сельмева, Кавто мари пилева, Нолдынк чумонок рунгова-пукшова! Илязо уле эйстэнк ве пеле аштиця. Трокс ваныця, Берянь валонь ёвтыця! Чантимизъ эрямга-аштемга, Ванымизь душман ломанде, Ванымизь апаро арсиде. Чантимизъ чачи сюрова, Рашты кильдимава, сови эрьмева. Якавсь родонок-племанок, Ней адядо Ильтятадызь эсь кудозонк-чизэнк, Эсь тарказонк-эземезэнк, Козонь паз путыдизь. Леменк апак кунда илядо поява А чить, а веть,

[126]

А аштемстэ, а удомсто. Курчт-карчт кинк лангс. Тонол пекш копорезэик, Каладо чакш прязонк! Кода леменк ливасынек, Сестэ пантядо!

Пшкадема валтнэде мейле весе витемтьсызь рунгост ды лисить покштятнень-бабатнень ильтеме калмазырев. Молемстэ морыть моро:

Эрзянь коесь ней кодамо? Эрзянь кемемась истямо: Эрзят озныть Инешкинень, Сынь отяндить Верепазнэнь, Инешкинесь марясынзе, Ды максы тенст чачи сюро. Верепазось сынст несынзе, Рашты эрзянь сынст килъдимаст. Мезень кис Паз жалясынзе, Мезень кувалт сюрост чачи? Сень кувалт Паз жалясынзе, Сень кисэ тенст сюро чачи: Пелить эрзят Шкине Паздо, Виздить паро сынь ломанде, Вейкест-вейкест а покордыть, Лома лангсояк а пейдить. Башка сень кис жалясынзе, Башка сень кис сюро максы, Видемеде сынь икеле Теить эрзят велень промкске, Пурныть эрзят, велень атят, Велень атят, ламонь содыть, Путыть эрзят путонь чине, Кочкить эрзят велень ломань. Путонь чистэнть се ломанесь Чинзэ лисезь лиси паксяв, Каи видьме сон коморо. Се чииестэнтъ сынь веленек Раськень-раськень сынь пурнавить, Эрьва буесь эсь юткова,

[127]

Кармить Пазнэнь сынь озномо, Норовавань якавтомо. Таргасызь сынь таргань столест, Столь лангс путсызь шумбракшинест, Кирвазтить сынь валдо штатол, Сюконить Мастораванень, Пазонь кедьстэ эрзят вешить Сэтьме, паро сынь пиземне. Тень кискак Пазось вечксынзе: Панить эрзят сынь пачалксеть, Пидить эрзят сюкорт, прякат, Покштянь-бабань лемнеть кундыть, Тердьсызь мартост сынь симеме, Тердьсызь мартост сынь ярсамо, Каванясызь-почувасызь, Таго мекев сынь ильтясызь Мастор алга сынь киява Эсест путонь сынст кудозост, Эсест вельтязь сынст керезэст — Секс эрзятне парсте эрить, Инешкинень сынь вечкевить, Верепазнэнь сынь вечкевить.

Инечинь ильтема. Велень весе эрицятне, одтнэ-сыретне, покштне-вишкинетне, ильтить Инечинть веленть томбалев, чивалгома ёнов. Веленть пестэ паксянть вцдьс ильтить сонзэ ансяк тейтерть. Чить веледенть авасоло пандонть пряс кандтнить олгт ды кирвазтьсызь. Те шкастонть тейтертне морыть:

	Инешкинень тейтерезэ, Верепазонь азравказо, Ине Пазось тонь кучинзить Масторланго тонь якамо. Сисем чипеть якавтыдизь, Шкинеть сакшны ней туеме, Эсь кудозот, эсь чипезэть, Эсь тарказот, эсь эземезэть, Инешкинень путонь кудос, Таго тиринь тонь тетяте. Кундакая кедьпезэиек, Адякая тон мартонок,
[128]	Минек ютась Инечинек, Ине Пазонь валгсь чинезэ, Чивалгомав ветятадызь, Пиже лугас ильтятадызь. Туят пиже лугинева, Мазый баляга юткова. Иес, иес тон кадсамизь, Омбонь те шкас тон ней а сат, Инечинь чис прят а невтят. Кода сон сы омботъ те шкась, Пурнавтано тейтерь-какат, Мазынестэ оршнетяно, Ведра брага минь пештятано, Мазы моро минь серьгедтяно, Таго каршо вастатадызь, Велезэнек ветятадызь.

Инечинть меельцеде каванить брагадо, сюконить тензэ, кода вастомстонзояк. Тейтертне мурдыть мекев. Инечись моли паксяванть. Туи седе васов, илязо неяво. Велявты тейтересь ансяк шкань ютазь. Эйсэнзэ учить. Вастовомсто морыть:

	Паро боярт лелянок, Боярават урянок, Инечинек ильтинек, Мазычинек кучинек Пиже мазы лугава, Мазы цеця юткова Инешкинень, тетянстэ, Верепазнэ кучинстэ. Инешкинень сон моли, Пешксе ие сон а сы. Иень ютазь — таго сы Чилисема сон ёндо, Кецякавтсы веленек, Мазылгавтсы кужонок. Инечинь моро. Инечись мерсь эрямодо, Инечись мерсь аштемеде, Сисем цёрань чачтомадо, Сисем урьвань саемадо.
[129]	Юртонь кирди юртава, Иля тандадтмонь шалттом, Инечим мон ильтия.

Саезь: «Устно-поэтическое творчества мордовского народа» пусмонь 7-це книгастонть.