Татю (книга)/Татю/2 пелькс/8

by Раптанов, Тимофей Алексеевич

[ 48 ]

VIII

Ютась аламо шка. Кураедова ендо равжо пелькс менелентень понгавтовсс качамось.

Смелстэ ды малав шаштсь пушкань зэрьтесь.

Велесь сутямс.

Чокшнетнень тейтертнень морамо лаштось полавтовсь сэтьме а чирькавиця кошссо.

Кодамо апаро учось велесь. Ней вана пушка зэрьтесь лукавстувты кудотнень. Стенатнестэ певери вадневть севонесь.

Иничинь каршо венть Колчак эцесь велентень.

Живиясть сюпавтне. Сайнизь кинь кецэ мезе ульнесь.

Таго плеткатне беднякнень копорьс. Таго подушнойть, недоимкат, розгат.

Татю якстеретне марто. Сынь потость Сухоев.

Подбельской станцияс валксь якстерень эшалон.

Анокстасть бойс.

Те туримась ульнесь решающей. Бутим тесэ а кирьди виест — сынь потыть Самаров.

[ 49 ]Лакасть седейтне.

Покш Толкансто Татюдо башка ульнесь ансяк Микита.

Краснойтненень эрявсь содамс таркась. Секс разветкас молеме согласясь Татю.

Арды Татю ласте, латконь латконь трокс, вирень вирень чачк. Овсе эзь пель кулумадонть. Ансяк шкань шкань леде мелезэнзэ эйкакшось, ськирк, моле седеезэ, езакстасы мештензэ ды таго арды. Сон валксь „Торла пулос“. Вирьстэнть парьсте неявсь весе.

Кода Татю велявсь одов, евтнизе ладонть. Ульнесь максозь приказ — наступать! Татю ардсь сех икелев. Пулесь мельганзо столбакс кепетець менелентень. Якстеретне саизь виренть. Колчак сяворьсь Чиханстонть. Пантнэ якстеретнень пеле. Ланксост цятордыть пулеметнэ.

Сухой проволканть занизь якстереть. Велесэнть маряви: ура! ура! ура!!!

[ 50 ]А—а—а! — каятось апак лотксе. Кода лоткасть церьковатне вакс пурнавсть народ.

Татю ардсь ломань гаварнавксонтень. Ансяк веселасто ранкстыксэль: ура!

Иван — Татюнь мирьдезэ ульнесь отрядсонть. Бульчук Колчаконь потамсто човрявсь юткозост. Сон соракадсь. Ванозь таргизе бокастонзо гранатонть. Ещо весть стакасто таргизе оймензэ ды ертсь. Гранатось сезевсь. Татюнь алдо алашась сявордсь. Татю кувсивть вайгельсэ пижнесь.

Иван эзь сыргав таркастонзо, прок пелявсь. Цюпадизь якстеретне.

Татюнь керш кедесь явсь рунгстонзо. кепедимадонзо мейле весела вановтсо варштась армиянть ланкс ды майшсь памитезэ.

Якстере армиясь тейсь эсь тевензэ.

 

---