Тюлэй/2
II
Кармась валдомма. Менельсь шистяма ширеста якстерьгоць, кода пси заслон. Модать алда курокста кеподезэ прянц шинэсь и жильфкасонза пиндолгофтознь шюжэрьса вельхтяф кутнень. [ 10 ]Паксэсь пижэ-пижэ, кода моряста вець. Кожфсь пиземнда мелэ ульс ару. Аш варма. Сетьмэ-сетьмэ, нльнэ акшу лопатня аф шерьхкихть. Фкэ фкэнь инголдазь морасть цёфскэтнэ.
„Шовда алэть“ куца тэчи ранакие стэсть. Варжазнь тиезнь „Шовда алясь“ соканзон инзаманзон, симдозень алашанзон, да тусь тингэ фтал-кормонкса.
Моли кинява, копсонза кептерец, а шинэсь пеедезь ваны лангозонза и жильфкасонза пиндолгофне пинэ пона лаца сакалонц. Моли — сонць ваны модати. Лангозонза щаф эчкя, кувака цазинь щам (панар), пильксонза кэмот. А шэерец, кода вазнь пона, нараф прянц перьф. Сельмонза лотксот, синць верыхть. А сельмэ акшонза корхтамста велэнчнихть, кода полдат. Моли и ваны модати.
Варжась вэри и эзкие эсь пачканза пшкэць:
Тэчи цебэрь шись ули... Эряви покоди мумос... Сэвмос Щолконн?.. Сон пяк нола: ярхцай, кода тракс, а работай тётьмаконь эземс... Аш цебэрь ломаттькэ велеть эса... Аф кельксазь покодемаснон...
Панжозэ лататалт и ушопць тишень вачкама. Изь кенер канфшка тишэ путомс, кати мезэ повсь кэдь алонза.
— О-о-й! ой!.. Щкайнязят! Дэекай!.. Аф шэйтанц?... ювац „Шовда алясь“ и сонць кармась потама фталу.
Тишетнень потмоста стэсь цёраня. Сязэнтф-нозонтф — начка потмоса.
— Тон кода тяза повоть?.. Аф салама сувать?..
— Мон, оцэй анцяк удонь тяса изьмэзь нолда исяк удома, да вармась сэряфтомань сей.
Ах, тэтнень-аватнень!...
[ 11 ]— Васькафнят, — эзкие юваць „Шовда-алэсь“, сонценнэ шомац толомсь, кода кирьпиць арась:
— Адека ширезон... Минь тоса варсжаськ, кият тон...
Пяшкодезэ сяда курок кептеренц тишеда, да сявозэ Тюлэйнь кэттэ ширезонза.
* * *
Кудоц „Шовда-алэсь“ кунаркие явась... Аватнэ куцонза шарсть тов-сей... Тэйсть куд, нарность эзепть начка таргама руцяса... Учсть сембэ сонцень эса.
— Варьжасаськ — кият тон... марявсь кунденголэ „Шовда-алэть“ вайгялец. Паньжозэ кутть и кшмадезэ Тюлэйнь кутти. Лапоць, кода начка лоскод, Тюлэй кияксть лангс.
— Варжасаськ, кият тон... нингэ весть ырназевсь „Шовда алэсь“...
Аватнэ и итнэ, кодак ащэсь куца, стак и шуфтомсть вастозост: киговок нльнэ сельмонц исцэ коньчсэ ся пингть эзда.
„Шовда-алэсь“ сувась куду, путозэ такьянц (вазенц) тулоняс и эзкие шашць Тюлэйнь малас.
— Ну!... Тэни азк — местема эцекшнеть латальт алу?...
— Мес аф корхтат?... Кэльцэ аш штоли?...
Кэжиста юваць „Шовда алэсь.“
Мон сускомнэнь кочказь тряса прязень...
Вармась кандомэнь латальт алу... Ашоль коса удомс...
Тяфта вихца мэрьксь Тюлэй.
[ 12 ]„Шовда-алэть“ сельмонза полцаскать. Щамац якстерьгоць, кода якстерэ кумаць. Пеенза каньзерцть, кода пэляс пинень.
— Ва-а-ськафнят... — мезэ ули вий юваць а сонць кундазэ Тюлэйнь кэттэ да кеподезэ эзем пряс.
— Кулина!.. Архта кантк шнань локшоть: мон нэфца тейнза, кода салама якамс.
Тюлэй нежець стенати и марясы, бта стенать пачк тусь...
— Ну азсак или аф?... — юваць кэжи вайгэльса „Шовода-алэсь,“ — а сонць кеподезэ кэденц Тюлэинь вельксс.
— Мон азые... Кати мезэ тейть нингя азмос... Мон аф салаян, — аварьгац Тюлэй.
— А-а-а! Нингэ аварьдят!
Тюлэй марэзэ, кода вэшкозевсь вельксонза шнань локшось, машць ӥжоц.
Марясы — озсоть моркш (шра) ваксс ярхцама. Моркш лангс пуцть цяра лэм. Куесь ланксонза кафта сур эчкса. Танцти лэм шинесь вачкоць. Тюлэйнь шалхка варяс и опафтозэ шинесонза. Голт-голт ниленць Тюлэй сельгонзон эса.
Вов кода озафтольмэзь ярхцама, — арьсесь эсь пачканза Тюлэй, — цютькэнэ хоть архтолие сединязень.
„Шовда алэсь“ ярхцась лэмннда вишкста. Куцювоць, кода кархкэ стама оцю, тийф тумонь шуфцта. Марясы Тюлэй — азор авэсь пшкэць:
— Коста танга тяфтамть муйть?
— Коста-а-а?... Шкайсь кучезя... Сонць латалу эцесь, — корхтазевсь. „Шовда алясь,“ сонць сэ [ 13 ]пингть эзда варжась шкай ужоть шири и вадердазэ седи вакска, пине пона шири шави сакалонц.
— Макст тейнза апак ватксек модмархть да печьф кшэ. Ярхцай-тии — сэвса мархтон инзама.
Кода пурьхкцэ орхкаць Тюлэйнь сединяц, кда марэзень нят вялхнень... Сонць эсезонза кармась лакама васцонза... Вов-вов, мэрьгат, комоти кияксть ланкста апак тертть, да кармай ярхцама кафта куркса. А седиец тость-тость тостиесь, бта кати мезэ танцти марэсь.
— Хоть сединэзень архца — Мэляфць эсь пачканза Тюлэй. Каруфне цийнасть моршкть перьф, кода мешть. Линцть синь моркшть веляксса и и вешенть истейст ярхцама пэль. „Шовда-алэсь“ изь кенершнэ синнь эйфнемс, стама курокста синь меки валгонцть цярать трвас и шэтьнесть цярать перьф полгоняса.
— Стяк, ярхцак вона мода-марьдэ, да туят мархтон инзама, — юваць „Шовда-алэсь“ Тюлэйнди.
Исцэ марэ Тюлэй, кода озась моркшть ваксс и кода атякш кармась гылтыяма мод—мархнень эса кшя мархта. Эрь модмарсь марявсь, кода шашць сюлонзон пачк и бта эзкие каесь Тюляйнди аф лама вийнэ. Марясы — ёнза кармасть арсома вастозст и виецка тусь сяда касома.
Курокста „Шовда-алэсь“ лоткафтозэ Тюлэйнь:
— Ну, топодеть?.. пшкэць сон и сонць келсептезнэ сельмонзон станэ, мэрьгат вов-вов тэникие севсы.
Эзкие повсть Тюлэйнь крга парезонза ярхцафкснэ и мезнява сон изь корхтав. Сон ванць „Шовда-алэть“ лангс и исця сода, мезэ тиймос. А ванфоц бта эсезонза корхтась: — тэни танга повнь. [ 14 ]Танга сэзьсаман шнань локшоса и кармай кизефнемон — аф салаян ыли.
Но шовда алясь ванць ванць да пшкэць.
Адэ мархтон инзама, — и эзкие лиссь калдазу.
Кода салмокста каракштазь нят валхнэ Тюлэйнь. Комоць сяда курок эземть лангста да тусь ласькозь Шовда-алэть мелэ.
* * *
Васень алашать лангс озаф сонць, а мельганза молить-цёранэ. Цёранэсь, нэймось, мазиняль. Соннэ кимготувошка кизоц. Шамоц лофтана. Ланксонза, начка потмоса, суманнэ.
Кожфть эса лакась сетьма варманэ и ляпоняста вадерэзень Тюлэйнь сембэ начка и коськэ вастонзон. Нулхтацть паксэть эзда жаворонкатнэ и уйфцть всяки лаца морама. Тюляйнди марявсть синь, кода нюдиса морахть. Кеподезэ прянц вэри, да ванц, кода лебордихть жаворонкттнень пацэнясна. Жаворонкада ламоль менелть эса, и Тюляйнди синь нэевсть менелть эса лакай путькскакс.
— Мезэ синь эряфсна, — арьсесь эсь пачказэ Тюлэй, — кеподезь пацэняснон да тусть лиендема. Аш ланксост оцю, аш синнэ крдисна-кардайсна. Кодама мора мэлезост, стама и морахть. Эх, кда тэни улехть пацэнэ!..
[ 15 ]Кеподелень вэри мэнь менелти, да лиенделень. Мезэ мэлезон туль, сэннэ и тиелень, мезэ улель мэлезон сяда ярхцальнэ. Шовондолийнь сембэ аф цебэрь ломатнень. Эста лама вийдон улель. Басенькие попти сафтолие, а сяда мелэ и „Шовда алятингэ“. Кодак лийкстальнэ ширезонза, варжальнэ мезэ тийнди, — эцелонь кудозонза да юводелень.
— Прак плманжа лангс!.. Анак пращенгэ!..
А кда тэль пра, кундалие щэерьда, да шаволиень шэерензон шуфц. Катк кармаль тарксемост эсост тифтень шэернэ. А мелэ — сэволие, да ашкодолие перьфконза сакалонц. Тость!.. тосьтяделие, а сакалстонза: пыркшт-пыркшт комотельхть верхнэ. Мес-ышта шкайсь изь макс пацят? Мон няфтелие, кодама ломаннэ абижамась.
Эрятам сембэ, кати месть эрятам. Щачсь лонць модать эзда, модати и туй. Аф кунара эрясь алэзэ, аф кунара эрэсь дэезэ... Косот тэни синь?.. Мезенди тяфта шкайсь тиезэ эряфть?.. Аш, аф лац тийф яряфсь... Эряфсь лац тийф, да ломат-синць соннь колсесазь. Сэвмос попть: ну, мезэ, сон кодама сон ломань? Аф ломань сон, а кати мезэ. Аш кодамова вал сондеезна лемонь путомс. Валсонза корхтай: кулхцонтт, — а товсонза сонць станя аф тийнди. Сяконнэ и арьси сяда лама цэпозонза путомс, да аф ломаннэ лаца тиинди.
Эсь прянц кельсы а ломатть аф кельги. Аш иль макс шкайсь пацять, — мон няфтелие, кода эрямс.
Ва-алк!.. Мезэ полгаскафнят сельмотнень эса, вандат вэри, — юваць „Щовда-алэсь“
Тюлэй сяда курок комоць алашать ланста и ласьксь „Щовдалэть“ малас.
[ 16 ]— Кильтк алашать инзамати, да уйфть инзама, — мэрксь „Щовда-алэсь“ а сонць варжась васенкие Тюлэйнь лангс, кода врьгас, а тоса шарфтозэ шаманц сокахнень шири и кармась ванома синнь лангозост, кода синь сокахть.
Эрь сокайсь кенордась ков бди сяда курок шумордамс эсь умац да тумос куду.
Шумберьф Тюлэй инзась. Шись улсь пэк лэмбэ. Ливсь-толнь потмоса арась якамати алашать мелэ. А каренза пэшкоцть модада, нльнэ аф канневихть, стама стакат арасть.
Илэть „Шовда-алэсь“ озась моркш ваксс ярхцама, а Тюлэйнди пуцть эзем пряс ярхцама пэль. Ярхцама пялсь улсь сякось, кода шавмода мелэ: апак ватксек модмарьхть, да ташта печьф кшэ.
Топоць тийсь „Шовда алэсь“ семьянц мархта лядыкс сиволень лэмонц мэрксь каямода пиненцты. Аф лама ётка мелэ сон варжаксць Тюлэйнь лангс, конац ся пингонэ нингэ сембя ярхцась, но нэевсь-ни точпнесь, и пшкяць:
— Сявк вона сэзентьф сумманэть да архт матт лапаз пряс, сонць сяда курок прась плманьжа лангс, тиезэ нэренц сюдоф ломань лаца да кармась сюконякшнема сидеста кияксти.
Шись кунаркие валгксь, шопоць и нэвсь, кода шимадма ширеса коцась илэдень зарэсь. Илэц сетьмэ и ков валда.
Аленек, аванек, иднек Пичелэй велеса мадонцть ушу. Курокста крназевсь сембэ велесь, а вармась каннезэ мзнафснон кожфть эзга. Якстерэ шейть эзда марявсть, кода вэкнакхть фкэ фкэнь инголдазь ватракшнэ.