Колхозонь эряф/1940/01-2/Чапаевсь/2
[ 55 ]
| II |
| СТЕПСЬ |
Шовдава лангс степса якшама. Ускиньке перьфпяльде кяшфт боранонь отала тулупса. Нувай ардыхнень эзда синь пряснон кяшезь кувака понав воротникне.
— Лопарь, палоть? — кичкоргодсь сонь малазонза эендаф Бочкинць.
— Эськт шавонды... мянь шечезон молемс! — нолдаф нярьхть кжназь мяргсь Лопарсь. — Лоткама вастсь курок сатови, али аф?
— Кие содасы — эряви кизефтемс приятельть... Эй, ялгай, — тулхмадезе сон рыжай овчинань тушать, — курок ли саттама куд?
— Эендаде?
— Якшама, кум. Веле курок ли саттама, кизефнян?
— Сисемшка вайгяльбет, улема, а то... и кемгафтувошка! — азозе ускись, прянц апак шарфтт.
— Тон видеста азк — мзяра ина?
— А сняра жа! — кенярдезь пейнь порезь азозе ускись.
— Кода тон велети мярьготь?
— Ивантеевкати пачкоттяма...
— А Ивантеевкать эзда Пугачевти — ичкозе?
— Да месть мля тоза ляды?
Алясь деловитайста и строгайста ширептезень сельмонзон, эендаф суронц крхкаста навазе шалхкаварязонза. Мзярс изь кашторда. Азозе:
— Мезевок, можна мярьгомс, аф ляды, Таволожкати кемгафксува да Таволожкаста комсь кафтува, — ёфси обедста тоса ульхтяда!
— А тон тонць коста — Николаевкаста? — щупсезе Бочкинць.
— Сонь эздонза, а коста ина нинге лияста?
И алянять вайгяльста марявсь кода бта обида: мес кля тевфтома кяльцень шовамс — кли Николаевкаста сявить ускихнень, содаф, монга тостонь.
— Ну, месть кяжияфнят, щеняй? Можи, тон и ивантеевскяят, — мярьгсь каршезонза Бочкинць.
— Киртть лацкас — ивантеевскяй...
И алясь кода-бди пейдезь цяпоргофтозень трванзон и эряскодозь кармась тарфтомост вожьятнень, хоть тя и афоль эряв.
Тяса алятнень тяфтама шачсь обуцясна: кепотьксонди [ 56 ]сявомс, кодамовок Карп Едренычсь Ивантеевкаста Николаевкав уски ломань, а Николаевкаста Едрен Карпыченди максф наряд ни Ивантеевкав ускомс ни лиянь. Вов сон аф усксы, аф тиенди лишнай молема, а ломанть макссы Карпонди, и тонац сизеф-алашатнень лангса шаштозь-шашты шкайсь содасы мзяра пинге. Тонац сяда меле тейнза, Карпа щеняти, тиенди лама услугат. Алятненди тя пяк удобна, а вов молихненди — калма: кодамовок комсь вайгяльбень кить ёмла аськолкскаса мольфтьсазь ниле-вете частста. И тя аф ваномок мандатть кодамовок исключительнай пунктонзон лангс:
— Пяк срочна... очердьфтома... Экстреннай назначения...
Сембе ня пяк пелькс валхне аф пяк токсесазь Карп Едренычнень, — синь пеетькшнесть эендаф усазост, добродушнайста и саворне лункфнезь эй юронятнень казяма сакалснон эзда, озафнезь фкя вастса аф ащеви молить седиенц:
— Пяк ни комотнят. А тон киртть — куломс кенерят... милай!
Терентийсь кулендсь усксихнень ня обуцяснон колга, лятфтазе тяни и шарьхкодезе, мес тяни пяк кенярдезь и хитрайста цяпоргофтозень трванзон щенясь.
— Содаса, брат, полафнезь минь ялганьконь усксесасть...
— А то аф! — живолгодсь ускись. — Содаф, полафнезь, — сембе сяда тёждя ули...
— Ну, кинди кода.
— Киндиге ашкоданга, а сембонди сяда тёждя... — срафтозень сон Терентиень сомнениянзон.
— Тейнть, содаф тёждя. Кие сянь колга корхтай, — согласиндась Бочкинць. — А вов тейнек ня порядкатнень эзда — эхярь беда: марендафнень лангса аф пяк ардат, шаштозь мольхтяма целай ши...
— Тя тяфта моннетне марендафт? — вдрук обижавсь ускись и крутаста шарфтозе тулупонц копоренц, од ломанькс яфодезень вожьятнень, иватькшнезь ардозь айдязень алашатнень, аньцек ловсь ляцендсь, уфась шамас:
— Эй, тинь, шяйтатт! Фью, родимайхть... Ага-а-а... Аф ичкозе ни... Нн-о... лишмонят!
Алясь афсодамшка: кода гонкатнень эса, ардсь сон ловонь шава степть эзга.
И мзярда янгафтозе обиданц, сетьмофтезень вишкомф алашатнень, сери воротникть потмоста шарфтозе прянц, потмараста пшкядсь:
— Вов тейть и марендафт!
— Вишкста, брат, вишкста, — кенярьдсть сонь мархтонза ардыхне.
— То-та, вишкста, — согласиндась алясь и степеннайста поладозе: — А кда сизефт эрсихть, сянди туфталхт улихть, — лама арнихть: эсь тефнень тиить, наряттнень коряс арнек, — дьяволсь, и сявок сизи, а алашатнень колга корхтамска аш месть...
[ 57 ]— А нарятта, знать, лама? — кизефтезе Лопарсь.
— Кржа ли нарятта, — эстакиге отвечась алясь. — Тяса меки-васу наротта бралги лама, аньцек макссек алашат... И месть синь якафтыхть, сатанатне, мон дивандакшнян: сяконь и якайхть, сяконь и якайхть, а алашат макст! А кинь кирдьсак — сялдазозт ёрай каямс!
— Станяк и сялдазозт? — изь веронда Лопарсь.
— А то мезе, али киндиге пеняндат?
— Васькафнема тинь, алятне, пяк машттада, — серьезнайста сон азозе ускити.
— Ну, тон тонць цебярьняста васькафнек, — цютькяне обижавсь алясь, озаманять лангса стакаста шарондозь.
— Шяйтанць содасы мезе! — споряма ушеткшнесь Лопарсь. — Думандай ломанць эстейнза вов кодамовок история, да и верондай тейнза. Вов сякокс верондай и верондай, — месть тон кармат тиема?
— Да... история... — аф довольнайста морнясь кучерсь, конац обижавсь сянь мархта, што тяфтама крутаста и афпарста ульсь шарфтф корхтамс.
— Тон тонцень мзярдовок пиксседязь? — кизефтезе Лопарсь.
— А дряй иземазь пикссе... Фкясь тяфтамсь, вов кодамат тон, шашкаса эрьхтемань, сукань цёрась. Ладна тулупсь кеме, а то ба мянь сюлоненди молемс керолемань...
— Месть сон, ирецта, што ли, ульсь, дураксь?
— А содаф, што ирецта...
— Ну, ирецтать кядьста кизефнемска аш мезе, — бта апак учт азозень валонзон Лопарсь.
— Да мон мезевок аф кизефнян...
Терентийнь мялецоль куляксамс, кода тяса ащихть тефне советтнень колга: кемот ли синь, цебярьста ли работайхть. Сон полаксазе ускить шири шарфтф корхтаманц и кармась макссема лия кизефкст, но и тясонга марясь аф пяк лац корхтама, педа-пес видень аф азондома, ответтнень эса аф видеста азондома, кода бта алянясь мезьда-бди пельсь.
— А катк... сембось эрьси... Мезе ина тейнек тяни... — Терентийсь получакшнесь валонь крьнят серьезнай и яснай ответтнень вастс.
— Да аф шарьхкодян мезевок, корхтак сяда шархкодевиняста, — изь кирде и кяжияфтсь Лопарсь.
— Пяк ни аф шарьхкодят, цёра. А тон думандак — можи и шарьхкодят...
— Ожу, лоткак, тон, лоткак, — Терентись лоткафтозе Лопарень, сияк пельсь, што тонац сязьсы беседать. — Кода тяса советсь, кизефнеса, цебярь, али аф пяк: эсь тевонц ли вятьсы?
— А мес мля тевонзон аф тиемс, содаф... Аньцек вов Горшковсь нарятт назначендакшни аф правильна...
— Аф правильна? — и Лопарсь ёрдась пря живой валть лангс, кода катсь сивольть лангс.
[ 58 ]— Тяфта, а месть мля: атевозенц, небось, эрь разне арьси ётамс вакска, а минь ялганьконди знай путни, мзярда и аш кодамовок очеретть.
— А тон пеняндалеть ба, — азозе Терентийсь. — Архт совету няфтьк, азк: негодяйть усанзон эстакиге пувордасазь.
— Да, пувордасазь, — алгак вайгяльса азозе алянясь и апак надияк вожьятнень мархта вачкодсь алаш атнень фталснон ланга, — сяконь ватт, пувордасазь; тонць как раз и угадясак, коза аф эряви...
— Ну, месть ни тяфта зря корхтат? — оду кяжиясь Лопарсь.
— Аф зря корхтан, а тяфтане эряй фалу, — пеняндамань вайгяльса мярьгсь ускись, и сонь пряц, кода кула нармонень, пувордавсь шири.
— Случайхть ульсть? — кемоста и видеста, кода следователь, кизефтезе Терентийсь.
— Тоса и тевськя, што ульсть...
— Ну, и месть мля?
— Ну, и аш местькя, — лешаф трванзон мархта азозе алянясь — Ульсь да и ашель. „Ульсь да кулось пингта инголе — сяка тевське“...
— А мес ашеде кашторда? — кизефнесь Лопарсь.
— Да стак и ашеме кашторда, штоба улель сяда сетьме... — аф смутязь и шарьхчавста азондозе хитрай алянясь. — Мзярда аф каштордат — кяжсь сонць ётай...
— Рахсемс рахсек, — лоткафтозе Лопарсь, — а ватт.... — И, кода бта стрянондась, поладозе мяль вельде: — Да, видеть азомс, убытка ли нинге тейть, щеняй, усксемась? Советса вов везде нюрьгихть каготкат: „Молят — пантт, мезе сяват — тага сембонкса пантт“. Лувить? Тонць няить?
— Няине... катк нюрьгихть...
Лопарсь сельгсь дасадяфста, ичкози кяшсь ливозю воротникозонза, лоткась; — сон тонадсь корхнемс ошса, рабочайхнень мархта, виде ваймот, йофси лиякс, а тяфта ашезь машта: уклончивай, афшарьхкодеви, хитрецкяй ответтне кяжензон сафнезь афкукс. Ивантеевкав молемс марнек кувака кить ётамс сон сяда лама изь аз фкявок валня, а терпеливай Бочкин Терентийсь нинге кувать—кувать фальшивай и туманнай мужицкяй валхнень шудерьксснон эзда кунцесь, кода жемчужинкат, башка мелкай фактт, шура мяльхть и арьсемат, конатнень азондозень охотнайста корхтай алянясь.
Федоронь и Андреевонь нурдсост мольсь ёфси лия корхтамась:
— Тон тонць, Гриша, улеть сонь отрядсонза? — цёрать эса кизефнесь Федорсь.
— Вов и пильгозеньге сонь мархтонза колайне, — Гришась суронц мархта няфтсь озаманять лангс. — Кизоньберьф степть [ 59 ]эзга мекивасу арнеме: синь минь мельганк охотендайхть, а минь ёратама, кода ба синь васькафтомс. Чехсь — тя дурак, а вов казарать аф васькафтсак: сонць тяса кассь — мезе сонь эздонза учсемс?
Гришась, нолдамок воротниконц, боком ащесь озаманять лангса, и Федоронди цебярьста няевсь сонь шинь пидеф, якстерь шамац: мужественнай, открытай, простой. Сембода характернайста и кемоста вельхневсь сонь вярдень трвац, мзярда аф спокойнайста корхтамста сон нолязе сонь, алуце трванц пштедезь и вельхтязь. Мянтьф, кели шалхкоц, уле тюсса туста сельмонза, ваи срмаф мархта алня коняц, — ну, шамац, кода шама: мезевок аш цебярь! А сяка пингть сонь эсонза вийсь марявсь эрек, коренной, настоящай. Гришанди марнек ульсь комсь кафтува кизот, а, шамазонза ванозь, тинь максольде ба тейнза и колмоньгемонь ветие: батрацкяй эряфонь тефне и бойса сязьф кержи пильгонц мархта страдандаматне путсть афнардави печатть.
— Ну, и месть мля сон — од? — кизефнезе Федорсь, ушетф корхтамать сяда тов вятезь.
— Да, ёфси од: колмоньгемонь кизотка, улема, тейнза аш...
— Тязкстонь што ли, — казак?
— Кодама казак... Пугачевть эзда аф ичкозе тяса ули Вязовка веле, сонь эсонза, улема, сон и эрясь. А лиятне корхтайхть — Балаковаса эрясь, аньцек сась сей. Кие синь шарьхкодьсыне...
— А сонць сон кодама? — жаднайста кизефнезе Федорсь, и няйфоль взволнованнай шаманц коряс, кода сонь фатязе корхтамась, кода сон пели мяндемс эрь валнять.
— Да вдь мезе ина азомс? Фкя валса азомс — герой! — кода бта эсь пачканза корхтась Гришась. — Ащат озада, мярьктяма, усф лангса, а цёратне ичкозде няйсазь: „Чапаевсь сай, Чапаевсь сай...“ Сонь ни шити, кажись, кемоньксть няйсак, а сембе охота ваномс: тяфтама, брат, ломанць! А валгат эста усфть лангста, ванат — кода бта кодамовок чуда лангс. А сон моли, усанзон тов да сей пуворясыне, — келгозень усанзон, сембе сеенькшнезень.
— Ащат озада? — корхтай.
— Ащан, кля, Чапаев, ялгась.
— Ну, и ащек, — и туй. Сяда лама сонь эздонза кодамовок валхт аф эрявихть, а мярьгсь — и бта тейть тиеви од радость. Вов мезе значит, што сон настоящай ломань!
— Ну, и герой... Афкукс, герой? — щупсезе Федорсь.
— Да кие сянь колга корхтай ни, — значительнайста комафтозе прянц Гришась. — Сон миньцонк нинге кода эряскодсь, кепотьксонди сявомс, Иващенковскяй заводу. Пяк ни оцюволь сонь охотац рабочайхнень идемс: ашезь удала, изь кенерь эсь пингстонза.
— Изь кенерь, — трнатозевсь Андреевсь.
— Изь кенерь, — куфкстозь мельганза азозе Гришась. — И [ 60 ]изь кенерь аньцек цютькяняда. А мзяра тоса ульсь рабочай верда тянкса — н-ну!..
Гришась сетьмоста яфодезе кяденц и комафтозе стака прянц.
Нолдаф прят ащ есть целай минута. Тоса Гришась обычнайда сетьмоста мярьгсь:
— Разнайста корхтайхть; аньцек ули сембода кржа, кода кафта тёжятть лувомс. Эста синь корпуснень ёткса рядса-рядса и пяердезь, марнек пирьфсь пяшкотьфоль — и аватка тоса, и идьнятка, ну, и кой-кона бабатневок — фкя валса азса: апак кочксек — апак ванонт сембонь. Вов кода, сволочне...
Сон марявиста моцоргофтозень пейнзон и торхцадезень вялай вожьятнень.
— Тон тонць няить? — кизефнезе сонь Федорсь.
— Кода аф няемс... Да корхтамска афоль эряв ба... Мезе ина тяса няемс: вер да урдазу модать лангса сиволь... Апак кочксек, подлецне, тяфта фкя фкянь мельге и керсезь...
— Ну, а сон кода, сонць Чапаевсь?
— Мезе мля тейнза лядондсь тиемс? Кяжиясь, и сельмонза вандолдыхть, и сонць трнаты, кода ардомста алашась. Ардомста шашканц кевс токазе. „Лама ули, — корхтай, — верда пяертьф тя рабочай верть инкса! И мзярдовок аф юкстасаськ, и минценнеть сявсаськ!..“
— А сявозе? — серьезнайста кизефтезе Андреевсь.
— Да кода нинге сявозе! — вишкста отвечась Гришась. — Сон, кода чумной, ёрясь пря степть эзга, пленнайхть сявондемда изь мярьге фкявок казаконя. „Сембонь, — корхтай, — керсесть, подлецнень: Иващенкинонь заводть аф юкстаса!“
И тага лоткасть. Клычковсь кизефнезе сяда тов охотливай Гришань.
— А кодама, Гриша, сонь народоц ульсь, боецонза: коста синь?
— Тяфтамкат, тязкстонь, — кинди жа молемс? Минь ялганьке мольсь, батраксь, да конац сяда ашу... Бурлактка ульсть сят нльне минь корязонок инголи тусть...
— Мезе мля, полк, што ли, мезе тинь ульсь?
— Да, ульсь и полковок, мзярда Пугачевса ащесь, а тоса сяда пяк отряд мярьгондсть, сон и сонцьке, Чапаевсь, ашезе кельгонде полкокс лемнемс: отряд, корхтай, да отряд, тя тяфта сяда цебярь...
— Н-да... отряд... Ну, а ранендафт отрядса, шавфт тиньцонт ульсть, синь ков тиенькшнесть?
— Тиенькшнеськ, — думандазь таргазе корхтаманц Гришась, сонць пуропнезень мыслянзон. — Всякай вастс тиендеськ: то аф кенерят кочкамс, сятнень казарась сялгондозень куломс, — небось, аф кадсыне. А кинь сявсак, — велева кадондоськ: тяса миньцонок везде народсь минцень. И тясонга вов улендеме, Таволожкаса. Да коса ашельме — везде улендеме...
— А кода пчкафнесть синь?
[ 61 ]— Тяса и пчкафнеськ, аньцек лекарстват, улема, кодаптка ашельхть, а мезьса арьси бабанясь, сяса и лезды... Кда лиясь ошу пови — тянди нинге пара, а тяса велева — эге, кода пчкафнезь!.. Ну, и коста ина тейнза, шовда бабати, пильгсь правондафтови, кли ся пильгть эзда аньцек саннятне нюрьгихть да тапаф, пазкарьхне калдордезь калдордыхть... Кодама тяса лекарь ломанти бабась?
— А ульсть тяфтапт? — вайгяльсонза трнатома мархта кизефтезе Федорсь.
— Мес мля аф улемс: сянкса война!
— Вов видеце! — апак учсек лаподезе Андреевсь, конац сембе пингть ащесь аф каштордозь, ичкози тулупти яцемок прянц, кода бта киньге лангс кяжи али мезьсовок аф довольнай. — Видецень азондсак! — азозе сон кайгиста и ялгакс Гришинь хлопадезе тулупонц ланга.
— Ну, содаф, — тонац яфодезе кяденц весяласта. — Сембось ульсь.
— Гриша, — пирезе корхтаманц Федорсь, — Гриша, а ярхцседе велетнень эзга жа?
— Велетнень эзга... — важнайста отвечась цёрась, кода няеви, пяк довольнайста, што тяшкава интересовандайхть сонь мархтонза. — Эсь мархтонк минь усксеме кржа, — и мезьса сонь усксемс, коза путнемсоль? Тяса сембе велетнень эзга: синь сайхть — синь сявихть, минь мольхтяма — тага сяфтяма. Веледа кругом лисендсь кемветиешка коза тяк пуворда!
— Да, стака ульсь, — куфкстсь и Клычковське.
— Сембонди стака ульсь... А тейнек дряй тьождя? — сонь мельганза азозе Гришухась, конац кода бта пельсь, што сонь шарьхкодьсазь аф лац.
— Конешна, аф тьождя, — эряскодозь дакстсь Федорсь.
— Вов кодане ащесь тевсь, — спокоендась Гришась. — Сембось ульсь! Мезе ина, — атказайхть лияста, кепотьксонди сявомс, тоса максомс кши, алашатненди пинем ли али алашатнень полафтомс, мзярда минценнетнень вийснон маштомс марендасаськ: эрявсь... Кли эряви, значит давай — корхтамась нюрьхкяня. И, мон думандан, тяса фкя лаца лисендсь, — што миньцонок, што синьцост... Месть шнакшнемс пря, бта сембось кля лисендсь мазиста? И аф мазистовок эрсесь... Тон, мярьктяма, целай сутка ашеть ярхца, да походста, а тяса кши суском аф максыхть, — коза жа сон, мазишись, ладяй? Васенда—васендакиге валса: дай, кля пеконьке вачсь. А сон тейть кукишенц няфнесы. Да мзелдоманяса што ли сонь мархтонза колендемс? Ну, эста кой-кинь пякснесаськ, а конанц сяда эчке пекоц — няренцка вадяпцак, коса ни сонь мархтонза нолсемс-палсемс...
— Пикссекшнеде? — лоткафтозе ваймонь таргсеманц Клычковсь.
— Пикссекшнеме! — проста и инь кемоста отвечась Гришась. — Сембе пикссекшнесть, сянкса война.
[ 62 ]— Молодец, Гришуха! — оду и кенярьфста комотсь Андреевсь.
Андреевсь кельгозе тя ару, апак ваденть, казяма правдать.
— А монь ашемазь пикссе? — шарфтсь Гришась. — Стане жа пикссемазь... Да сонць Чапаевсь весть лашкофтомань. Месть кармат тиендема, кли эряви?
— Кода Чапаевсь? Мезенкса? — ацендсь Федорсь, кулемок (мзяроцеда!) тя магическяй, удивительнай лемть.
— А мон караулса, няйсак ли, ащень, — азондозе Гришась, — мезсь Пугачевть тона бокса, ёфси маласа, кодама бди тяса станция... лемонц юкстайне. Ащан, браткяй стяда, ашан, а мялезе мольсь... Мезень тяфтама паршивай тевсь, матьтувонц, — ащемс караулса, арьсян мон. Тоскась, фкя валса, сивомань. А мянь вокзалть тейса ащихть келунят, и келунятнень лангса чавкада — ванан — ламодонга лама: га-га-га... Ишь, кармасть иватькшнема! Похадян вов, аф пяк, кля, гакснема карматада! Васенда арьсень пеедемге, а тоса и афкукс: кие, кля, тяса няйсы, — кржа ли нароттта ляценди разнай тевонь колга? Целендань кучати: бах, бах, бах... Да сембе вететнень и псить пачк ляцине... Конатнень шавине — прашендсть вярде, пацяняснон мархта сембе, мяляфтса, повондсь тараткятненди да трнатсть куломда инголе. А мзяра эздост ульсь — дуцякс станяк и кеподсть... кеподсть да кармасть иватькшнема мезе ули вайгяльса. Кие сонь содазе, што сон, Чапаевсь, ащи коменданть ширеса. Лиссь — ащи дуцякс.
— Тон ляцендеть?
— Аш, — корхтан, — ашень ляценде: аф мон!
— А кие жа чавкатнень кеподезень, снавонь кшмань?
— Улема, синць, — корхтан, — лиема кеподсть!
— А ну, няфтьк! — и хвать винтовкати. Хватясь винтовкати, а сон шава.
— Месть? — корхтай. — А патротт коста, — корхтай, — сяват? Казакнень мезьса ляцендемост кармат, колода? Чавкась тейть казакта страшнай? У, ч-чорт! — да кодак лашкофтсамань бокти прикладса!
Аф каштордан, мезе тейнза азомс? Стрянондань, да позна, а эряволь ба тейнь лиякс: кодак сон кундась винтовкати, а тейнь ба ускомс эряволь: тят малатькшне, кля, ляцте — караулса нельзя винтовкать варчсемс. Сон ба тов-сей, а молемс аш коза, да сонь пеконц лангс нинге штыксь целендамаль: кельгомань, сембеть сразу простиндальхце...
— Кельголензе? — пялес конезень сельмонзон любопытнай Федорсь.
— И кода кельголемань: ков сонь сяда кемоста сюцесак, тов сяда ласковай. Фалу кельгольхце кеме ломанть, мезе ба сон тейнза афоль тий: „Молодецат, — корхтай, — кли тонь духце смелай...“ Ну, а коста ни семботь азондсак? А вов сон и „Вантеевкаське“, — кенярдсь Гришась, озась лиякс, кода эряви ускити, кайгиста вачкодезень вожьятнень, танцтиста [ 63 ]цяпоргофтозень трванзон, вяшкозевсь и тяфта ни беспокоендась мянь велети молемс. Аньцек весть шаркстсь:
— Совету ускомсотада?
— Да, да, совету, Гриша.
— А то Парфенычть шири, сон вов Чапаевть колга азонды...
— Кие ся, Парфенычсь?
— А миннетнень эзда, отрядса жа ульсь мондедон инголе. Да сонь кяденц сязезь юрнек, сянь мархта и сась меки.
— Тястонь эряй?
— Тястонь. Ну хозяйствафтома жа сон тяни, сембонь педа пес апалязь казакне: кудонц разориндазь, утомонзон плхтазь, эхярь крхтапа мужикть кадозь... Петезень, да кальдявста.
— Няфтьк, мзярда ваксканза ётатама, — всякай случаенди азозе Федорсь.
— Няфтьса...
Сувасть Ивантеевкати — оцю, просторнай веле келиста гевортьф сиянь ульця мархта. Афоцька веленять тялось тисы берлогакс — вельхтясы, тавадсы, лофнень мархта уфасы. А оцю велети тялонда аньцек и мазишинц няфнемс. Гришась алашатнень нолдазень ардома и фарсиндамать инкса арфтозень аф пяк вишке рысьса. Фкя куднять шири няфтсь суронц мархта, — тя ульсь Парфенычень кудоц. Омбоцеть шири няфтсь, шарсь вишкста, аф каштордозь токазе эсь прянц сялдаз ланга, мзелгодсь: эрявсь, содаф, шарьхкодемс, што сянь эса нолдайхть самогонка. Ардсть советть тейс; сон, общай правилать коряс, главнай площадть эса, ингольтень правлениять кудса. Валгсть нурттнень эзда, пелезь шятнесть кельмоф пильгснон лангс, каязь ловияфтф, лешаф тулупснон, сявозь кавлалост и кядезост эсь корзинканяснон и соткскаснон (ёмла канкскя: кажнайть пялень пуд!), куцеманятнень ланга куцсть советть помещенияс.
Советсь, кода совет: просторнай, афскладнай, афпара, урдазу и мялень мольфти. Нинге рана, ошса учреждениява тя пингста нинге киньге аф мусак, а тяса, ваттака, мзяра наротта пуромсть! И аньцек мезе синь ёрайхть тиемс тяшкава рана? Нежетькшнесть коричневай мянготьф стенати, ашкоряйхть цыгаркат, таргайхть, шинияфнесазь сяфтомонга аф ару, шапама кожфть; теснаста ащихть вальмятнень тейса, тяшнихть разнай тяштькст эендаф глянцекненди, кельмоть сюнеда хлопиесазь кядьснон, эжендихть, вялайста и бта апак карькстт азондыхть фкя фкянди скучнай валхт... Няеви, што ламотне, оцю пялькссна, может быть, сембе — ащекшнихть тевфтома, аш ков молемс, аш мезе тиемс, — сясы пуромсть.
Мзярда няезь сувайхнень, шарсть синь ширезост, варжакстсть лангозост, азсть разнай соображеният морозть колга, сиземать колга, сафнень направленияснон и цельснон колга, [ 64 ]сонцень самать стакашинц колга, корхтасть шужть и пинемть афсатоманц колга, сянь колга, што тячи непременна ули буран и молемс аш кода „коданянга“.
— Шумбратада, ялгат, — ширезост пшкядсь Лопарсь, конац кирдевсь ушеса и тяни сувась мекольцекс:
— Шумбратада, — отвечасть несколька вайгяльхть.
— Председательть ба няемс...
— А вов сей, — и няфтсть перяфксть фтала ширдень комнатать лангс.
Лопарсь молеманьберьф кирдсь арды четверкать представителенц роленц: вятсь корхтамат, получакшнесь алашат, куляксакшнезе, коза можна лоткамс, ярхцамс, и стак тов, и стак тов.
Андреевсь тулупонц ашезе валхта, апак каштортт шашфтозе вальме лангса озада ащи алянять, кармась таргама, аф каштордозь макссь таргамс сяндиге. Терентийсь яцесь ни толпати и вятсь корхтамат, кизефнесь, мзяра велеса эряй наротта, кода молихть разнай тефне, кода работай советсь, доволетт ли советскяй властть мархта, — лиякс мярьгомс — сразу кунцесь тевти.
Федорсь марнек пяшкотьфоль Гришань азондоманзон мархта. Сонь инголенза аф явондозь ащесь, кепсезе мяленц, муцязе и кенярьфнезе Чапаевонь, степонь атаманть сказочнай фигурац.
„Тя афкуксонь народнай герой, — арьсесь сон эсь пачканза, — герой вольницать — Емелька Пугачевть, Стенька Разинонь, Ермак Тимофеевичень лагерьста... Тонат эсь пингстост эсь тевснон тиендезь, а тянди лия пинге максф, сон и тефтка тиенди аф стапт. Гришань азондоманзон коряс можна арьсемс, што сонь, Чапаевонь, эрекшиц и молодецшиц — главнай характернай чертанза. Сон именна сяда пяк герой, чем борец, сяда пяк приключениятнень пяк кельгисна, чем сознательнай революционер. Сонь эсонза улихть, содаф, и пяк кепотьфт беспокойствань элементтне, впечатлениятнень полафнемаснон инкса старандама. Но кодама тя оригинальнай ломанць крестьянскяй повстанчествать фонца, кодама самобытнай, яркай, колоритнай фигурась!“
Федорсь кизефтезе алянятнень кядьста, коданя повомс Парфенычень шири, и, мзярда Лопарсь советонь председательть мархта корхнемда меле компаниять сявозе чайда симома, Федорсь синь мархтост изь моль, азондозе эсь охотанц и тусь азф адресть коряс.
Частошкада пялешкада меле тушендсть Ивантеевкаста. Федорсь ащесь аф каштордозь и нолдаф прят: Парфенычень куду ашезе сат, тонац тяда инголе тусь Пугачеву. Андреевсь макссь тейнза фкя-кафта кизефкст, вешезе тердемда корхнема, но, мзярда няезе, што аф лисенди мезевок, лоткась. Лопарень мархта Терентийсь ащесть-ащесть озада, арьсесть морот [ 65 ]морамс. Дуэтсь ульсь пяк цебярь: Лопарсь изь мора, а аньцек кжнась, Терентийсь пжнась афпарста и вяшкимкс лисендсь мезе-бди афцебярь, шоряф и резкай. Мзярда пяк мольфтезь ни мяльснон, Андреевсь ингольдень повозкаста ивадсь тейст, штоба лоткальхть урондомда. Цёратне, неямок, согласиндасть и лоткасть. Нувасть мянь Таволожкати пачкодемс. А мзярда пачкодсть, учема ашесть карма ёфси, заказасть алашат, тусть Пугачевть шири.
Нинге Таволожкаста тумста уски алятне ширем сельмот варжакснесть равжа туста дуцятнень лангс, конат уйсть шовдалготф менельть эзга. Вармась уфась вишкста и аф определеннайста: сон сязендезь-сязендсь направленияфтома, сембе ширде, кода бта атаковандась афняеви врагть эса, комотнесь лангозонза, кода цюнзерьса пине, сускондсь, нефнесь пялязста, но эрь разня виюдонга вию кучкорьксса паньцевсь шири. И оду комотнесь, и оду аеркшнесь кяжиста, иватькшнезь, увась, кяжиста трнатозь, урондозь. Модать ланга шарондозь-шарондсть, лиендсть и пуворясть ловонь бурянь воронкатне: китнень кяшезень, афняевиста тавадозень ловса. Валгондсь и вишкста тустомкшнесь буранонь шовдась. Сяда сидеста, кемоста и сяда марявиста вачкиесь бокненди пяляскоткшни вармась, сяда равчкоткшнесь менельсь, сяда крутаста и сяда вишкста кепсихть ловонь пакшне, бурять эса шарондыхть салмоксокс, эйнякс, комококс видеста шаматненди.
Кода варязост кроттне, ичкози тулупозост кяшсть ардыхне. Цють варжакснихть ускихне. Каршезост уфай вармать эзда илякшни ваймосна, пидезь-пиди морозсь пицесыне шамаснон. Кувать мольсть — и ков сяда ичкози, тов сяда пяк, сяда эрьвазста вишкомкшнесь степной пяляс буранць. Мзярда кись кармась молема лощинава, ляйть эзга, конань сери берягонц эса ульсть шура кусткат, — тяса кода бта сяда сетьмось, но кодак аньцек оду лиссть ровна вастти — тяса буранць бунтавась, кода буяи азорсь ирецтонь пирса: сембось, кля, монь, и мезе колан, сянкса ответ аф кирдян! Кельме, пелькс ульсь бураннай степса.
Пугачевти лядондсь кемоньшка вайгяльбет. Каршезост мольсть верблюдонь караваттне, повондсть башка алашаса молихть, — улема, тя разне ламотне ашесть пачкоде родной кудозост: то ёфси юмасть, то веньберьф ащесть ловть потмоса; нятнень таргазь аньцек шовдава и кой-кода живоптезь куломать эзда.
Тяфтама буран — азондозь степса эряйхне — ашель ни лама кизот. „Аф мезенксонга лиянкса, — корхтасть, — кода шкайсь кучезе сонь наказаниянди кельме молитватнень инкса, сянкса, мес народсь юкснесыне церькафнень.“
Корхтасть, — но няйфоль ни, што ня валхне — шава валхт, аньцек кялень шовсемат, конат кунара азонкшневихть и содафт ни, алятне жа сонь азондсазь сяда пяк христианскяй [ 66 ]вежливостть инкса, а синць ёфси аф верондайхть сянди, мезе корхтайхть.
Буранть эзда и станцияванга наротта пуромсть лама. Мзярда таргазь алашатнень, минь молиеньке ловонь комококс валгондсть нурттнень эзда, эста ни ашезь кучсе разведчикокс ськамонза Лопарть, а тусть кие станционнай начальствати, кие комендантти, а кельгома Терешань кучезь ловса кяшф китнень эзга состафнень вешема, конат кармайхть молема Уральскяи. Тя „трудонь разделениясь“ ульсь тиф сянь сюнеда, што Самарав молемста цёратне сядонь крда няезь, кода сознательна и аф сознательна, маштозь васькафнихть машинакинь заправилатне поезттнень прважсемаснон колга: кда азсазь, што составсь туй „частта меле“, — эста, ульхть покойнай, вандыс вастстот аф токат, а кда азсазь „аньцек шовдава лангс“ — сяконь и учт, што туй шалхкцень инголе.
Ламос, али аф ламос вешендсть, мекпяли мусть вагоння, конанц эса как раз Уральскяи пачкодемс моли политическяй работниконь группа. Синь кизефнесть фкя фкянь, азондозь киснон-янцнон, сувасть паршиняснон мархта. Но кувать нинге савсь муцявомс, сяда инголе чем пачкодемс Уральскяи: Ершовть тейса ловсь валязень китнень, — валгондсть, аропнезь ловонь фальхнень, сюцекшнесть коменданттнень мархта, правдаса и афправдаса сатнесть пенгат, эжнезь эендаф лазкскять. Мольсть валомне и тошнаста. Аньцек што пачкодсть Ершовть тона бокс, кольсь паравозсь, — тага возьсема, тага валгондсть, кувать нервнайста учема. Тоса изь латце тевсна буксатнень мархта — и тясонга лоткамс савсь, тага заботендамс, хлопочамс, килангонь петемат, сембе од и од тревогат. Пугачевть эзда Уральскяи мольсть целай кафта шит, а тяса молемска — кядьцень можна венептемс!
| ←I-це главась. Рабочай отрядсь | III-це главась. Уральскяйсь («КЭ» 1940, № 4 Апрель)→ |