Пици-палакст/Микитань грехезэ
| ←Вете иетне кадовсть удалов | Микитань грехезэ (1926) сёрмадызе |
Чись лись→ |
| Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930. — с. 13—32 |
МИКИТАНЬ ГРЕХЕЗЭ
Ки а вечксы се шканть, знярдо манейдеяк маней чистэ апак фатя туи маней пиземе, прок лембе вецэ начтасы моданть ды теде мейле ургатить касомо пиже лугась, сюротне, эмешне ды панкнэ.
Истямо шкасто кинь арась мелезэ ютамс паксява, ваномс, кода лыйни лугась ды пиже сюротне, ютамс вирьга ды ванномс, кода пургондыть чахра-цецятне ды липнить, прок кортыть, пиже лопатне.
Истямо шкасто эрьва стяко чись неяви празникекс, эрьва стяко чись канды покшт мельс парот мастор ланксо эрицятненень.
Седеяк мазыйстэ, седеяк валдосто неяви истямо шкасто виде-паронь празник чись. Наряжить празникстэ од ломатне, каясызь стяко чинь кедест сыретнеяк, стувцызь аламос кудонь-чинь мелявксост. Оймсить кедест-пильгест. Оймсить ёжост-седеест.
* * *
Истямо мазый шкасто вана сась Петровка веленть содавтомо тедидень троицясь.
Чизэ эзь кенере куземе ве чувтонь сэрьгак, Петровкань церькувань сторужось Микит-атя ульнесь уш церькува прясонть и тейсь эсь вечкима тевензэ. Покш баягась увнось, прок ведь бука, обедняв терць Петровка велень народонть. Ломатне кувать тердима эсть учо: веленть эрьва [ 14 ]ёндо прок реветь мольсть церькувантень. Свечатнень рамасть пачкасо. Эрьвейке норувась стявтомо свечанзо се пазаванть икелей, конань ланксо рисовазель „троицясь“.
Алтарьсэнть Федоров попось анокстась обеднянь служамо. Сон течи мекс-бути ве таркасо эзь аште: алтаренть уголдо-уголс онкснесь ды салава тонавць проповедь. Умок уш Федоров эзь аноксне прянзо проповец. Комсь сисьмее иеть уш служи попокс, весе церькувань службанть вете суронзо лацо содасы, проповетнеде тысщат ловнось, содасы, кодамо вал марто лисемс народонть икелей. Но тече мень-бути варма ютась ланганзо, лоткась, нать, паметэнзэ ланкс надиямодо, — секс аноксты проповедентень.
Алтарентень совась Микит-атя ды кармась престолонть ланксо свечатнень курвастнемест. Федоров месть-бути кевкстиксэль кецтэнзэ, но се шкане алтарентень совась диаконось. Федоров истяк и кадовсь апак корта Микит-атя марто. Сторужось лиссь алтарьстэнть, попось кармась обеднянь служамо.
Федоров — обуцянь коряс стакаль. Пазава марто якамсто ливтька тензэ цилякто аламо товзюрот — сраматанзат весе. Понги эйкакш пильгензэ алов — пиле-юр каи тензэ; ульцява молемстэ вастындерясак ды а сюкониньдерят тензэ — кирть ансяк. Ендолт-пурьгинеть кармить прамо лангозот.
Весть истямо тамаша лиснесь. Инечи-юткстонть велеванть якасть молебень марто. Весе церькувань причтэсь ды моравтыцятне пазава марто якасть кудодо-кудос. Федоров мольсь моравтыцятне икеле. Кецэнзэ ульнесь крёст ды кропилка. Моравтыцятне юткс кода-бути кальдявсть кавто эйкакшт: вейкесь ведьгев азоронь цёра, омбоцесь — Кандрань Петрань цёразо. Кавонест сюпавонь. Федоров истя паринзе сынст кропилкасонть — эйкакшнэ кудов молимань перть ранксть пиже-ожо вайгельсэ. Тетятне пек кежиявтнесть Федоров ланкс, мартонзо сёвномо сакшность. Федоров мик кортамояк эзь карма, поп-аванзо кучизе: азё, келя, мерть: попонтень тынк марто кортамс аместь.
Те обуцясь эзь тукшно народонь мельс. Ламоксть думсесть панемензэ велестэнть тень кис. Ансяк вадря вайгелензэ кис кирць Федоровонь Петровка велесь. [ 15 ]Астяк, нать, Федоров кемень иеть служась епархиальной соборсо, архиреенть икеле.
Кодак серьгеди Федоров алтарьстэнть — весе церькувась карми зэрьнеме, ломатнень седеест соракадыть, телаваст кармить коткудавт чийнеме. Тень кис вана вечкизь Федоровонь. Паро службанзо кис кирць эйсэнзэ велесэнть Петровкань озныця народось. Саемс куть течинь чинть: Федоров служась обеднятнень истя парсте, истя парсте, кода колияк эзь служа. Мекс пек стараи? Эли тедидень „троицясь“ пек мазы, эли пек вадря он несь Федоров, эли мезень кувалткак седеезэ палы? А содави. Чопуда ломань потмось.
Соласть народонь седейтне: ве ёндо кизэнь чись эжди, омбоце ёндо — ойме нильксэс пачкодиця Федоровонь вайгелесь: кой-кона чернечкатнень мик сельведест тусть.
Ютась обиднянть пелезэ. Микит-атя уш „достойноентькак“ чавизе церькува прясо. Федоров лиссь амвононть ланкс проповедь марто. Народ кашт мольсь. Умок уш эзь лисне проповедь марто попось. Мезде-бути кортамо карми течи?
Аволь икеле лацо кортась течи Федоров. Аволь икеле лацо. Течи Федоровонь валонзояк лиятальть, вайгельзэяк а икелень кондямоль — урнезь урнесь. Колияк эзь пеняця истя Федоров, колияк истя эзь виздилгавтне народонть берянь тевензэ-валонзо кис.
— Эка корты — прок пешть чулгони! — тошказевсь ялганзо пилес церькувань старустась Хролань Илька.
— Иля кортаяк! — дивси ялгась. Косто зняро валт саи, прок кинигасто ловны...
Весе народонть проймизе Федоровонь проповедесь. Ков иля варшта, эрьва ёндо ваныть иконостасонть ланкс абунгадозь чамат: месть тейнемс? Ков кекшемс сельтнень пазонь ликтенть?
Проповеденть прядома ёнов Федоров кепедизе верев кедензэ, суронзо венстизе икелев, чамазо весе ловташкаць, народонтень покш вайгельсэ:
— Мейсь те телесь пек якшамоль? Мейсь ловось пек куватьс эзь сола ды видеме кармиде позда? Пазось лоткась моданть коронзо кирдимадо. Пазось велявтызе чаманзо мастор ланксо эрицятнеде. Ютась пазонть [ 16 ]кирдима-шказо. Секс. Секс. Появасть од ломать. Появасть мень бути клубт, ячейкат. Мень-бути од валт, од арьсимат: пазось, келя, арась ды арасельгак, попнэ, келя, шанжавт, церькувась, келя, народонь маньшима тарка...
И сорны, и дивси народось. Колияк Федоров эссе токше политиканть. Сисемь иеть уш эри советэнь властесь Петровка велесэнть. Федоров хоть весть маняволь. Хоть весть ёвтаволь вал-синцть политикадонть. Колияк а паро́ ёндо́, а берянь ёндо́ эссе лецне советэнь властенть. Эрясь каштом ланксо каткакс: эзь неявт, эзь марявт, содась ансяк церькувань тевензэ, служась, эсинзэ валкс, пазонтень ды народнэнь. Мейсь эно течи лиякстомсь Федоров? А Федоров прок чарькодинзе народонь дивсематнень:
— Мон истямо валсо вестькак эзинь корта мартонк. Течияк аволинь корта. Ды колияк аволинь карма кортамо, аволь неявтдеряй тень исинь вене вейке видения. Чуда, братият, чуда. Кепетець, буто, варма и салызе монь кудонть прянзо. Се шкастонть сырьгась зоря тештестэнть валдо сруна ды новольсь монь кудонтень. Се срунанть вельде, братият, каятоць тосто вайгель. Кие кортась тосто — пазось эли сонзэ ангелэзэ — а содан. Повнясынь ансяк валтнэнь. Кода маринь не валтнэнь, телаван кельме ведь валовсь, прячерень дубушки стясть...
— Бачка! Бачка! Пазавась... Пазавась... валдоммо кармась. Чуда, бачка... Чуда... Истя месть тейни пазавась? Ванодоя!..
Те сеересь сторужось — Микит-атя. Федоров кармась сорномо. Народ талакаць. Весе кармасть ваномо уголонтень, косо поводезель „нерукотворенный образ Христа“. Комсь иеть уш ашти уголсонть те пазавась. Пиже чекеренть алдо содавсь ансяк (сеяк аламнеде) Христозонть судозо. Остаткась ульнесь раужо лаз. И течи, ней вана, народонь сельме икеле кармась теевеме а неимань, а марямонь чуда: Христозонь ликесь яла валдомсь ды валдомсь. Кавто-колмо минутто мейле кармась содавомо конязо, мейле сельмензэ, эщо седе тов — чамазо, мештезэ.
— Ванодо, пазнэнь акемицят, ванодо! — ранкстась Федоров. — Ванодо ды кемеде. Пазось те шкане ютксонок.
[ 17 ]Народось прок превстэ лисеме кармась. Веенстнэ кармасть эцеме пазавантень, омбонстнэ ушов, колмонстнэ сынськак эсть сода ков молемс. Федоров яла глушась:
— Страшной судось маласо, братият. Седе курок ознодо грехенк, седе курок. Седе тов — поздаятадо. Стака ули пазонь наказаниясь!
Ломань кельсэ парсте а ёвтневияк, кода кармась прянь чавомо народось: пракшнось весе кумажа ланкс, коняст чавсть кияксонтень, ранксть прок вишка эйкакшт. Ламот ёжовтомо валяясть киякссонть, ламот прок ормас поланявсть. А пазавась яла валдомсь ды валдомсь.
Федоров и радувась и тандаць. Обеднятнень шкадо икеле прядынзе ды салава, бокасо кенкшканть, тусь кудов.
Псаломщикесь, диаконось ды моравтыцятне — пурнавсть куцяс и а содыть месть тейнемс. Пазавась жаркс паломо кармась. Христозонь ликесь конянзо алга вансь народонть ланкс, прок а мельсэ аштесь, мейсь сонзэ стявтызь кувака вень удомсто.
— Косо о. Георгий? — кевксни диаконось псаломщикенть.
— Сон тусь кудов... ёжозо мейсь-бути беряньгаць.
— Тон, Николай Андреич, мезеяк чаркодить те тамашастонть?
— Куть печкимак, а содан: чуда те эли шарлатанства?..
— Кодамо... мень шарлатанства, Николай Андреич? Месть тон истя хулят?..
Псаломщикесь ансяк прясонзо чаравць.
Кода народнэнь сась ёжо, весе кармасть эцеме пазаванть паламо, пештизь икельксэнзэ свечадо.
Кудова сралемстэ ламонень савсь ютамс ячейкань клубонть вакска. Улевельгак сестэ ломатнень сельмсэ пултамонь вий, клубонть таркас кадоволь ансяк кулов пандя.
* * *
Кеместэ удось Петровка велесь. Ульцятне кашт мольсть. Мик киска вайгель костояк эзь марявт. Ансяк [ 18 ]ковось ловтаня чаманзо марто, прок злыдня, азгонсь веленть велькска.
Орькс-овтокс ащесь веленть куншкасо церькувась. Тумо юрсо овтонь пангокс кукштась экшезэнзэ сторушкась.
Кеместэ удось Микит-атя. Мезеяк а теят — сыредеме кармась: сыре удемтне ды ловажатне бажить вадрясто оймсеме. Ансяк меельсь пелев мень-бути тамаша ютась Микит-атянь ланга. Мень — сонськак а соды. Те вентькак вана, кода весе ломатне лоск удыть, Микит-атя сыргойсь, ки бути прок пукшос скирдизе.
— Осподи! да воскреснет!.. Осподи, мезе... ки истя? — тандадозь моткоди Микит-атя.
— Покштяй? Истя мезе куроли эйсэть? — кевкстизе Микит-атянь марто эриця сторуж ялгазо. — Истя мезе муинзеть, моньгак сыргостемикь...
— Ки бути скирдимем, Игакай, пек скирдимем пукшос... прок цигаркасо пицимем...
— Ки ней скирдятанзат, месть плетят конат а эрявить. Пецька лангось видьме лукшто пешксе... вейкешка и пезнась тонть пукшонтень...
— Иля, Ига, цёрам! Те аволь видьме лукш. Мария, кода ломанень сурт, покш кенже марто, скирдимизь...
— Тон мадимадо икеле теньсек яла аламодо алксот. Седе а кармить улеме скирицят...
Игань нерванзо — букань содомо пикст. Эзь кенере остатка валонть прядомонзо — матедевсь уш мекей. Прок эзь сырьгозекшнэяк.
Микит-атя кувать велявтнесь бока-бока ланкс. Тарказо кодаяк а лади.
— Мень тамаша истя? — моткоди Микит-атя. — Комсь иеть уш уцян ье пецьканть ланксо. Алксом теде чевте арасель вестькак. Уцинь яла. Чевтель. А ней? Мень апаро истя?... Нать сыредеме карминь...
Микит-атянь пилес каятоць баяга вайгель. Весть, кавксть, колмоксть. Аволь пожар? Лоткась баягась. Ки истя азаргали? Кинь кедензэ кинетить? Ульцянь цёратне кольнить. Микит-атянь дразнить. Кода сон, Микит-атя, седе од ульнесь, аволь вейке цёрка (ламот уш ней урьвакстозь) парясь цёрькувасо азаргалиманть кис. Стакаль Микит-атя обуцянь коряс. Кедь ланксо [ 19 ]овси айаштиль. Ды кежеельгак. Астяк велень од цёратне пуцть тензэ прозвания „Киска-Микита“. Нейгак яла те прозваниясонть сеецтэ тензэ мерить.
Микит-атя стакасто укстась. Ламо ломань марто сёвномат-спорт ульнесть. И весе церькуванть видьга. Мезень кис? Кинень те эрявсь? Пазонтень ды попонтень?.. Попонтень эрявсь. Те — виде. Но эрявсь ли пазонтень?..
Микит-атянь потмозо жуйк мерсь. Пачк истя вана: кодак пачкоди пазонть виц, истяк аламодо соракады седеезэ. Умок ли мелявкстомо эрясь Микит-атя. Шожда седейсэ тейсь сон церькувань тевензэ. Пек вечкизе Микит-атя церькуванть! Кода эщо вишка эйкакшоль, совиль лиясто церькувантень — сельмензэяк срадыльть сиядонть ды сырнеденть. Думиль сестэ Микит-атя:
— Пас меревельгак монень тезэнь служамо арамо — оймем, некак, путовлия церькувантень.
И мерят, прок пас маризе Микитэнь осксонзо се шкане. Се шкань сторужось Федот-атя сырель уш. Эрявсь тензэ паро посублиця. Примитизе сон Микитэнь. Кармась тензэ макснеме шожда тевнеть: жаровня курвастемс, кадила уголиядо пештямс, свечат курвастемс ды мацнемс пазаватнень икельга, лемдямо шкасто — ведь кандомс купеленть шлямс, ды стяко чинь чокшнэ звонямс вечерняв.
Микита виде-паро оймензэ пуць церькувантень: стяко чине церькувасонть, празникстэ церькувасонть, чинек-венек сти пры сторушкасонть. Сторужось, Федот-атя, ломанесь ульнесь аволь кодамояк: сон Россиянть нучк-пачк ютызе: Дальной Востоксо ульнесь, Баку-ошсо ульнесь, Крымсэ ульнесь, Соловецкой манастырьсэ ульнесь. Косо ансяк арасель Федот-атя! Яла теке эсь веледензэ башка козоньгак эзь пекста.
Федот-атя а вечкильсе ютась чидензэ-ведензэ кортамонть. Кинень, келя, мень тев, кода ломанесь эрясь ды кода эри ней? Ансяк Микитанень сон кой-месть ёвтниль. Федот-атянь эрильть истят шканзо, зярдо сонзэ стартнильсе мень-бути тошна. Истямо шкане Федот-атя кучильсе Микитань кабаков пельбутулкань кис, симель се те порциянть ве куркс ды кармиль ёвтнеме Микитанень эрьва мень диковинкат. Маштыль ёвтнеме Федот-атя. Паметэзэ ульнесь тувонь. Морточкань пес повнилизе, [ 20 ]косо ульнесь, кува якась, месть тейнесь, кинь вечксь, кить сонзэ вечкизь. Кевкстизе весть Микита:
— Федот-покштяй? Мейсь эно сыть эсить велев? Эрямаль теть косояк лембе масторсо...
— Эх, Микит! Тюжат эщо курго уголот! Чавка левксат эщо, цёркам, арась эрямонь чаркодимкат... Мейсь сынь эсь велев? Ламо якамо якинь, весе светэнть онксния. Ламо сякой ломать неинь. Лембе масторось сестэ ансяк лембе, зярдо зепсэнть чоледить-каштордыть ярмакт. Эсь шачума велесь куш берянь, куш амазый — яла теке эсить. Ломатне эсить, виресь, паксятне эсить. Ламо якинь, ламодо сельмем несь, ламодо пилем марясь — ну и саты. Остатка читне ютавтомкат эсь родня-ялга ютксо. Ловажатне-пакарьтне калмамкат эсь калмазырьс. Секс сыньгак кудов, Микит цёрам. Сынь ды церькувантень кундынь. Робутась тесэ аволь пек ламо, шождыне, читне ветне ютыть сэтьместэ... Пазонь кедь ало.
Повнясы Микита кода весть Федот-атя мерсь тензэ:
— Цёрась тон, Микит, одат ды чуморксат. Кудонь тевсэ апак сюлмазят. Ютыть монь слетнэнь куть пелест. Вансак кода эрить лия мастортнэ ды лия ломатне. Панжовить сельметь, цёра, валдомить преветь. Лия ломанькс теиват, цёрам. Тонсьтеть содавомо а кармат.
Кулось Федот-атя сэтьместэ, апак фатя. Чокшне эщо шумбра ульнесь. Евтнесь Микитанень эрьва мень историят. Пеле-веде икеле маць Федот-атя вень удомас шумбрасто, мезеяк эзь думаяк, пря мик шнась: мон, келя, эщо ведьгемень иеть эрян масторонть ланксо. Маць Федот-атя — и секе стявтозо: валське чись лиссь сонтемензэ.
Калмизь Федот-атянь истя жо сэтьместэ, кода кулоськак. Гропонзо велькссэ лайшицят арасельть, калмазырев ильтясть эйсэнзэ ниле-веть ломань ды Микита. Аварьць Федот-атянь кисэ Микита ськамонзо.
Кулось Федот-атя. Киненьгак эзь кадо а горя, а забота. Семиязо арасель, арасельть кудонзо-чинзэяк. Истят ломатне парсте ладявить суслик ваксс. Ардат лиясто паксява. Ванат, кинть эйстэ аволь васоло суслик норанзо велькссэ. А кенерят малазонзо пачкодеме, сусликесь вешкезеви ды секе неевтезэ. Ютат норанть вакска — и сеске стувцак, прок колияк эзик некшнэяк [ 21 ]сусликенть. Истя Федот-атяяк. Зярс тарнось масторонть ланксо, якась лома юткова, ломатне знярс содасть эйстэнзэ. Ансяк кенерсь куломо, ансяк кенерсть мода поц валямонзо — сеске стувтовсь. Мик калмазырев кандыцянзо мекев самсто кортасть уш лия тевде. Федот-атянь кияк эссе лецне, колияк прок эзь шачнеяк масторонть ланкс.
Ансяк ве ломань эссе стувт Федот-атянь. Лёмзий лацо педясть Микитань седейс Федот-атянь валтнэ, васов пезнавтызь корёност, куроксто нолдасть роскат.
Кувать думась Микита, кода ней кармамс икеле-пелев эрямо. Ялгадонзо-оядонзо сон уш умок отказась, пеецть ланксонзо ялгатне — церькувань крисакс ловсть эйсэнзэ. Од тейтерьтнень малава ютамонзо пелиль. Стувтызе сон, кода кортамскак мартост.
Месть тейнемс? Кода кармамс эрямо? Эли понгавтомс кирганть петляс? Жаль маряви эсь прясь. Од эщо. Куломс комсь ветее иесэ — апек мазый. Микита решизе эсь судьбанзо: эряви туемс Федот-атянь слетнэнь вешнеме. Кудонь тевсэ лезэзэ яла теке арась, кемень иеть уш сти-пры церькувасонть. Тетязо кирдиманзэяк а карми, кавто лелятне радувить: сынест кадови весе улись-парось.
Кода Микита думась — истя лисськак. Тетязо ризнэстейсь, лелятнеяк аламодо, мелень кис, уйх-вайх мерсть, ансяк сыре авазо аварьсь седейшкава, ансяк авань седеесь токавсь нилькс виц, ансяк авань ёжось вейкецтэ макссы лембензэ весе эйдензэ туртов.
Ильтизь Микитань лембестэ. Авазо тензэ кошксеть костясь, тетязо колоньгемень целковой макссь (те Микитань явонь парозо ульнесь), покш лелясь ускизе станцав. Тусь Микита. Чихан пандонть прясто остаткадо варштась Петровканть ёнов, крёстась колмксть церькува прянтень, нардынзе кавто ёнов сельведензэ и озась крандаснэнес. Кадызе Микита шачмо велензэ. Кизэ ветизе Киёв-ошов.
* * *
Ютась комсь ие. Секе таркасонть ял эрясь Петровка велесь. Теке лацо чудесь кувалманзо „Эрямо леесь“, теке лацо велявць те леесь ниле ведьгевть — яжась [ 22 ]народнэнь почт. Теке лацо орькс-овтокс аштесь Петровканть велькссэ Чихан-пандось. Ансяк котьмерензэ ланксо покш тумо виренть таркас ульнесь ней кудряв роща.
Секе таркасонть яла аштесь велесь, ансяк кой-кона кудотне пек таштомсть ды калмазырьсэнть крёстнэ ламолгацть. Церькуванть ланксто сандалонь краскась олась, ансяк крёстнэ икеле лацо жаркс палсть ды пирявтонть поцо садось кайсь покшсто ды мазыйстэ.
Аштима ковнэ, стяко чистэ чокшнэ малав уш, больницянть ёндо валксь велентень ломань. Прясонзо сукнань шляпа, кецэнзэ крюка-палка, котьмерьсэнзэ сумка. Ютась ломанесь куншкасо ведьгевьтне вакска. Здорувакшнось яжицятнень марто, кой-кинь содась юткстот, но сонсь киненьгак эзь содавт. Ютась покш ульцяванть, ламо ломань понксь каршзонзо, ламонь содась, сонсь таго киненьгак эзь содавт.
Пачкоць Гришинкань Петрань кудонть икелей. Вальмало завалинканть ланксо озадо сыре-сыре бабине, ваны пеле сокор сельмсэнзэ чинть валгуманзо ланкс.
— Авай, живат яла?
— Живан... кият тон? — Бабинесь варштась: икелензэ сакалов ломань. Мекс те ломанесь авай мери тензэ?
— Мон... Микита... цёрат.
— Микита, левкскем! Сыть нать. Сыть, чи валдынем...
Каявсь Микитань кирьгас авазо, валызе авань сельведьсэ, майшь дарманозо и новольсь мешок лацо завалинканть ланкс.
Ки куть аламодо содасы, кода авась пии-палы эйдензэ-тяканзо кис, се чаркоцы завалинка ланксо аштиця бабиненть. Весе минь, аванок поцто лиситне, кискань кондяттано. Зярс аванок ловсодо потятано, зярс ававтомонок а оршави лангонок, а карцевить пильгенек, те шкас эряви тенек авась, те шкас ловдано эйсэнзэ ломанькс. Кодак аламодо кастано-кепеттяно, кеденек кармить кургозонок кепедевеме — аванть парозо стувтовсь.
Микитаяк истя: комсь иеть арасель шачума велесэнзэ, кува якась, месть тейнесь, кодамо ломань марто вастнесь — сонсь ансяк содасы, но аванзо вестькак эссе лецне. Мерят, пандо чамасо аштиця кев сонзэ шачтызе. Ней вана, кода неинзе аванзо сельветнень, эсинзэ седееськак калаць. Чаркоць сон, тувокс вансь аванзо ланкс.
[ 23 ] — Микита, эйднем! кува знярс ёмсить?
— Васолга якинь, авай, ве валсо а ётвневи...
— Зняро ризнэмка ульнесь кисэть, цёрам: умок уш кулозь ловитень. Ламо сорокоуст служавтынь ойметь кис. Леметькак поминанияс сёрмацтыять...
— Кода эрятадо тесэ, авай? Парсте — аволь?
— Мезень-парсте. Аместь кортамскак минек эрямодонть. Тетянть куломадо мейле, тонть лелятне кавонест чияк вейсэ эсть эря. Явсть. Мон кадовинь Петра марто. Ломанесь Петра-низэ содылик кодамо: чирь вал иля ёвта сонзэ меленть каршо, сельметь-чамат аксырясынзе апаро валсо. Берянь эрямом, цёрам. Эрьва кше сускомонть ловсы тень урьвась, нуцькатнеяк мезекскак а путыть эйсэнь. Петранень иля кортаяк: куштавт оно, мери, пецьканть ланксо ловажатнень — теветькак секе.
Чинек-венек учан куломанть, Микитакай. Пазоськак, нать, стувтымем. Моньдень од ломатне кулыть, а мон?..
Наказамонь кис, нать, пазось кирди эйсэн масторонть ланксо...
Микита кунцолось аванзо эрямонть-аштиманть — и тарка эземь эзь муе, истямо ансяк стака тошна свистизе седей-мотькензэ. Кирьга парезэнзэ куйсь мень-бути ал и эзь макст тензэ кортамо оля. Мезе аволь макст Микита, оймензэяк путовлезе, ансяк аламодо мазылгавтомс аванзо остатка читнень. Но мезе теи Микита, коли сонзэ панар полавксозо арась, коли сонзэ весе улизэ-парозо — ташто шляпазо ды брезентэнь сумказо, коли сон сонсь комсь иень азгоньдемадонзо мейле сась ломань кудосо эрямо.
Кудов самсто Микита эщо кой-мезе ланкс надиясь. Тетянзо-аванзо паряк живть, кавто лелянзо, максыть тензэ уголнэ, эсь пекезэнзэ яла роботасы кши сускомонть. Аванзо марто кортамодонть мейле Микита чаркодизе, кода эрить кудосонть: сон а кельги эрямо те кудонтень.
— Цёрам, косо ней эрямо думат? — кевксни авась.
— Козоньгак тонкса прям, авай: церькуванть малас аран, а паньсамизь...
Повнясы Микита, кода лелятне вастызь: ланкс ваномс прок радувасть, винадо мик каванизь, но вейкесткак эзь мере: эряк, Микита брат, монь марто. Ладна куть шкась [ 24 ]кизэ ульнесь. Недляшка эрясь Микита Петрань латало. Мейле сонзэ аравтызь церькувас сторужокс. Церькувасонть служицятне парсте повнясызь Микитань, кода сон эщо од пинкстэ оймензэ пуць церькувантень. Федоров попось комсь ветееце ие уш служи Петровкасо, Микитань содасы эщо од цёрынестэ.
Ташто однасумтнэ пель сядо иеде мейле вастост, яла теке а стувтыть вейкест-вейкест. Федоров попось коли бути баславизе Микитань масторонь келес якамо-пакамо. Ней, кода Микита сась кудов шумбрасто, Федоров паро мельсэ вастызе и аравтовтызе сторужокс.
Истя Микита пекстась таго эсь шачома велезэнзэ. Истя Микита прядызе комсь иень азгоньдиманзо. Федот-атянь слетнэнь сон весе ютынзе, ды седе васовгак пачколесь — Афонсо мик ульнесь. Ней Федот-атянь таркас арась и алтызе эсь прянзо церькувантень ды пазонтень.
Повнясы Микита сеньгак, кода састь войнасто эсь велень колмо салдат ды тусть мартост лия поряткат: ней келя, революция, сюпавтнэнень каюк сась, пазонтькак майшь честезэ. Сюпавтнэнь коряс Микита местькак эзь корта — сынь аламодо свистямкат, но пазонть мейсь токшемс? Мезень чумозо сонзэ? Секс самай кельмесь как Микитань седеезэ од властенть эйстэ.
Служась Микита церкувасонть седейшкава: мелезэ витезь, пекезэ пешксе. Мезе эщо эряви сыре ломаннень? Попоськак пек вечкизе сонзэ, пособлясь тензэ превсэяк, тевсэяк.
* * *
Пек вадряль Микитань ёжозо. Ансяк тедиде сонзэ эрямозо стясь прянзо ланкс. Омбоце ков уш эль юты чудадонть мейле, и омбоце ков уш кода кадызе Микитань вень удомась. Чись седе шождынестэ юты: мелявкснэ байтяк, чинь-чоп тевсэ — тей-тов. Кодак сась весь — хоть кулок: икелевгак ледить мельс народонь пря чавомкатне, тень пес кирекс тапарявомо кармить лия лецнимат, конатнеде ливезь-пар поцо велявтат. Ансяк матидеват — телават мень-бути скирятомат туить. Мень тамаша истя?
[ 25 ] Аволить укста стакасто — ды укстат. Ведьгемень колмо веть ломанькс апак удо — кшнинь ломаньгак а цидярды. Мезень кис не пиштемкатне весе? Пазонтень, нать, эрявить?... Ки истя мерсь? Федоров? Тарка-эземь илязо муе те ломанесь...
Микит-атя тандаць мик истя думазевемадо мейле. Вадря ли истя думамс кодгемень вете иесэ атянень? А чавданзат ли пазось истя думамонь кись маней пургинесэ? Ки чумось, мекс сон, Микита-атя, сыре прясонзо кармась истя думсекшнэме? Кинь совесть ланксо ашти те грехесь?
Ушось пешкець атякшонь вайгельде. Чи лисима ёндо курвайсь валськень зорясь. Аватне стякшность скалост потявтомо.
— Таго ютась весь апак удо. Знярс эщо карман истя пиштеме? Знярс эщо карман седей нильксэм пилямо? Мезень, мезень кис? Эх, анахима, анахима!
И Микит-атя кодгемень иеде мейле кроязевсь васенцце „ава лемсэ“. Сонськак мик визделгаць.
* * *
Ломатне вейке-вейке марто апак корта, вейкенень-вейкенень кулянь апак пачтя масторонть ланксо а эрявить. Истямо уш ломаненть ладозо. Телефон, почта, телеграф, радио — ды... кувака кель ломатне чинек-венек кантлить масторонь келес эрьва мень кулят.
— Тон марить седе?
— Киде?
— Ды седе... сон, келя... а кортамкаяк эйстэнзэ.
— Эно мезе! Маринь умок уш...
— Ну, тонть койсэ кода?
— Месть кортамозояк — сукань свадьба. Лиякс кодаяк а мериват.
— Олодя-Васянь, келя, тейтерезэ пешксесэ...
— Месть? Кинь пельде?
— Чи пас. Моньсь неиньгак...
Эрьва велесэ улить ломать, конат пингест перть ансяк вейке седеень витимка содыть: эрьва чине ёвтнемс народнэнь свежа кулят, конат вина лацо пряс педяст. Косто саемс истямо кулятнень велесэ? Ков иля чаравт — [ 26 ]сур прядо ды потолокто башка саемс а косто. Истямо кулятне эрявить думамс, эряви маньшемс. Народось, кеми.
— Анокстадо салонть запайс.
— Мейсь истя? Эли мезеяк улеме карми?
— Оренбургонть занизь казакт. Салонть а кармить нолдамо Росияв.
Народось кеми. Потребилканть икелев касы пуло — весе велесь скопом карми сал рамамо. Кармат кевкснимаст — мейсь истя пек саить салонть, косто марясть казакнэде, кияк мезеяк а соды; ки-бути косто-бути марясь, ки бути, косо бути мерсь. Месть мерсь, кинень мерсь — азё вешник.
Петровка велесэ Троицянь чистэ валдомсь Христозонь нерукотворной ликезэ, чудась пек покш. Пазавась валдомомадо башка местькак эзь тейне, но парт ломать, кувака-кель ломать те кулянть ёвтнизь омбо велев лиякс, пряс педицякс:
— Тынк велесэ, келя, пазава валдомсь? — кевксни омбо велень ломанесь.
— Валдомсь, валдомсь! Дивась а кирдевемашкаль. Пазавастонть валдомомадо мейле кортыця вайгель мик марявсь. Грехенек эйсэ озновць...
Омбо веленцесь ёвтни эсь велесэнзэ седеяк пряс педицякс:
— Петровка велесэ, аля, Христозонть ликезэ валдомсь; истяшка чуда ульнесь...
— Косто марить? Евтника седе парсте!
— Ломань кельсэ парсте а ёвтневияк. Троицянь чистэ достойноенть чавомадо мейле, Христозонь ликесь, коната комсешка иеть пиже-чекерь поцоль, валдомсь. Секе шкане церькува прясь штатоць, менельстэнть валксть пазаванть ланкс кавто ашо столбат. Теде мейле пазавась кармась кортамо ломанень кельсэ, озновць народонть, советэнь властень ды комунистэнь пек сюдось, модас-човарс нолдась эйсэст...
Лия велесэ таго лиякс ёвтнесь те кулянть.
— Петровкасо пазава валдомсь. Ламо чудат уш тейсь: сокорт лечась, кичкере кеть виць, седей-максот пичкавць.
Недлязонзо сядо велес пачкоць те кулясь, эрьва велесь эсь койсэнзэ ёвтнизе те кулянть. Уездэнь келес [ 27 ]сраць те кулясь — и эрьва таркасо толкувазь лиякс. Эрьва ёндо сырьгасть Петровка велев ломать: сыреть, от, цёрат и ават, шумбрат и сэредицят.
— Молян сюконян корьминецентень, а пичкавцы ли потмом, паряк шачнеме карман...
— Скотинанок эрьва кизэне кулыть, молян энялгадан спасителенть икеле, паряк паньсы кардайстэнек нечистоенть...
— Мирдем пек лия ава ланга чийни. Молян пеняцян лангозонзо... паряк, кардасы сонзэ пазось...
Мольсть и мольсть. Весе надиясть. Вейкест-вейкест лацесть.
* * *
Омбоце пель ковонь ютазь Петровка велень советэнть икелев арцть дрошкасо кавто ломать. Совасть велсоветэнтень.
— Ки тесэ председателесь?
— Мон, ялгат, — тандадозь лацо мерсь Трошань Вася.
— Салавань валонок улить мартот кортамс...
„Кить истя не ломатне“ — думазевсь эсь пачканзо эрьвейкесь, кона се шкане ульнесь промкс-кудосонть.
Кода Трошань Вася совась ошонь ломатнень марто библиотекань комнаткантень, вейкесь кармась кевкснеме:
— Минь сынек чуданть коряс следствань ветямо. Тон местькак ёвтнят те тевденть?
— Вай, пасиба тенк! Ойменек паряк идисыньк. Эрямоноккак маштынзе те причань чудась.
— Кода тынк койсэ: косто лиссь те чудась? — таго кевксни следователесь. — Кинь тестэ сех икелей кундамс пря кетте?
— Шайтят, брат, содасызь косто лиссь те чудась. Минь минсь церькувасонть а эрситяно, кортыть, яла, прок виде-паронь чудадо...
— Кода истя а содатадо? — кежейстэ мерсь следователесь.
Судонк ало попнэ истяшка контреволюция теить, а тынь те шкас а содатадо — косто лиссь те шарлатанствась. Мезень кис эно коммунисттадо?...
Трошань Вася истя визделгаць, ве валгак эзь муе следователенть каршо.
[ 28 ] — Пурнак течи промкс, — мерсь меельсь пелев следователесь. Попоньтькак тердемс, весемень пинкстэ тейдяно тензэ допрос. Ней знярс вешнек квартира, шлямс-нардамс эряви аламнеде, пулиинек весе ды пекенекак вачсть.
* * *
— Месть ней карман ёвтнеме тенк? — Федоров кортась смелстэ, апак пеле. — Ульнесь чуда. Виде-паронь чуда. Церькувасонть сестэ аволь ськамон ульнинь, кемень сят ломань ульнесь. Эрьвейке повнясы, кода Христозонь ликесь сельмест икеле валдомсь... кевкстинк оно тесэ аштицятнень. Сяк монь валсо мери...
— Истя, истя! Минсь неинек, кода валдомсь пазавась! — сергецть комсешка вайгель.
— Маринк, месть кортыть? — пурги валтнэнь Федоров, эсинзэ седеесь нумоло лацо налкаити. — Стяко ансяк муцятадо монь эйсэ, стяко ансяк кирттядо тесэ зняро народ.
Народось промкшнось ламо. Следователенть ланкс ве ломаньгак парсте эзь вано. Сяк думась: „Эка кискань пря! кучумсат тестэ прянь полдань синдезь...“
— Тынсь пазонть мезекскак а пуцынк ды лияненьгак спокой а макстадо!
— Тон, гр. Федоров, — пеензэ пачк мери следователесь, — кортак ды ланга пек иля тукшно. Отвечак вицтэ — ки марто теинк те „чуданть“?
— Кунсолодо, православнойть, месть корты те богохульникесь, — пижакаць народонтень попось. — Сисемь иеть кирць корозонк пазось, антихристэнь посланникть! Ней, кода пазось невтизе тенек валдо ликензэ, тынь, комунист, теньгак арситядо сквернямонзо? А нолдатызь, поганнойть, пазавантень...
Народось шалакаць. Попонть валтнэ маней пурьгине лацо цярацть народонть велькссэ. Кепетець шум. Икельсетне нежецть столенть ланкс, конань экшсэ озадоль следователесь, сонзэ ялгазо ды теке велень комунистнэ.
— Азёдо тестэ! Кадымизь минек спокойс!
— Пряст эрявить чулгонемс! Лият аместь!...
[ 29 ] — Церькуванть прясто ёртомс, мода ватракшт теемс эйстэст!...
Следователесь ялганзо марто нежедизь котьмерест стенантень, кедест тонгизь зепезэст — мезе-бути тосто вешнесть.
Столенть ланкс стясь Трошань Вася. Народонтень:
— Истя месть тейнитядо, шайтянонь прят? Азаргадомо, нать кармиде?...
— Долой... Панинк тосто! — сеерить сядошка вайгель.
...Нать, стувтынк 1919-це иенть, — таго пижни Трошань Вася. — Мезень кис туреме эцитядо? Федоровонь кувака черензэ кис?..
— Валк столенть ланксо! Пекстык кирга пареть!
— Кучинк седе васов! месть мути эйсэнек! — сеери народось.
— Содатадызь минь, кодаттадо тынь чес-т-н-но-й рроботникне!
— Керяк правданть, бачка!
— Аштек кеместэ паз лементь кис!
А содави, кодамо пес пачкодевель течинь промксось, аволь мольдеряй столенть экшесь сторужось Микит-атя.
Велень промксось ды розь паксясь вейкеть. Знярс пуви вармась чи валгома ёндо — розесь пря чави чи лисима ёнов, пурды вармась мекейланк — розесь карми лыйнеме чи валгома ёнов.
Микит-атя стясь столенть вакс ды серьгець мезе виезэ:
— Атят! Аштеде уж аламос... мон кортан.
Народось општ мольсь. Микит-атя вестькак эщо эзь кортне промкссо. Эряви кунсоломс.
Микит-атя прась пульзядо следователенть икелей ды авардезь лацо кармась:
— Простямак, цёрам. Простямизь тыньгак, эсь велень ломать. Чудась монь кедь алдо лиссь. Мон валдомтыять пазаванть. Кавто част ёзынь эйсэнзэ чурькасо ды пижень купороссо.
Народось аламос шолнозевсь и лоткась. Кунсоломс эряви. Месть эщо ёвтни Микит-ата.
— Попонть те тевесь. Народонть, келя, эряви кармавтомс пазнэнь озномо, чуда, мери, эряви теемс. Монь кундавтымем: теик, мери, ато пандян церькувастонть. [ 30 ]Эзинь машто отказамо, теия. Мейле, кода неидизь тыньк озномадо ды рангомадо, кода неинь, ков молить казнетне, кода неинь, мезень чудасо попось маньши тысчат ломать — кельмесь седеем попонть эйстеяк ды церкувадонтькак. Наказымизь монь седе пек, ансяк илимизь лово маньшицякс. Чумось оно — сон... попось.
Кода тунда ведесь лужнозь-лажнось саласы ведьгев бруденть, истя Микита-атянь валтнэде мейле шумакаць промксось.
— А, ине-гуй кодамо! А кувака черь! Истя маньшат эйсэнек!
— Истя пазнэнь озновтат эйсэнек!?
— Истямо чудас кемевтят?!
— Истя валнат ведь пулонок алга!?
Весе шумасть, весе кортасть, весе кроясть. Вейкесь омбоценть эзь кунсоло. Федоров неждясь частаколонтень. Чамазо од коцтокс ашолгаць. Турванзо томба максонь понас панчсть и састо мемецть мень-бути молитва. Народ яля пижнесь, вейке-вейке ланкс эцесь.
— Аламо теть — маньшат эйсэнек, паро лома ланкс эщо трават эйсэнек.
— Маштомс эряви!
— Маш-то-о-о-о-мс!
— Панксонь-панкс нолдамс!
— Коштозояк илязо кадовт!
— Маш-то-о-о-о-мс!
— ...о-о-о-о-мс!
Сядо, кавто, колмо сят кеть каявсть Федоров ланкс ды кармасть сеземанзо эрьва ёнов. Чавсть кучкорезь, чавсть рицягасо, кевсэ, кирпецьсэ — прок зверь чавсть.
Следователесь ловташкаць. Ульнесь германской войнасо, ульнесь гражданской войнасо. Ламоксть бойсэяк ульнесь. Кавто рананзо. Но истямо тев, знярдо тыща ломать чавить вейке ломань — сон кода шачсь эзь нее. Кирнавтыксэль столенть ланксто народонть юткс попонть нельгеме, Трошань Вася кундызе лавтовдо.
— Зря пецят, Астахов ялгай. Попонть эрямозо яла теке прядовсь, оймезэ а идеви теть, но эстеть берянь теят. Те шкань народось зверень кондямо, кежензэ пантли ламо иень кис, иля меша тензэ. Истямо тевсэ толпась эри эсинзэ законсо. Стихия, Астахов ялгай, [ 31 ]стихия... Мезеяк а теят каршозонзо... Попось теть а нельгеви, но эсить разитьтядызь...
Аламо шкань ютась Федоровонь таркас пуленть поцо валяясь верень туша. Народось, кода куроксто лаказемсь — истяня куроксто кельмеськак. Дружнасто кундасть Федоровонь чавомо, дружнасто кадызьгак. Мерят, прок кияк командувась тест.
— Пандя! Ломанесь умок уш кулось.
Кодак фатясть кулонтень — сеск и кельместь. Эрьвейкесь капшась седе курок ды седе васов туеме кулонть эйстэ. Кадовсь попонть вельксэс ансяк Микит-атя. Кувать вансь верьнишке поцо тушанть ланкс, нардынзе кавто ёнов сельведензэ (чевтель Микит-атянь седеезэ) ды састо мерсь:
— Эх, бачка, бачка! Муик таркат... Пуль поцо савсь теть куломс... Эх, бачка, бачка. Месть истя тейнить!? Муик бозат...
Микит-атя лиякс эзь машт жалостензэ ёвтамо. Кода машць, истя ёвтызе ды састыне сырьгась сторушказонзо.
* * *
Ёвтнимась эль прядови. Кадовсь ансяк кавто-колмо вал. Петровка велесь, Микит-атя, Федоров попось ды лия ломатне, конатнень лемест лецнезь тесэ, аволь монсинь „выдумка“. Полавтозь ансяк веленть лемезэ. Те „чудась“ ульнесь Бугурусланонь уездсэ (ней округсо), вейке покш эрзянь велесэ. Кавто ковт мутясь чопуда народонь превтнень те „чудась“. Кавто ковт Микит-атянь седейсэ, эсинзэ валкс, кискат раздясть, и кавто ковдо мейле ансяк чамдызе атясь потмонзо истямо покш грехстэ.
Ульнинь те велесэнть. Кавто иеть ютасть теде мейле. „Чудадонть“ мейле лиякстомсть Петровка велень эрзятне. Церькува прястонть умок уш валтызь крёстнэнь церькуванть умок уш теизь нардомокс. Микит-атя те, нардомсонть сторужокс.
Кавто чить эринь те велесэнть. Кавто веть ютавтынь Микит-атянь сторушкасо. Кавто веть сельмемь эзинь конче — кунсолынь яла Микит-атянь ёвтниманзо.
Монь ёвтнимась — Микит-атянь ёвтнима. Монь ёвтнимась — а покш повесть, кода шачсь-кайсь ломанесь, [ 32 ]кода сон ютавтызе откс паро шканзо, кода сон эрясь-аштесь масторонть ланксо, кода ютасть чинзэ-вензэ, кодат ульнесть думонзо-валонзо, кода сон, те ломанесь, сыре прянсонзо чаркодизе, косто эрявить вешнемс правданть валдо чинть, виде-паронь ломаненть.
Мезе маринь — сень ёвтния. Эзия стувт остатка валонзояк:
— Знярошка грех сайнинь эсь лангозон, цёрам. Прок блудня киска эринь кавто ковт: ломанень сельмс ваномам виздинь. Истя муцинь эсь прям, истя муцинь — эрямомгак машнесь. Кодак, ай, мадилинь таркас — истяк ледиль мелезэнь „чудась“, стильть сельмень икелев ломатнень тандадозь чамаст ды рангозь сельмест. Стян, бувала, таркастонь, пульзян пазаванть икелев ды карман озномо ды прощениянь вешеме. Мейле, окойник, думазевинь: мезень икеле ознан? Кинь кецтэ прощения вешан? Мень паз те, коли попось сонзэ лементь вийсэ маньши ломать, — думан истя, цёрам, ды монсь пелян аламнеде...
— Мезде пелить, Микит-покштяй?
— Ды кода теть толкувамс, цёрам? Ломанесь мон сырян, пингем печтия паз марто. Сыре превтнень стака синдимаст.
— Кода эно синдевсть?
— Синдевсть, аля. Кода весе тевенть ёвтния народоньтень — потмом сеске чамсь. Прок тикше стога валксь сявдиксэм ланксто. Эрязь-аштозь овси лия ломанькс теевинь. Прок, ай, кияк валтызе ланкстон сыре кеденть. Нейгак яла чинек-венек стян-пран церькувасонть, тьфу, нардомсонть, биш. Секе тев маняват, прах саессэ... И тамаша, цёрам, пазаватне вестькак мелезэнь а леднить. Комсомолтнэнь марто истя советнасто эрятано — алашасо а сезивдяно. Истят тевтне, цёрам. Истя вана кодгемень иесэ одов шачинь. Э, цёра! Мадемскак пора: зорязояк кармась ластамо... Мадемс эряви. Вандый нардомсонть спэхтакля, анокстамс эряви кудонть.
Микит-атя куроксто матедевсь.
Ёвтнимаськак прядовсь.
Зоряськак уш лоткась паломадо.
Тарказонзо пандонть экшстэ лиссь баягань кондямо од чи.
Самара-ош. Рабфак. 1926.