Колхозонь эряф/1940/01-2/Чапаевсь/1
| Дм. Фурманов
|
| Чапаевсь |
| РАБОЧАЙ ОТРЯДСЬ |
| I |
Вокзалса ломаттне пяк тмашиндайхть. Наротта — ламодонга лама. Перронть тейса кувакаста таргаф якстерьармеецонь рядсь цють кирдьсы бзьмолды, увнай толпать. Тячи пялевешкада Колчакть каршес туй рабочай отрядсь, конанц пуроптозе Фрунзесь. Иваново-Вознесенскяй сембе фабрикатнень, завоттнень эзда пуромсть рабочайхне ялгаснон, брадснон, аляснон, цёраснон прважама... Ня од „солдаттне“ кода-бди пеетьфтемацень саф тсазь и афловкайшиснон и наивнайшиснон мархта: ламотне аньцек васенцеда щазь солдатскяй шинельть: сон ащи афлац, перьфпяльде уфазь-уфаф, кепси, кода шапакс парняса шапакссь. Но мезькда — хлопецненди тя аф шорси улемс эрек ломанькс! Ванк, кода тонац эсь прянц карксса карксазе „рюмкакс“, цють ваймонц таргсесы, милайсь, а кенярдезь вачкиесыне кайги кочкярянзон; али тонац — од ломанень небрежностьса, сире воякокс прянц кирдезь кяденц путозе афуклюжайста содонтф шашкать эфесонц лангс и важнайста—важнайста мезень-бди колга споряй ваксстонзоть мархта; колмоцесь кержи шири повфтась револьвер, види шири — бутылкакс ащи кафта бомбат, кода куйсь, ашкодозе эсь прянц патрононь лентать мархта и лиендезь лиенди якай площадкать фкя песта омбоце пес, арьси шнафтомс пря ялганзон, родноензон и содафонзон инголе тяфтане грознайста ащезь.
Гордость, кельгома мархта, виде ваймот кенярдезь ванць синь лангозост и корхтась синь колгаст вию равжа рабочай толпась.
— Тонадыхть, браткяй, тонадыхть... Молихть фронту — тоса курок семботь таньфонц варжасазь...
Да, конешна — фронтса тейть аф кашолкаса курькснемс.
И сембе низелгофтозь пейснон, рахазевсть, сялдазснон видептезь инголи.
— Вов Терентийнь афоле содасак, — заваркаса ульсь ваденьф, кода фитиль, а тяса занонтт лангозонза... козырь-мозырь...
— Кштизь якай, месть ни корхтамс... Сабляц — кода генеральскяй, иш, усксеви.
[ 44 ]— Тереш, — ивадезе кие бди пеедемге, — сабляцень прдак зепозт, казакне нельгсазь...
Сембе, конат ащесть маласа, кармасть рахама пеконь шовазь.
— Тядяце сявсы капстань тапамс.
— Пупордат, Терешка, синдьсак...
— Сурняцень керсак... Верок генерал!
— Ага—га... го-го-го. Ха-ха-ха-ха...
Бочкин Терентийсь — комсь кафксува кизошкаса цёрась, веснушкав шамась, аф ламда рыжайсь шуткатнень лангс варжакстсь добрай ласковай варжафксса: цютькяне визделгодсь и эряскодозь фатязе шири шаштф вазенц...
— Мон... тейть каян, — смутяфста гразясь толпати, мзярда ашезь мув, мезе отвечамс, мезе азомс рахсемань и пеетькшнемань валхнень вишкста азондомаснонды.
— Мезе каят, Терешка, мезе?... — рахасть аф лоткси пеетькшнихне. — Ця-ка шиньжармат, шулгонтт, шкайнь солдаткя. Тейть шинельть, улема, вазнянь лангста максозь... Ага-га... Ого-го...
Терентийсь мзелдозь тусь ваготтнень шири и кяшевсь якстерьармеецнень уле тюсса тмашиндай туста толпаснон ёткс.
И эрь разня, мзярда сельминголест повондсь афлац щаф, — сонь кепсезь рахсемс, валондозь ядовитай пеетькшнематнень пиземснон оржа валснон мархта... А тоса тага мольсть тевонь колга серьезнай корхнематне. Настроениясь и тематне полафневсть пяк вишкста, — трнатсь нервнай, торжественнай, чуткай тревогась.
Толпать эса мольсть корхнематне:
— Кда эрявксты — шяйтантке таргасаськ адть эзда. Сембе иватькшнесть — щамс аш мезьса, аш шинельхть, ляцендемс аф содасаськ мезьса... А вов сон — няйсак. — И корхтайсь суронц мархта няфнесь ваготтнень шири, няфнезе, што корхтамать вятьсы якстерьармеецнень колга: — лувк целай тёжянь щасть...
— Мзяра, корхтат?
— Да, улема, тёжянь, а тоса и нинге кочксевихть — и сятнендиге сембонь, мезе эряви, музь. Кда ули мяльце, мусак, брат, тяса кяльцень шовсемс аш мзярда — няйсак кодама сась пингсь...
— Пингсь сурьезнай — кие корхтай, — кемокснезень сонь валонзон кжнай вайгяльсь.
— Ну, кода ина аф сурьезнай: Колчаксь, сон яци мезе ули вийхть. Няйсак, и Уралсовок тефне кармасть молема кальдявста...
— Эхе-хе, — куфкстсь атянясь, конац йомланя оржа сельмоль, лангсонза нюрьхкяня пинжаконяль, сон палсь, срмась, кода панга.
— Да... Аф содаса, кода тяни кармайхть молема тефне, пяк ни сембось кальдявста арась, — пеняндась скучнай, ризнай вайгяльнясь.
[ 45 ]Тейнза отвечасть серьезнайста и строгайста.
— Кие жа синь может содамс: тефне эсезост аф якайхть, эрявихть синь вятнемс А вов тейть и васенце тевсь — тёжянь ломань!.. Тя, брат, тев — и оцю тев, о-оцю!.. Вов кулеви газетатнень эзда — армияса кржа рабочайда, а эрявихть... Рабочай ломанць — сон лиять коряс кармай улема сяда тевонь содай... Кепотьксонкса ичкози аф якамс — сявсаськ Павлушкать, Лопарть, — ломанць кевонь, можна азомс... и пряцка арьси лац — аф юмай, небось!
— Месть корхнемс, содаф...
— Да аф мужикнень лаца ни, — тон, Кожанайть, Марфушкать лангс варжакстт, стане жа аф селедка—авась. Кой-кона алятьке, пожалай, няренц нардасы.
Марфась, ткачихась, аф ичкозьге ётамста и мзярда кулезе, што корхтамась моли сонь колганза, вишкста шарсь, и мольсь корхтайхнень тейс. Кели лафтусь, кели шамась, келиста панчф голубой сельмось, цютькяня рябойсь, сон няевсь ламода сяда одкс эсь колмоньгемонь вете кизонзон коряс. Сонь лангсонза солдатскяй од косгюм, — штанат, кямот, гимнастерка, шяяренза нарафт, вазец шашфтф мянь шовонезонза.
— Тон месть корхнят колган? — мольсь ваксозост авась.
— Месть тонь колгат корхтамс, Марфуша, — тон тонць саят. Мон корхтан, кля, минь Кожанайньке аф баба, а камбразфтома эльде
— Лиякс мярьгомс, мон эльдян?
— Ну, а то кият? — И вдрук полафтозе шутендамань вайгяленц: — Корхтан, што тон воинкс цебярьста ладять... Вов мезе!
— Ладянь ашень ладя: эряви...
— Аш месть корхтамска, што эряви... — Сон аф ламос изь кашторда и поладозе: — Ну, а тоса — кода?
— Мезе кода?
— Эсь всякай тефнень?
— Месть мля тефне... — яфодезень кядензон Марфушась. — Иднень приюттненди макссине, ков синь тисайть?
— Ков тисайть... — канцьфтезе корхтайсь.
И, стакаста ваймонь таргамда меле, азозе ужяльдиень алгак вайгяльса:
— Ну, иттнень ванцаськ, ванцаськ, Марфуша, а тон тят пичеде: ванцаськ... Архт озадонь седихть, тейнек тяса мезе ина лядсь тиендемс, кода аф тинь инксонт работамс?.. Сай, можи, пиньге — и миньге эста... а?
— Вов няйсасть тинь... — яфодезе прянц Марфась, — да и видеть азомс, што сон тяфтане и ули... фкя отрядть лангс дряй можна лоткамс?... Беспременна тяфта ули.
— И цёратненьге, кажись, мяльсна, — яфодезе прянц корхтайсь ваготтнень шири.
— Мезе ина тейст эряви, — отвечась Марфась, — аньцек тумс, што ли, куроконе: учсемс, корхтайхть, мольсь мяльсна. Тумс и [ 46 ]тумс — тяконь и кульсак, месть ащекшнемс фкя вастса? Э-гей, Андреев[1]! — ивадезе кинь бди Марфась ётайхнень эзда. — Прважамать колга мезе тоса корхтайхть?
Петербургскяй слесарсь, конац аф кунара сась Ивановав, равжа-сенем сельмось, лофтана шамась, стройнай и гибкай комсь колмува кизоса цёрась, прясонза коммунаркастось, коричневай ташта шинельнясось, — тя Андреевсь. Сай четкайста аськолязь, кода докладс: ровнандась мархтонза, вачкодезень кочкярянзон, кяденц кеподезе козыреконц малас и, ёфси аф мзелдозь Марфань лангс чудеснай серьезнай сельмоса видеста ванозь, азозе:
— Честезе ули азомс тонь превосходительствати: поездсь туй ниленьгемонь минутада меле!
Марфась тозердазе ожада:
— Прощандама карматама, али аф? Цёратне учихть, — прощальнай вал эряволь ба, што ли... коса Клычковсь? Ков сон тоса юмась?
Андреевсь оду кяденц кеподезе козыреконц малас и сяка жа аф возмутимай тонца чеканендазе:
— Пеконц чайса штакшнесы, ваше превосходительство!
— Лоткак тон, шяйтан, ёнцта лисеть, што ли? Няйсак, кодама генерал эстейнза мусь...
Сон эстакиге кармась ванома лиякс и Марфанди чистай, кайги „эсь“ вайгяльсонза азозе:
— Марфаняй...
— А?
— Марфаняй, а тон тонць... гм!
Андреевсь ширептезе выразительнай шаманц, пуроптозень трванзон, келептезень сельмонзон.
— Мезе тяфта? — варжакстсь сонь лангозонза Марфась.
— Азат, пади, мезевок?
Но Марфась мезевок ашезь отвеча, кеподсь пильге суронзон лангс, варжакстсь толпать вельф.
— Да вов и синцьке сайхть, улема...
Вакссонза ащихне стане жа кеподсть пильге сур лангс, сялдазснон видептезь ся шири, ков ванць Марфась. Тоса мольсть колмоннест, ломаттнень мархта теснаста кружафста. Сембода цебярьста няевсь Лопарсь — сонь шяяренза равчтольхть, кувакатольхть, сельмонза пиндолдсть, сериель, осалоль. Сон мольсь и шумбракшнесь, кода бта сон сонць фкя пильгонц мархта шятнесь сонцень омбоце пильгонц лангс, — тяфтама шатолдыель, афскладнайль.
Сонь вакссонза Куницына Еленась, ткачихась, комсь кафтува кизоса стирнясь, конанц пяк кельгондезь простой, ёну валонкса, яснай мыслянзон инкса, мази и таза вайгяленкса, конанц пяк сидеста кулендезь ткачне митинкнень эзга. Сон [ 47 ]нинге аф коммунаркаса, — прязонза сотф руця; аф солдатскяй шинельса, а равжа, кельме пальтоняса, — тя тяфта январскяй мороснень пингста! Лофтана строгай шамасонза няевсь эсь пачканза сетьме кенярдемась.
Еленать мархта ряцок — Клычков[2] Федорось. Тя аф ткач, вообще аф рабочай; сон аф пяк кунара сей сась Москуста, лоткась, тонадсь, ласькондсь урокнень ланга, эрясь, кода нармонь, сянь мархта, мезе саты. Ульсь студент. Революциять пингста эсь прянц няфтезе кода цебярь организатор, а пуромкснень эса корхтась кенярдезь, мялень кеподезь, седи вакска, хоть и аф фалу тевонь колга. Клычковонь рабочайхне содазь цебярьста, кельгондезь, лувондозь эсь ломанькс.
Перронть тейса толпась Куницынать, Клычковонь и Лопарень няемста шерьхкозевсь, кармась тошкама маряви тошкамаса:
— Тяни, наверна, корхтама кармайхть.
— Курок тумс...
— Да сюконямс ба што ли, — мадомс пинге ни.
— А вов палатама — и сембе.
— Марясак, звонок.
— Васенцесь, што ли?
— Васенцесь.
— Кемгафтува частста тума ушедыхть...
— Мянь пялевешкада, няйсак, вешихть тумда!
Мянготьф нюрьхкяня пальтонятне, плешивай, штада воротник, нюрьхкяня ожа, варяв кенерьбакарь мархта цёлак орнятне; равжа нюрьхкяня-тужуркатне — драповайхне, суконнайхне, кеденнетне. Кочкаф толпа!
Вокзалсь аф кели, наротта эзонза тяльгонди кржа. Кие сяда шарьхкоди, сят кундасть перяфти, куцендсь вальмя ланкненди, ламотне куцсть вокзалть пристройканц лангс, комафтозь пряснон, сельмоснон келепнезь толпать лангс, копорьгодозь, нюрьгсть шуфтонь скобатнень лангса. Лиятне, карнисненди кунцезь, занязь ётама васттнень, озсесть вагононь крышатнень лангс, куцеманятнень лангс, шятяманятнень лангс... Сяряфнихть и люпшнихть. Кажнайти охота эцемс инголи, сяда маланяв ящикть тейс, конань лангста кармайхть корхтама. Иватькшнихть, козкснихть, сюцекшнихть, сялондыхть. Вов ящикть лангс эвондась Клычковсь, — шинельняц таштоня, усксефкя: сон лядсь тона войнать эзда. Перчаткафтома палыхть кяденза — сон сяка тевсь синь яцекшнесыне зепонзонды, повозонза, уфай якстерь, лкштанькшни кулоконзонды. Тячи Федоронь шамац сяда лофтана, чем эряй фалу: кафта мекольдень ветнень кальдявста и кржа удось, эрь шиня эряскодсь, лама работась, сизесь. Вайгялец, конац фалу тяфтама чистай и кайги, потмараня, аф свежай, бувнай, кода пещераста.
[ 48 ]Клычковонди максозь васенце валть — отрядть лемста сон кармай прощандама ткачнень мархта. Якшама. Кельмось толпась. Эряви эряскодомс. Речне должетт улемс нюрьхкянят!
Федорсь варжакстсь и ашезень няй равжа массать пензон, — синь, петне, ульсть коса-бди площадть тона бокса, конац валдоптфоль газовай рожокса. Тейнза няевсь, што вов ня тёжяттнень фтала, конат ащихть сонь инголенза, теснайста фкя фкас пштетькшнезь, туста шовдати юмсезь, ащихть од, а синь мельгаст — од тёжятть, и тяфта пефтома. Тя мекольдень минутаста сон пяк сярядиста марязе вдрук, кода кельговикс, маладоннекс ащи тейнза равжа толпась, кода стака сонь мархтонза явомась.
„Няйса ли... Мрдан ли?.. Да и сембе мрдатама ли мзярдовок родной васттненди?.. Саян ли нинге мзярдовок и карман ли корхтама, кодане пяк сидеста корхнень ня кизотнень?“
Клычковсь, конац пяшксель явомань кольф мяльда, изь кенерь арьсемс эсь нюрьхкяня валонц, ашезе сода сянь, мезень колга сон кармай улема, ивадсь кода-бта сяда пяк кайгиста — тяфта сон изь иватькшне мзярдовок:
— Рабочай ялгат! Тейнек марса улемс лядсть минутат: вачкодьсазь мекольдень звонокнень — и минь тутама. Отрядть якстерь солдатонзон эзда мон тейнть корхтан: Прощайте. Лятфнемасть минь, эсь ломанентень, лятфнесть, ков и кодама тевс минь туме, уледа анокт и тиньцьке васенце серьгядемать коряс молемс минь мельганк. Тясть лоткафне мархтонок сотксонь кирдемать, кучседа кулянь пачфнихть, кучседа, мезе можете, эсь трёшниконтень эзда, лезнеда боецненди. Фронтса вачаши, ялгат, стака — сяда стака, чем тяса. Тянь тясть юксне! А нинге тясть юксне, што минь эздонк ламотне кадозь урос, аф обеспечендаф семьяснон, идьснон, конатнень эса учси вачашись — тясть кадонда синь. Стака ули ащемс тейнек окопатнень эса, кирдемс похоттнень, бойхнень эса... Но сядонь крда сяда стака ули кирдемс мучендамать, кда кульсаськ, што минь семьяньке кулсихть лезксфтома, катфста, сембонь ширде юкстафста... И явомста тейнть нинге фкя вал: работада! Сяда дружнайняста работада! Тинь — ткачтада и должеттада содамс сянь колга, ков сяда лама тинь кодатада Ивановаса, тов сяда лямбе кармай улема уральскяй, оренбургскяй ловонь степнень эса, — везде, коза повихть тинь доброванте. Работада и кемоняста мяляфтость, што сяськомась аф аньцек минь штыконьконь эса, но и нинге тинь трудонтень эса. Няйхтяма ли оду мзярдовок? Карматама верондама, што няйхтяма. Но кда и аф няйхтяма фкя фкянь — месть ризнамс: революциясь аф лувондсыне башка жертватнень. Прощайте, кельгома ялгат, отрядть якстерь солдатонзон лемста — прощайте...
Кода мярьгат вишке бурякс уфазевсь ловонь степть эса, — толпась аварьгодсь ответнай вайгяльса:
— Прощайте, цёрат! Павазуста... Аф юкстатядязь...
[ 49 ]И мзярда синь сетьмость — лоткась печальнай аф каштордомась. Тяфта ульсь минуташка, и вдруг толпать эзга кашторгодсь тошкамась:
— Еленась... Еленась лиссь... Куницынась...
Ящикть лангс стясь Куницына Еленась. Ульсть ёфси равчт Еленань светлокаряй чудеснай сельмонза. Вишкста кяденц мархта сон ётафтсь щёканц ланга, усмонц ланга, шяярь пакшензон прдазень руцянц алу, а руцянц кафцьке кядензон мархта плотнайста люпштазе прянцты.
И мярьгсь кайгиста, кода бта эстейнза:
— Ялгат!
Немойготф, учи толпась марнек ванць лангозонза.
— Мон азса тейнть прощандамста, ялгат, што минь карматама улема фронтокс, а тинь, кепотьксонди сявомс, тылкс, но фкяти омбоцефтома коданявок эрямс ёфси аш кода. Фкя фкянди лезкссь, минь лезксоньке — вов мезьса ащи тяни главнай задачась. Мзярда минь карматама содамонза, што фталонк сембось ащи спокойнайста, да лац, мезьське тейнек ули аф стака, ялгат. А кда тиньге тяса тевонте кармайхть молема кальдявста — кодама сон ули, войнась? Минь, рабочайхне, аф зря мучендавме ня кафта кизотнень — али зря, али напрасна? Аф, ялгат, тя сембе тевонкса. Вов, сявомс кепотьксонди, и миньге мольхтяма, аватне: отрядса минь эздонок комсь котува ломань. Минь станяжа шарьхкодеськ, кодама пингса эряй сембе странаньке. Эряви, значит, молемс — вов и сембе, мезе эряви азомс! Аватне — тядятне, рьвятне, стирьхне, сестратне, невестатне, ялгатне — сембе тейнть кучендсазь монь вельден эсь мекольдень поклонцнон. Прощайте, ялгат, уледа кемот духса, а минь станежа...
Тейнза ответонди тёжянь вайгялень мяштень кенярдемась, седиваксстонь валонь макссемат, благодарность ёну, эрек валонкса:
— Эх, Еленка, тейть ба министоркс улемаль! Ну и ава — кода машина работай!
Толпать эзда яцесь, ящикть лангс куцсь сире ткачсь, конань лангсоль тюжя нюрьхкяня пинжаконя, прясонзоль мянготьф кепкаль, пильгсонзольхть валенкат. Атять коськаза шамац пяшксель равжа крхка китькста, аф шарьхкодевиста мотердсть трванза. Летьке, но вандолды сельмонзон эзда, кенярьф шаманц эзда, кода волнатне, няевсть пефтома кенярдемань мяльхне:
— Да, минь отвечатама... отвечатама... — Сон шорявсь афламос и вдрук штафтозе сивай, шаржана прянц. — Кочкседязь тинь минь содаськ мезенди! Сембонь няйсасть, сембонь варжасасть, можи, и ёфси аф мрдатада тейнек. Минь, тинь алянте, — аш мезевок, што стака, — азсаськ тяфтане: арда! Кли эряви молемс — значит, молемс. Аш месть тяса кяльхть шовсемс. Аньцек ба эсь тевоньконь аф сраминдамс, — вов сон, тевсь! [ 50 ]А сембода кальдяв шитнень эзда тинь и миньге лятфнемасть, тяфтане сяда тёждя кармай улема. Минь тейнть стане жа вал макссетяма: идентень аф кадсаськ, авантень аф юкстасаськ, лезкс кодама-кодама, а макстама! Содаф, макстама — сянкса война. Дряй можна сяфтома...
Атясь валомне келептезень кядензон и грустнайста, шарьхкодевиста мярьгсь:
— Сембесяка лиякс тиемс ашкода!
Тоса мзярс ащесь, учезень эсь мялензон и, мес ашесть учев, яфодезе кяденц, вишкста щафтозе кепканц эсь сивай шура шяерю прянцты и — тумс ёфси анокста — ивадсь маряви, кайги вайгяльса.
— Прощайте цёрат... можи, ёфси...
Сире вайгяльсь зракадсь сельмеведь пачк, и сельме ведь мархта трнатозевомась оржа тококс вачкодезе толпать...
— Можи ёфси... сембось эрси... Аф содасак мезе лиси, война вдь... Сон вдь аф ужяльди...
И начка сельмонзон эзда равжа срмафненди вишкста кармасть шудема сельмеветть. Нюрьхкяня пинжаконяц рдазу ожанц мархта сельмеведензон вадендезень шаманц ланга. Толпать эса ламотне авардсть. Лиятне ивадсть алу валги ткачти:
— Видеце, атяй! Видеце! Видеце, атяй!
Атясь валгсь. Ящиксь лядсь шава. Шуваняста и кайгиста толпать вельксса гайнязевсь омбоце звоноксь. Клычковсь мекольцеда комотсь ящ икть лангс.
— Ну, прощайте! Нинге весть прощайте, ялгат! Минь васедеманьконь инкса, сайпингонь павазу васедеманьконь инкса ура...
— Ура... ура... ура!!!
И мзярда цютькяне сетьмось — команда:
— Отрядсь, вастовантт!
Эряскодозь нафтолгодсть васьне, фуражкатне, коммунаркатне, чокштатькшнесть прощандамань палсематне. Кармасть марявома эряскодозь уи увнамакс мекольдень валхне, степеннай советтне, печальнай эняльдематне, напраснай бассематне.
Хмурай якстерьармеецть лафту лангса тарсь тядянь прясь. Сельме веттне начфтозь уле тюсса шаманц. Куфцесь, летнясь, авардсь седи вакска кодама-бди фкя пялькскясь, — омбоцесь шуфтомсь, ащесь серьезнайста, кемоста и арьсезь лоткафста.
Отрядсь ваготтнень эса. Сяда малав пуромсь толпась, — сон вагононь вальмятнень эзда няевсь эхярь шамафтома массакс. Массась шарондсь, увнась, волновандась, кода понав оцю зверь — тёжянь пильгстось, тёжянь сельмостось, кулхцондысь, кода отала офтсь.
Колмоце звоноксь...
Соловейкс вяшкондезевсть вяшкоматне, увназевсть сычекс гудокне, уфкснезевсь паровознай стака кргапарсь, качакафтсь, кармась тарксемонза ваймонц, канзергодсть шарыхне эендаф [ 51 ]рельсатнень ланга, хрустядсть фкя вастста токамста, фкя фкас эрьхтсть ваготтне, тусть, кармасть ардома...
Иватькшнесть якстерьармеецне ваготтнень эзда, ивадсь и мельгаст ласьксь гибкай равжа толпась. Тоса ваготтне кяшевсть шовдати, и аньцек можналь кулемс, кода ичкозе мезе-бди ухиесь, моцордсь, сяда ичкози тушендсь шовда вети...
Кольф мяльса, нолдаф прят, сельмеведь мархта, лажнайста корхнезь январьскяй пялевень якитамть эса станцияста кудга тушендсть ткачне.
Иваново-Вознесенскяйста Самарав ардсть мес-бди пяк кувать — аф кафта недяляда кржа. Но ся пинкнень коряс и тя пингське — сембода нюрьхкяня. Кись аф пяк сизефтезень, — кельговихть — питнихть од васттне, кемокснесыне апак няенть вастсь, полафневи няйфть колга мяльсь, шуваня, вяргак струнанякс кайги настроениясь: сидеста одонь няемась штакшнезе мялень мольфти ардомать фкя лаца скучнайшинц, глухой полустанкатнень тупикснон эса лотксематнень тоскаснон. Эрь лоткамста — эшелонть тейса моли бойкай работась. Сембе кувака кись ётафтф митинкнень, пуромкснень, заседаниятнень, эсь тиф лекциятнень, охотникнень—кулхцондыхнень кружокова кайги вайгяльса беседатнень мархта. Ткачнень-большевикнень — толковай, эсь мархтост строгай цьоратнень — отрядсна сембе кить соказе крхка и апак учсек впечатлениять мархта. Станциятнень, ичкоздень полустанкатнень, ёмла ошкятнень, велетнень, веленятнень эзга, — ся шитнень пингста мольсь пефтома „вольницась“, конанц кивок ашезе лувонда, кивок ашезе организованда: разнай отряттне и отряткятня, всякай „местнай формированиятне“, шальной, пялес осал ломаттне, конат тевфтома и толкфтома шатандасть пефтома Россиять фкя пестонза омба пенцты. И сембе тя пефтома оравась трясь пря населениять эзда: ашезь панне, сюцесь-сялондсь, тиендсь, кода машнесь. Буянендамати волясь оцюволь, ашель кинди тя буянендамать овкстамс: вастова, ичкоздень вастова советскяй властсь ашезь кемокста мезе ули вийса.
Ня шитнень эзда ломанць пяк марязе, што ся нинге кржа, што улихть аньцек кафта няи сельмонза, аньцек кафта оржаста кули пиленза, кафта кяденза, конат анокт работама, и лафтувонзон лангса фкя пряц, и мяштьсонза фкя седиец. Нят вельф стака шитнень пингста пяк стакаль ломанти.
Советскяй странать сембода цебярь ломаненза тушендсть фронту. Лиятне маятакшнесть тылть апак полафнек косьфни маятаманц эса. Дряй кенерят ваномс сембонь мелге, семботь кулхцондомс и семботь тиемс, мезе эряви! Ичкоздень васттнень шовдаснон эзга, сермяжнай ужетнень аф ётави ситьксснон эса мезе тиендевсь ся смутнай шитнень пингста — мзярдовок [ 52 ]кивок аф кармай содамонза. Ломанень горясь лоткась и няевсь ломанень сельмотнень эзда.
Сиревок аш — и одовок аш. Коза жа лоткай апак аралак ломанць? И кие крьвястезе тя толонь бурять?
Ах, большевикне? Тяфта синь ширдест бралги вольницась аф максси покой, тяфта синь сюнедост минь оцю горяньке?
Ся ашезь шарьхкотькшнев, што од властсь тевфтома арни вольницать сялдазс ся шитнень понась жгутовай аркан.
И сембе эсь оцю горяснон, аф кирдеви кяжснон сермяжнай ужетне веляфтозь большевикнень лангс:
— Грабительхть! Насильникт! Поганай пляма!
И вдрук тяни, ня тёжянь большевикнень—ткачнень отрядснон эзда, сермяжникне, ёмла ошкянь эряйхне, няйсть, видеста азомс, цебярь ломатть, конат синь оцю мяльса, спокойнайста кулхцонкшнезь, сембе кизефксненди отвечакшнесть мирнайста, мезе эрявсь, азонкшнезь ёнуста и простойста, эсь воля ашезь варчсе утопнень, ашезь почкафне подвалхнень пекснон, мезевок ашесть сявонде, а мезе сявондсть — сянкса паннельхть. И крестьяттне дивандакшнесть. Тя ульсь од. Тя ульсь странна. Тя ульсь цебярь. Лияста полустанкати, коса эшелоттне кирневсть ламонь сутка, якасть эряйхне ичкоздень велетнень веленятнень эзда „кулхцондомс ёну народть“. Агитационнай работась ульсь вятьф пяк цебярьста, — сон кода-бта кенкш панчсь ся гигантскяй работати, конанц гражданскяй войнать пингста вятезь иваново-вознесенецне. И ся пингть аньцек коста синь эста аф васьфтьсайть: китайскяй ли гранть тейста, сибирскяй тайгаста, оренбургскяй степнень эзда, польскяй рубешнень эзда, Сивашса, Перекопть тейса, — коса синь ашельхть, якстерь ткачне, коса синь верснон мархта ашезь вал тюрема вастть? Сянкса синь пяк ванфтозь, сянкса пяк синь ужяльдезь, сянкса синь пяк кельгозь и пяк синь афолезь няй: сянь инкса синь лятфнемасна — кода морось ладяф советскяй модать пефтома равнинанзон эзга.
Вов тяни ардсть фронту и кельме теплушкатнень эса, январскяй вишке кельмотнень пингста тонафнесть, работасть, арьсесть, арьсесть, арьсесть. Сяс мес содазь: эряви аноконди улемс семботи. И эряви войнань вятема маштомс аф аньцек штыкса, но и ёну, свежай вала, здоровеннай пряса, содамашиса, маштомаса семботь сразу шарьхкодемс и лияти стане азомс, кода эряви. Теплушкатнень эзга кайги книгань лувомась, афкулхцондозь цяторды тонафнемась, чавкань стаякс лиендихть споряматне, а лияста морось кеподи ару морозть эса — тёждя кайги, мази долга:
Кузнецтям минь — и мяльнек эрект, |
[ 53 ]И ваготтнень черепахакс читорды молемстост, шарыхнень шямоню мороснон вельф и синь сяськондезь, равнинатнень вельф лиихть тюремань моротне, сяськомань увфса вельхнесазь пространствать. Кода синь морасть — кода морасть синь, ткачне! Тевфтома ашесть ёта тейст и мороть инкса подпольнай кизотне! Сяс сяда меле фронтса, дивизияса, кивок ашезь сода лия полк, кода Иваново-Вознесенскяйсь, коса тяфта ба ванфтолезь тюремань моротнень и тяфта ба синь моралезь, — тяфтама простота мархта, пефтома кельгома мархта, пси чувства мархта. Ся моротне гордостьса и кенярдемаса крьвяснезь полкнень. Ах, мора, мора, мезе тон можешь тиемс ломанть седиенц мархта!
Ков сяда маласоль Самарась, тов сяда уцезоль станциятнень эса кшись. Кшись и сембе лия продуктатне. Вачеда Иваново-Вознесенскяйса, коса ламонь ков ашесть макссе фкявок фунт, тонадсть лувомс, што кши кувонясь — оцю павас. И рабочайхне тяса вдрук няезь, што кшида мзяра кельк, што тевсь ёфси аф кшифтомашиса, а мезьса-бди лияса. И кольф седиса тяса канзецть марнек тевть кальдявста молеманц лангса, сянь лангса, што промышленнай рабочай центратнень соткссна лафча сёроньшачи васттнень мархта, и кода бта тяни кяж пандсть лама кшить потмоса вачашинь кизотнень инкса, — эряскодсть сивомс апак сифть путтнень. Тяни ни, тейст арам, эряволь ба верондамс, што, самарскяй лама сёротнень ёткс молемста, тоса сембода васьфтихть лама и сембось тоса ули сяда уцес. Аф, аф тяфта: ашесть веронда, — вачашись катфтозе тяфтане тьождяста верондамать. Кодама-бди полустанкаса, коса кшись няевсь сембода пяк уцес и акша, — рамасть целай пудонь. Кода ина мяндемс тяфтама шура случайть? а фкя шида меле састь вастозост и няезь, што тоса сон сяда акша и сяда уцес: растереннайста мзелдсть, тошксесть, смутяфне, ашезь сода, ков тиемс эсь коськонди запасснон.
Аньцек што пачкодсть Самарав и лоткасть коза-бди „кемветиеце“ китнень лангс, бесть сюронзон лангс, коса аньцек рельсань шямоню грудатнень да синнеф ваготтнень скелетсна, почергодсть полотнать лангс, пуромсть марс, кармасть галдиндама, эряскофтозь командирть куляксамс куроконе судьбаснон:
Ков, мзярда, кодама тевс? Тяни ли кучсамазь сразу, али шишка-кафтошка кирдьсамазь ошса?
Сембе тя можналь куляксамс аньцек Фрунзень ширде.
— Кучемс... телеграмма, кучемс!
— И азомс спасиба! — ивадсь кие бди.
— Аф аньцек спасиба, — полаксазь вайгяльхне, — азомс, што пачкодеме, што аноктама тевс — коза кодама лезкс эряви! Вов кода!
— Видеце! Стане и азомс; аноктама, кля, тевс! И азомс, што сембе, кода фкя, лиякс мярьгомс, сембода цебярьста!
— Айда, цёрат, сёрмадода телеграмма! Шумбра улеза Фрунзесь, ура!
— Ура!.. Ура!.. Ура!..
Вазьсна, кепкасна, варяжскяй шлемсна кепсесть пряснон вельксса, афлац ёрявсть шири, кода чавкань эвотьф стаясь.
Федоронь крьвястезе сёрманять ялгань тонац, — сон мархтонза пеетьфтезь яфиесь прянц вельксса, ивадсь восторженнайсь и наивнайсь:
— Ялгат! Ялгат, — вов сон, тя афоцю сёрманясь. Сонь сёрмадозе армиянь командующайсь, а дряй аф марясасть тинь, што сёрмадозе сонь ёфси и сембеширде минь мархтонок равнай ломанць? Ялгань тя манерать коряс, тя простой тонть коряс дряй тинь аф марясасть, кода миньцонк рядовой боецть эзда командирти ёфсикс аньцек фкя аськолкс? Нльне и аськолксовок аш, ялгат: кафцьке пуромкшнихть марс. Ня кафттне — фкя шама: и вождсь и рядовой якстерьармеецсь! Вов мезьса минь армияньконь виец, — тя потмаширдень единствать эса, сплоченностть эса, солидарностть эса, — тянь эса вийсь... Ну, тяфта, минь армияньконь инкса! Минь победаньконь инкса!
И якстерьармеецне оду пефтома кенярдезь ёрязь вяри вазьснон, ивадсть „ура“, няевсь кенярдемасна и гордостьсна и эсь анокшисна, вайгяльхне шумнасть, кода вишке вармать пингста морянь крхкатнень эзда кевнятне морянь берякненди.
Сяда меле событиятне комотнесть акша нумолкс. Отрядсь получась приказ вишконяста срхкамс. Армиянь штабу тердезь командирть и азозь тейнза, штоба улель анок отрядть мархта выступленияс.
Назначендаф ниле ломаттненди Реввоенсоветса азозь:
Уральскяи тумс тяникиге!
Кармасть тмашиндама. Эряскадома. Ашесть кенерь кода эряви простиндамс отрядстотнень мархта. Да и верондасть, што курок фкя фкянь няихть Уральскяйса.
Реввоенсоветть тейста тусть кафта тройкат: васенцеть эса [ 55 ]ащесть озада Андреевть мархта Федорсь, фталдоннеса — Лопарсь и Бочкин Терентийсь.
Вишкомсть алашатне, марявсь ямщиконь вяшкомась, кифчядсь куень вжнамаса степной локшесь — и ловонь бурянь порохти кяшевсть тёждя тройкатне, кода нармотть.
| II-це главась. Степсь→ |