Татю (книга)/Татю/2 пелькс/2
II
Ютасть иеть. Татю кирди кор, ваны мель. Ве пельде эрявсь савтомс — Иваннэнь, омбоце ендо васькавтомс атявт, ававт. Сыняст савтомс ульнесь седеяк стака.
Таркаст ацылиньзе, валске рана — карест-пракстаст анокстылиньзе — ерылиньзе. Стямо тарказост теиленьзе кардазь ютконь тевензэ, прядыленьзе каштом икельксэнь мелявксонзо.
Спасибох, цю, штобу атявтозо неевлесе штапонь пильк. Велень келес срамасы: Эли озака ярцамсто. Сельмезэнзэ мере: — „Нузякс кандо“.
Штобу илизь стардо кепе пильк, сравтонь черт, стиль зорядо икиле Озы орта ланкс ды нувсезь учи стадань панеме.
Кодамо эрямозо ульнесь те бедной — наяна аванть. Сон пек чавсь пря тейтерькс чинть кисэ. Сюпав чись лепштизе стройной уставонзо, поцизе шачостонзо [ 29 ]цитьниця веринть ды ней прок алкуксонь цеця — кода, соньсь мерьсь — пуйшсь. Варштавольгак тундонь вановтсо чись, велявтувольгак тундонь чевте коштось, те нюрьгамозь цеця седеесь пейдезь одов варштаволь бу чинть каршо. „Чись варшты, монгак одкстоман“ Татю кемьсь тенень.
Весть лиссь истя. Иван таков тукшнось. Арасель кудосо. Татю кизэнь перть уцесь кевень кардсо. Сон панизе стаданзо ды прась таркантень: — „Аламос кош, сутяман.“
Шкась ульнесь недлячинь валске. Валскесь такодамо весела. Маний, атякшнэ тетькить кирга парест. Коштсонть — венелькссэнть такодамо уфт. Весе прок одс чачовт. Чихан пандоськак пейдезь нюрьге леенть велькссэ, лейстэнть кузниця летьке сувось шли шачонзо. Пиже виресь стамбарнэ сюконякшны валскень сэтьме вармадонть. Вирстэнть прыця чевте коштось экшелясы ломаненть, мик мелезэнзэ тееви паро. Карпатя стясь. Саиньзе содавикс таркастонть одирьванть еравт карьсема пелензэ ды варштась вальмава. Летьке чевте коштось кинетстеньзе судо варянзо, ледсь мелезэнзэ — тече недлячи. Теде мейле оршась раужо понгст ды карьсесь лаковой кемть. Рунгонть копачизе ожавтомо желеткасо. Овсе а содаве, што те эрзя. Те одижанть кантли анцяк празникстэ. Шачонзо евардумадо мейле судризе прянзо, касомозо ашо сурбунакс таргавсь келей конястонть пря кунчкантень. Кудряв сакалтнэнь, келейстэ сравтыньзе мештеванзо ды лиссь ортава ушов.
— Вот венельксэсь, одкстомтанзат. — Пшкадсь Карпа атя.
Ушосонть маласо кияк арасель. Карпа варштась рунгонзо кувалт, варштась эсь перьканзо, эзь сода кода ды мейсэ седеензэ витемс. Яля теке палць потсонзо такодамо мель.
— Молян урьванть стявтса. — Пшкадсь ды совась кардонтень.
Татю тантейстэ удость. Мештезэ валковойстэ кепсевсь. [ 30 ]Кольцякс тапарявт черьтне алдо, прок шта поколь, геверькшнесь шачозо.
Карпа атя стамбарнэ, пильге сур лангсо, шаштсь таркантень. Одеял потмонтень пурнавт Татюнь эйстэ пси коштонтень солась седеезэ, лаказемсь сыре верезэ.
— Урьва, урьва — ойме коштсо кортась Карпа. Сакалонзо прок мушко коморо сравтовсть Татюнь валдо чамаванть.
— Вай! Те истя кие?! — снартнесь кирнявтомо Татю.
— Кашт мольть урьва...
— Тетей истя месть тейнят? — Татю нельге прянзо.
Карпа атя сювордызе беремазонзо, сорновтни эйсэнзэ.
— Несак кода вечктян... Урьва маряка мейле весе тонь карми улеме, мезе теть эряви сень тейть... ансяк... — таго палызе штекас. Татю кундызе прячерьде ноцковтынзе мекев лангт. Карпа атя букакс паразевсь. Стясь, сельгсь ды туйсь.
— А эряви монень ули парот! Сельмень а сявадыть тонь лангс...
Атясь хлопадизе кенкшенть, покордавозь тусь.
— Стака мор саевлессе, — корты ськамонзо Татю вейке прок ишак палци шачен эйсэ ды эщо омбоцеяк эци... Секс, сыре шайтян, ков а ютан, читькак токасамам, эли пейдезеви. Овси эзинь фатя. Думат, што ли, коле сон истямо „пазонь соды“ тфу!.
Васня, Татю арсесь пейдезевеме. Апарось неждясь седейзэнзэ, кармась авардеме, нерькстызе прянзо тодовонть подс...